SEDA

Ang kinalig-onan sa natural nga mga lanot nga gigamit sukad pa sa karaang kapanahonan sa paghimog maanindot ug gaanon nga panapton. Ang seda ginama sa lainlaing matang sa mga hantatawo ug ilabina sa Chinese silkworm nga mokaon ug mga dahon sa mulberi ug magpagulag pluwido nga mogahi ug mahimong pino nga mga hilo diin gikan niini maporma ang usa ka uloran. Dihay mga panaptong seda nga gituohan sa mga arkeologo nga gihablon kapin sa 2,000 ka katuigan kanhi, ug kini nakaplagan sa mga lubnganan sa usa ka Fenicianhong sementeryo duol sa Sabrata, Libya.

Ang paggalam ug silkworm o ulod nga tiggamag seda mopatim-aw nga nagsugod sa Tsina ug gikan didto mikaylap ngadto sa ubang kayutaan, sama sa India. Ang mga Grego naghubit sa mga butang nga hinimo sa seda ingong si·ri·kosʹ, busa naglangkit sa seda uban sa “Seres” (kasagarang giila nga mao ang mga Insek). Ang seda gitala sa Kasulatan nga lakip sa mahalon nga mga baligya nga gipalit sa “Dakong Babilonya.”​—Pin 18:​2, 11, 12.

Ang pipila ka hubad sa Bibliya migamit sa “seda” alang sa Hebreohanong pulong nga meʹshi diha sa Ezequiel 16:​10, 13. (AS, AT, KJ, JP, Le, Mo, Ro, RS) Sumala sa rabbinikong tradisyon, ang meʹshi nagtumong sa seda; apan kini dili tino. Tungod niana, ang Bag-ong Kalibotang Hubad, nga gipaluyohan sa modernong mga leksikograpo, naghubad niini nga “mahalong panapton.”