TAMUZ, I

Usa ka bathala nga kaniya nakit-ang nagbalata ang apostatang Hebreohanong mga babaye sa Jerusalem sa ikaunom nga tuig sa pagkadestiyero sa manalagnang si Ezequiel (612 W.K.P.).​—Eze 8:​1, 3, 14.

Sa Sumerianhong mga teksto, si Tamuz gitawag nga Dumuzi ug mao ang bana o hinigugma sa diyosa sa pertilidad nga si Inanna (Babilonyanhong si Ishtar). Gituohan nga si Tamuz sa sinugdan maoy usa ka hari nga gipakadiyos human sa iyang kamatayon. Ang Sumerianhong mga teksto nga gituohang sukad pa sa ika-18 nga siglo W.K.P. nagpakita nga ang mga hari sa Sumer gilangkit kang Dumuzi.

Maylabot sa identipikasyon ni Tamuz, si D. Wolkstein ug si S. N. Kramer miingon: “Adunay ubay-ubayng ‘mga diyos nga may-kamatayon’ sa karaang Sumer, apan ang labing ilado kanila mao si Dumuzi, ang Tamuz nga gihisgotan sa Bibliya, nga kaniya nagbalata gihapon ang mga babaye sa Jerusalem sa mga adlaw sa manalagnang si Ezequiel. Sa sinugdan, ang diyos nga si Dumuzi maoy usa ka may-kamatayong magmamando sa Sumer, kansang kinabuhi ug kamatayon nakaapektar pag-ayo sa Sumerianhong mga pilosopo ug mga mitograpo [mga tighipos sa mga sugilambong].” (Inanna, Queen of Heaven and Earth, New York, 1983, p. 124) Dugang pa, si O. R. Gurney misulat: “Si Dumuzi sa sinugdan maoy usa ka tawo, usa ka hari sa Erek . . . Ang pagkatawhanon ni Dumuzi gipamatud-an pa gayod sa mitolohikanhong pahayag diin siya miingon ngadto kang Inanna ‘Tultolan ko ikaw ngadto sa balay sa akong diyos.’ Dili ingon niini ang sinultihan sa usa ka diyos.”​—Journal of Semitic Studies, Tomo 7, 1962, pp. 150-152.