SIBMA

Usa ka lungsod sa S sa Jordan nga giilog sa Israel gikan sa Amorihanon nga si Haring Sihon ug gihatag ngadto sa mga Rubenhon kinsa nagtinguha niini tungod sa naglibot nga mga sibsibanan. Mopatim-aw nga gitawag usab kini ug Sebam. (Num 32:2-5, 37, 38; Jos 13:​15, 19, 21) Sa sinugdan, siyudad kini sa mga Moabihanon (itandi ang Num 21:​25, 26), ug kini nahibalik kanila sa wala ibutyag nga panahon. Nailado kini tungod sa mga parasan ug sa mga bunga niini sa ting-init. (Isa 16:​8, 9, 13, 14; Jer 48:​32, 46, 47) Ang tukmang nahimutangan sa Sibma (Sebam) wala mahibaloi sa pagkakaron, bisan tuod kini gihisgotan uban sa Hesbon ug Nebo (Num 32:3), ug ang komentaryo ni Jerome sa Isaias 16:8 nag-ingon nga kini mga 500 lamang ka lakang gikan sa Hesbon. Apan ang pipila nagtuo nga lagmit kini mao ang Qurn el-Kibsh, mga 5 km (3 mi) sa KHK sa Hesbon (modernong Hisban).