LAWALAWA
[Heb., ʽak·ka·vishʹ].
Usa ka gamay, waloy-tiil, dili pak-an nga hayop nga, sumala sa estriktong klasipikasyon sa biolohiya, dili usa ka insekto kondili usa ka arachnid.
Ang kadaghanang lawalawa maghimo ug balay aron sa pagdakop sa ilang tukbonon. Ang mga lawalawa kasagarang adunay tulo ka paris nga mga organo sa pagkalinyas (spinneret) nga anaa sa luyong bahin ubos sa ilang tiyan. Kini nakonektar sa mga glandula sa laway sa sulod sa lawas sa lawalawa pinaagi sa daghang gagmay nga mga tubotubo. Sa dihang pagawason ang laway pinaagi niini nga mga organo, kini nga laway mogahi dayon ug mogawas ingong usa ka lutay nga lanot sa seda. Pinaagi sa pagsikit niini nga mga organo, ang lawalawa makapatungha ug usa ka baga nga tanod. Sa dihang idistansiya ang mga organo sa pagkalinyas sa usag usa kini makapatungha ug hugpong sa pino nga mga tanod.
Ang balay sa lawalawa, depende sa matang sa lawalawa nga mohimo niini, maanindot ug semetriya ug komplikado ang disenyo. Diha sa mga lanot nga seda, may parehong mga sal-ang sa mga tinulo nga papilit, nga himoon usab sa lawalawa. Human makahimo ug usa ka linya tali sa duha ka nagbabag nga talay sa laway ug human kini mabutangi ug papilit, bitaron sa lawalawa ang tanod ug dayon palabtikon kini. Kini moresulta ug parehong sal-ang sa gagmayng mga tinulo sa papilit. Ang pilit nga tanod magsilbing bitik sa tukbonon sa lawalawa.
Diha sa duha ka higayon nga kini makita sa Kasulatan, ang lawalawa gihisgotan diha sa masambingayong mga paagi. Si Bildad, sa pagpakigsulti kang Job, naghisgot sa usa ka apostata ingong usa nga nagasalig o nagasandig sa usa ka “balay sa lawalawa,” usa ka butang nga huyang kaayo nga tungod niana siya dili makapabiling magbarog. (Job 8:14, 15) Ang makadaot ug mapintasong mga buhat sa dili-matinumanong mga Israelinhon gipakasama sa paghimo ug usa ka balay sa lawalawa. Apan, dili mabukotan sa dili-matinumanong mga tawo ang ilang kaugalingon pinaagi sa ilang mga binuhatan, maingon nga ang balay sa lawalawa dili magsilbi ingon nga besti.—Isa 59:5, 6.