RUBI

Usa ka bililhon, sihag, pula kaayo nga mutya nga usa ka matang sa corundum. Kini adunay aluminum oxide nga may diyutayng kromyo ug iron oxide nga maoy nakahatag sa pula nga kolor. Talagsa ra kaayo kini, nga mas menos ug diyutay ang kagahi kon itandi sa diamante, ug kon dako ug maayo kaayog kalidad, lagmit ang bili niini molabaw pa sa diamante nga parehog gidak-on niini. Nagkalainlain ang mga kolor niini gikan sa rosas ngadto sa lugom asulon nga pagkapula nga mahalon kaayo ug sagad gitawag ingong pula nga sama sa “dugo sa salampati.” Ang “rubi,” sumala sa paggamit niini sa Bag-ong Kalibotang Hubad, gihubad gikan sa duha ka Hebreohanong pulong (ʼoʹdhem; kadh·kodhʹ) nga dayag pulos nagtumong sa kolor nga dan-ag-pula o hilabihan kapula.

Ang unang bato sa unang laray sa mga mutya diha sa “tabon sa dughan sa paghukom” sa Hataas nga Saserdoteng si Aaron maoy usa ka rubi, ug gikulit diha niini ang ngalan sa usa sa 12 ka tribo sa Israel. (Ex 28:​2, 15, 17, 21; 39:10) Ang “tabon” sa hari sa Tiro maoy rubi ug ubang bililhong mga bato. (Eze 28:​12, 13) Ang Edom maoy “magpapatigayon” sa Tiro alang sa bililhong mga rubi. Ang komersiyal nga Tiro mahinamong nakigbaylo sa mga tinipigang manggad niini alang sa mga rubi ug sa ubang mga manggad. (Eze 27:​2, 16) Sa dihang si Jehova, ang banang tag-iya sa Zion, naghupay kaniya ug naghubit sa iyang umalabot nga katahom, sa bahin, siya miingon: “Akong himoon ang imong mga pang-ibabawng salipdanan sa mga rubi, ug ang imong mga ganghaan sa pulahong naggilakgilak nga mga bato.”​—Isa 54:​5, 6, 11, 12.