ESTORAKE

[Heb., liv·nehʹ].

Ang ngalan niini nga tanom diha sa Hebreohanon nagkahulogang “puti,” ug ang susamang Arabikong pulong nga lubna gigamit alang sa kahoyng estorake (Styrax officinalis). Ang estorake motubo ingong usa ka taas nga kahoykahoy o gamayng kahoy, nga usahay mokapin sa 6 m (20 p) ang gitas-on. Daghan kini sa Sirya, diin kini gihimong mga sungkod ni Jacob (Gen 30:37), ug sa tibuok Palestina, nga sagad motubo diha sa ugang mga bakilid ug batoong mga dapit, diin gipabilhan ang landong niini. (Os 4:13) Ang linginon nga mga dahon niini, nga motubo diha sa tag-as ug lutay nga mga sanga, maoy berde sa ibabaw apan puti sa ilalom nga sama sa balhibo sa karnero. Ang matahom nga mga bulak nga puti ang mga gihay ug ang kahumot niini susama gayod sa mga bulak sa kahel.