ZEBOIIM

Usa ka dapit nga ginganlan maylabot sa utlanan sa teritoryo sa Canaan. (Gen 10:19) Ang Zeboiim maoy usa sa lima ka siyudad-estado sa Distrito nga mirebelde human sa 12 ka tuig nga pagmando ni Kedorlaomer. Ang hari niini nga si Haring Semeber naghiusa sa iyang kasundalohan uban sa kasundalohan sa mga magmamando sa Sodoma, Gomora, Adma, ug Bela (Zoar) ug dayag nga naapil siya sa dihang kini nga mga magmamando giparot ni Kedorlaomer ug sa iyang tulo ka kaabin didto sa Ubos nga Patag sa Sidim. Kini nga kapildihan miresulta sa pagkabihag ni Lot ug dayon sa kadaogan ni Abraham batok sa mga manunulong. (Gen 14:1-16) Sa ulahi, ang Zeboiim maoy usa sa daotang mga siyudad sa Distrito nga gilaglag ni Jehova uban sa Sodoma ug Gomora. (Gen 19:​24, 25; Deu 29:​22, 23; Os 11:8) Ang eksaktong nahimutangan niini nga dapit wala mahibaloi. Daghang eskolar ang nagtuo nga ang orihinal nga dapit anaa karon sa ilalom sa katubigan sa Patayng Dagat, bisan tuod ang uban sa dili pa dugay miingon nga ang mga kagun-oban sa siyudad tingali mao ang dapit ubay sa usa sa mga lugot sa HS sa Patayng Dagat.