SOREK, BUL-OGANANG WALOG SA

Ang dapit nga gipuy-an ni Delila diin si Samson gihaylo sa pagbutyag sa sekreto sa iyang kusog, ug kini misangpot sa pagdakop, pagbuta, ug pagbilanggo kaniya sa mga Filistehanon. (Huk 16:4-21) Gituohan nga kini mao ang Wadi es-Sarar (Nahal Soreq) nga mitadlas pakasadpan tabok sa Sepela ngadto sa Dagat Mediteranyo. Ang ngalang Sorek, nga nagkahulogang “Hamiling Pula nga Paras,” mopatim-awng napreserbar diha sa ngalang Khirbet Suriq, mga 25 km (16 mi) sa K sa Jerusalem, nga nahimutang sa A nga kiliran sa Wadi es-Sarar ug atbang sa Bet-semes. Ang dakong bahin niini nga rehiyon, sama karong adlawa, lagmit angayan sa pagtikad ug mga parasan (usa ka posibleng gigikanan sa ngalan niini). Ang karomata sa mga Filistehanon nga gikargahan sa gibalik nga arka sa pakigsaad ngadto sa mga Israelinhon dayag nga misubay sa bul-oganang walog sa Sorek gikan sa Ekron diha sa dalan paingon sa Bet-semes.​—1Sa 5:10; 6:10-12.