NEBAIOT

Ang panganay sa 12 ka anak nga lalaki ni Ismael ug nagpundar sa usa sa prominenteng mga tribo sa Arabia. (Gen 25:13-16; 1Cr 1:29-31) Ang igsoong babaye ni Nebaiot nga si Mahalat (o lagmit si Basemat) naminyo sa ilang ig-agaw nga si Esau. (Gen 28:9; 36:​2, 3) Ang mga kaliwat ni Nebaiot wala ipaila ingong nagpuyo sa usa ka tinong lugar; lagmit sila maoy mga Bedouin nga nagbalhinbalhin pagpuyo uban sa ilang panon sa kahayopan. Sa panahon ni Isaias, “ang [mga] panon sa kahayopan sa Kedar” (si Kedar maoy igsoong lalaki ni Nebaiot) ug “ang laking mga karnero sa Nebaiot” duyog nga gihisgotan sa usa ka tagna nga nagtagna kon sa unsang paagi ang maong mga hayop mahimong inuyonang mga halad sa halaran ni Jehova.​—Isa 60:7.

Gituohan sa pipila ka eskolar nga ang mga kaliwat ni Nebaiot mao ra usab ang mga Nabataeanhon sa ulahing mga panahon, apan ang ebidensiya nga nagpaluyo niini nga ideya dili tino.