TEKOA

Usa ka lungsod sa teritoryo sa Juda nga sagad gituohan nga mao ang Khirbet ʼet-Tuquʽ, mga 16 km (10 mi) sa H sa Jerusalem ug nahimutang sa dapit nga may gihabogong mga 820 m (2,700 p). Dapit sa S nahimutang ang Kamingawan sa Juda, nga ang “kamingawan sa Tekoa” (diin ang mga Ammonhanon, Moabihanon, ug ang kasundalohan gikan sa Bukid sa Seir nakaagom ug dakong kapildihan sa panahon sa paghari ni Jehosapat) lagmit maoy bahin niana. (2Cr 20:​20, 24) Si Haring Rehoboam, ang apong lalaki ni David, nagtukod pag-usab ug nagpalig-on sa Tekoa, ug sa kasiglohan human niadto ang siyudad lagmit nagsilbing kampo sa mga sundalo sa pagdepensa sa Juda. (2Cr 11:​5, 6; itandi ang Jer 6:1.) Kini mao ang pinuy-anan ni Ikes, ang amahan ni Ira, usa sa gamhanang mga tawo ni David. (1Cr 11:​26, 28) Gikan didto miabot ang maalamong babaye kinsa, tungod sa sugo ni Joab, nangamuyo kang Haring David alang kang Absalom. (2Sa 14:1-21) Ug didto, sa ikasiyam nga siglo W.K.P., ang manalagna nga si Amos nagbuhi ug mga karnero.​—Am 1:1.

Ang pipila lagmit mohinapos nga ang Tekoa nga gihisgotan diha sa mga talaan sa kaliwatan ni Juda (1Cr 2:​3, 24; 4:5) mao ang anak nga lalaki ni Ashur. Apan, si Tekoa wala itala sa 1 Cronicas 4:5-7 nga lakip sa pito ka anak nga lalaki sa duha ka asawa ni Ashur, nga nagsugyot nga si Ashur, inay nga amahan sa usa ka anak nga lalaki nga ginganlan ug Tekoa, lagmit mao ang magtutukod sa lungsod o ang gigikanan sa katawhan niini.