PEDAIA

[nagkahulogang “Si Jehova Nagtubos”].

1. Amahan ni Joel, kinsa sa panahon sa paghari ni David maoy prinsipe sa katunga sa tribo ni Manases nga nagpuyo sa K sa Jordan.​—1Cr 27:​20, 22.

2. Amahan sa inahan ni Jehoiakim nga si Zebida; si Pedaia nagpuyo sa Ruma.​—2Ha 23:36.

3. Ikatulo nga ginganlang anak nga lalaki ni Haring Jehoiakin (Jeconias) nga natawo sa panahon sa pagkadestiyero didto sa Babilonya. Si Pedaia nanganak kang Gobernador Zorobabel human sa yugto sa pagkadestiyero ug busa usa ka hinungdanong dugtong sa linya sa kaliwatan nga motultol ngadto kang Jesus. (1Cr 3:17-19) Tungod sa pipila ka wala marekord nga panghitabo, si Zorobabel gitawag usab nga anak sa igsoong lalaki ni Pedaia nga si Sealtiel. Gisagop tingali ni Sealtiel si Zorobabel kon si Pedaia namatay sa bata pa si Zorobabel; o, kon si Sealtiel namatay sa wala pa makabaton ug anak, lagmit gituman ni Pedaia ang kaminyoon sa bayaw nga lalaki, nga nanganak kang Zorobabel sa ngalan sa iyang igsoon nga si Sealtiel.​—Esd 5:2; Mat 1:12.

4. Usa ka Benjaminhon kansang kaliwat nagpuyo sa Jerusalem human sa pagkadestiyero didto sa Babilonya.​—Neh 11:​4, 7.

5. Usa ka kaliwat ni Paros nga mitabang kang Nehemias sa pag-ayo sa paril sa Jerusalem.​—Neh 3:25.

6. Usa ka Israelinhon human sa yugto sa pagkadestiyero, lagmit usa ka saserdote, kinsa nagtindog sa wala nga bahin ni Esdras sa dihang gibasa ang Balaod ni Jehova ngadto sa nagkatigom nga katawhan.​—Neh 8:​1, 4.

7. Usa ka matinumanong Levihanon nga gitudlo ni Nehemias, sa iyang ikaduhang pagduaw sa Jerusalem, uban kang Selemias nga saserdote ug kang Zadok nga magkokopya aron sa pagdumala sa giamot nga ikapulo.​—Neh 13:​6, 7, 12, 13.