NICOLAS

[Nagsakop sa Katawhan].

1. Usa sa pito ka kuwalipikadong lalaki nga girekomendar sa kongregasyon ngadto sa mga apostoles aron itudlo ingong mga tig-apod-apod ug pagkaon aron maseguro ang pagkamakiangayon ug pagkawalay-pinalabi taliwala sa unang kongregasyon sa Jerusalem human sa Pentekostes, 33 K.P. Sa pito, si Nicolas lamang ang gitawag nga “usa ka kinabig nga taga-Antioquia,” nga nagpasabot nga tingali siya lamang ang dili-Hudiyo sa grupo, ang Gregong mga ngalan sa uban maoy kasagaran bisan taliwala sa kinaiyanhong mga Hudiyo.​—Buh 6:1-6.

2. “Ang sekta ni Nicolas” (o mga Nicolasnon) gihukman diha sa duha sa pito ka sulat ngadto sa mga kongregasyon sa kapitulo 2 ug 3 sa Pinadayag. Ang “manulonda” sa kongregasyon sa Efeso gidayeg tungod kay iyang gidumtan “ang mga buhat sa sekta ni Nicolas,” nga gidumtan usab ni Kristo Jesus. (Pin 2:​1, 6) Apan sa kongregasyon sa Pergamo dihay “nangupot pag-ayo sa pagtulon-an sa sekta ni Nicolas,” nga gikan niana sila giawhag sa pagbiya ug sa paghinulsol.​—Pin 2:​12, 15, 16.

Gawas sa gisulat dinhi sa Pinadayag bahin sa sekta ni Nicolas, wala nay nahibaloan pa bahin niini, kon bahin man sa mga buhat ug mga pagtulon-an niini nga gihukman, o sa gigikanan ug kaugmaran niini. Ang panumpay nga “maingon man” nga misunod dayon sa paghisgot sa imoral ug idolatrosong dalan nga gisubay sa mga Israelinhon tungod “sa pagtulon-an ni Balaam” (Pin 2:​14, 15) tingali nagpaila sa pipila ka kaamgiran, apan ang Pinadayag mihimog kalainan sa duha. Walay katarongan nga ilangkit ang sekta kang Nicolas nga usa ka Kristohanon sa Antioquia (Num. 1) tungod lamang kay siya ang bugtong tawo nga nagbaton usab sa maong ngalan diha sa Bibliya, sama sa gihimo sa pipila sa unang mga magsusulat sa simbahan. Ni makataronganon ang pag-ingon nga ang usa ka nag-apostatang sekta naggamit sa iyang ngalan aron dawaton ang ilang sayop nga binuhatan. Lagmit si Nicolas maoy usa ka wala-hiilhi nga indibiduwal sa Bibliya nga kaniya gingalan ang dili-diyosnong sekta.