SAVEH, UBOS NGA PATAG SA

Ang “Ubos nga Patag sa hari” diin si Abraham, nga midaog batok kang Kedorlaomer ug sa iyang mga kaalyado, gisugat sa hari sa Sodoma ug nakadawat ug panalangin gikan kang Melquisedek nga hari sa Salem. (Gen 14:17-24) Kasiglohan sa ulahi, si Absalom nagpatindog sa iyang monyumento didto sa “Ubos nga Patag sa Hari,” mopatim-awng didto sa samang dapit ug lagmit duol sa Jerusalem. (2Sa 18:18) Gipakita ni Josephus nga ang Monyumento ni Absalom gipatindog nga “duha ka estadio [370 m; 1,214 p] ang gilay-on gikan sa Jerusalem.” (Jewish Antiquities, VII, 243 [x, 3]) Apan, ang tukmang nahimutangan sa Ubos nga Patag sa Saveh dili matino karong adlawa.