LATA

Usa ka lusparong asul nga puting metal nga lubay kaayo. Sa unom ka produkto sa hudno sa karaang mga eksperto sa metal, ang lata maoy pinakadaling matunaw sa tanan, nga nagkinahanglan lamang ug kainit nga 232°C. (449°F.). (Eze 22:​18, 20) Ang orihinal nga Hebreohanong pulong nga bedhilʹ nagkahulogang “gilain o gibahin,” nga mao, gikan sa bililhong mga metal pinaagi sa pagtunaw; kini gihubad usab ingong “mga biya.”​—Isa 1:25.

Walay mga minahan sa lata didto sa Palestina. Ang unang paghisgot sa lata, wala madugay human sa Pagpanggula, naglakip niini uban sa bililhong mga inagaw sa gubat gikan sa mga Midianhon. (Num 31:​2, 22) Nabatonan sa mga taga-Tiro ang lata gikan sa Tarsis. (Eze 27:12) Ang kadaghanan sa bug-at, itom nga oxide sa lata nga gitawag ug cassiterite naggikan sa mga balas sa suba sa Espanya ug Inglaterra. Mopatim-aw nga ang lata gigamit sa paghimog mga tunton, kay ang Zacarias 4:10 (nga naghisgot sa “tunton”) diha sa Masoretikong teksto mabasang, “ang bato [o, pabug-at], ang lata.” Sa Amos 7:​7, 8 ang Hebreohanong pulong nga gihubad nga “tunton” lagmit nagkahulogang lata o tingga. Apan, ang lata mas gigamit ingong sambog nga pangpatig-a; ang tumbaga nga sinubongan ug 2 ngadto sa 18 porsiyentong lata nakit-an diha sa karaang mga butang nga bronse.