PELETNON

Maunongong mga manggugubat ni Haring David; kanunayng gihisgotan uban sa mga Keretnon. Sa dihang si David mikalagiw gikan sa Jerusalem tungod sa pagrebelde ni Absalom (nga gipaluyohan sa dakong bahin sa kasundalohan), ang mga Peletnon miuban kang David tabok sa Kidron. (2Sa 15:​18, 23) Mitabang usab sila sa pagpukgo sa pagrebelde ni Sheba (2Sa 20:7), ug sa ulahi sila mipaluyo sa pagpili ni David kang Solomon ingong iyang manununod, inay modapig kang Adonias sama sa gibuhat ni Joab. (1Ha 1:​38, 44) Ang mga Keretnon ug mga Peletnon dili bahin sa regular nga kasundalohan kondili maoy bulag nga dibisyon nga nag-alagad kang Haring David, kay si Joab gitawag nga pangulo sa kasundalohan, apan, ingong bulag nga dibisyon, si Benaias maoy nangulo sa mga Keretnon ug mga Peletnon. (2Sa 8:18; 20:23; 1Cr 18:17) Sanglit ang mga Peletnon wala hisgoti sa wala pa o human sa paghari ni David, ikahinapos nga tingali sila maoy iyang personal nga mga alagad, inay nga usa ka permanenteng grupo nga nag-alagad sa hari.​—Itandi ang 2Sa 8:18 ug 23:​22, 23.

Ang pagkadili-matino kon kinsa gayod ang mga Peletnon nagpatungha sa nagkadaiyang mga sugyot, nga lakip niini mao ang duha ka pangunang pundok nga may ilang kaugalingong mga ideya: (1) Ang dakong kaamgiran diha sa Hebreohanon tali sa duha ka ngalan nga mga Peletnon ug mga Filistehanon (פלתי [Peletnon] idugang ang usa lamang ka karakter mabasa na nga פלשתי [Filistehanon]) mao ang pasukaranan sa pag-ingon nga sila sama ug kagikan, o ang mga Peletnon tingali maoy sanga sa mga Filistehanon. Ang pipila mosupak niining sugyota nga ang mga Filistehanon maoy lakip sa personal nga mga bantay ni David, apan kini nga posibilidad dili gayod ikasalindot sa bug-os. (2) Sa laing bahin, ang ngalan nga mga Keretnon ug mga Peletnon tingali maoy mga termino nga nagpaila sa katungdanan o ranggo sa pag-alagad nga gihuptan sa mga bantay ni David. Ang mga Keretnon nag-alagad ingong mga tigpahamtang ug silot samtang ang mga Peletnon nag-alagad ingong mga magdadagan. Ang maong dibisyon sa mga magdadagan gihisgotan sa panahon sa mga paghari ni Saul ug sa ulahing mga hari. (1Sa 22:17; 2Ha 11:4; 2Cr 30:6) Apan kining ikaduhang ideya wala kaayo hupti sa kadaghanan kay sa unang ideya.