SETAR-BOZENAI

Usa ka opisyal, tingali usa ka sekretaryo, nga kauban ni Tatenai nga gobernador sa Persia sa “unahan sa Suba” sa panahon sa paghari ni Dario I (Hystaspis). (Esd 5:​3, 6; 6:​6, 13) Si Setar-bozenai miadto sa Jerusalem kauban ni Tatenai ug uban pa aron ipahayag ang ilang mga pagsupak sa pagtukod pag-usab sa mga Hudiyo sa templo, usa ka buluhaton nga gidili ni Artajerjes. Apan ang mga Hudiyo nagpadayon sa pagtukod bisan pa sa mga reklamo samtang usa ka taho ang gipadala ngadto kang Dario. Si Tatenai ug si Setar-bozenai ug ang iyang mga kauban misulat sa hari nga nagtaho bahin sa mga kalihokan sa Jerusalem ug nag-ingon nga ang mga magtutukod sa templo naghisgot sa usa ka mando nga gipakanaog ni Ciro nga hari nga nag-awtorisar sa pagtukod niini. Sila mihangyo nga imbestigahan ang maong butang. Ang tubag ni Dario nagtahod sa dili-mausab nga mando ni Ciro ug dili lamang kay gibaoran si Setar-bozenai ug ang iyang mga kauban nga “magpahilayo” gikan sa Jerusalem kondili nagsugo usab, ubos sa grabeng silot, nga itagana ang materyal nga tabang gikan sa harianong tipiganan sa bahandi alang sa mga Hudiyo aron magpadayon ang ilang pagtukod ug mga buluhaton sa templo. Si Setar-bozenai ug ang iyang mga kauban mituman sa gimando.​—Esd 4:23–​6:13.