TRAKONITE

[gikan sa lintunganayng pulong nga Gr. nga nagkahulogang “gansangon,” lagmit usa ka gansangon nga dapit].

Kini nga rehiyon, lakip ang Iturea, nailalom sa administrasyon ni Felipe nga usa ka magmamando sa Romanhong distrito panahon sa mga ministeryo ni Juan nga Tigbawtismo ug ni Jesus. (Luc 3:1) Ang amihanang mga utlanan sa Trakonite maoy mga 40 km (25 mi) sa HS sa Damasco diha sa amihanan-sidlakang bahin sa Basan. Kon hisgotan ang gidak-on, sakop niini ang usa ka pormag-peras nga luna nga mga 900 km kwd (350 mi kwd).

Sa kinadak-ang bahin, ang makita sa tungang seksiyon niini nga yuta mao ang mga deposito sa laba sa bolkan lakip ang lawom nga gawang ug mga bangag niini, ug gamay na lamang nga luna sa yuta ang katamnan ug mga paras. Kini wala puy-i, umaw, ug makuyaw nga lugar, nga nailhan karong adlawa sa Arabiko nga ngalang el Leja (nagkahulogang “ang Dalangpanan”), tungod kay kini nahimo nga maayong tagoanan alang sa mga ginukod sa balaod.

Kon ibase sa mga kagun-oban sa karaang mga siyudad niini, ikaingon nga dihay panahon nga ang populasyon sa Trakonite mas daghan kay sa pagkakaron. Kay walay mga kahoy nga gigamit sa pagtukod niini nga mga siyudad, kini nagpakita nga bisan sa karaang mga panahon ang yuta lagmit walay tanom nga mga kahoy sama usab karong adlawa. Kay may bastanteng ulan ug may mga tubod, posible ang pagpamuhig mga karnero ug mga kanding.

Ang Trakonite kas-a lamang gihisgotan diha sa Bibliya, bisan tuod nga si Strabo ug Josephus naghimog ubay-ubayng mga paghisgot bahin niini nga rehiyon. Pinasukad sa maong sekular nga mga tinubdan, nahibaloan nga gilakip sa Romanong si Emperador Agusto ang Trakonite sa teritoryo sa gingharian nga gihatag kang Herodes nga Bantogan. Sa pagkamatay ni Herodes, ang iyang anak nga lalaking si Felipe nakadawat sa Trakonite ingong bahin sa iyang tetrarkiya nga iyang gimandoan hangtod sa iyang kamatayon.