NETINIM

[Mga Hinatag].

Dili-Israelinhong mga sulugoon o mga alagad sa templo. (1Cr 9:2; Esd 8:17) Ang mga hawas sa 35 ka banay sa mga Netinim maoy lakip niadtong namalik gikan sa pagkadestiyero sa Babilonya uban kang Zorobabel niadtong 537 W.K.P. (Esd 2:​1, 2, 43-54, 58; Neh 7:46-56, 60; ang mga anak nga lalaki ni Akub, Hagab, ug Asna, nga gitala ni Esdras, wala hisgoti ni Nehemias. Sila tingali giusa sa ubang mga ngalan sa banay.) Lain pa, niadtong 468 W.K.P., ang pipila ka Netinim miuban kang Esdras gikan sa Babilonya paingon sa Jerusalem. (Esd 7:1-7) Human niadto ang pipila ka Netinim nakigbahin sa pag-ayo sa paril sa Jerusalem. (Neh 3:26) Miduyog usab sila sa mga Israelinhon sa usa ka pakigsaad nga dili makig-alyansa sa kaminyoon uban sa mga langyaw.​—Neh 10:28-30.

Lagmit daghan sa mga Netinim maoy mga kaliwat sa mga Gabaonhon nga gihimo ni Josue “nga mga mangangahoy ug mga magkakalos ug tubig alang sa katigoman ug alang sa halaran ni Jehova.” (Jos 9:​23, 27) Dayag nga ang ubang Netinim naggikan sa mga binihag ni Haring David ug sa iyang mga prinsipe. (Esd 8:20; itandi ang Sal 68:18.) Ang mga Netinim nga iya sa banay ni Meunim lagmit maoy mga kaliwat sa mga binihag ni Haring Uzzias sa Juda. (2Cr 26:7; Esd 2:50; Neh 7:52) Ang lain pang grupo, “ang mga anak ni Nepusim” (Nepusesim), lagmit maoy mga kaliwat ni Ismael pinaagi kang Napis.​—Gen 25:13-15; Esd 2:50; Neh 7:52.

Human sa yugto sa pagkadestiyero, ang mga Netinim mipuyo sa Opel, lagmit nga duol sa dapit sa templo, ingon man usab sa ubang mga siyudad. (Esd 2:70; Neh 3:​26, 31; 7:73; 11:​3, 21) Tungod sa ilang buluhaton sa templo, si Haring Artajerjes sa Persia nagpahigawas kanila gikan sa pagbayad ug buhis, tributo, ug sa ubang bayranan.​—Esd 7:24.