ZIKLAG

Gipahat kini sa sinugdan ingong sakop nga siyudad sa Simeon diha sa H sa Juda. (Jos 15:​21, 31; 19:​1, 2, 5; 1Cr 4:24-30) Sa ulahi, ang Ziklag nailalom sa paggahom sa mga Filistehanon. Si Akis, ang hari sa Gat, naghatag niini ngadto sa kagiw nga si David ingong pinuy-anan (ug human niadto kini napanag-iya sa mga hari sa Juda). (1Sa 27:6) Ang mga Amalekanhon misulong ug nagsunog sa siyudad, nga nagbihag lakip sa mga asawa ni David nga si Ahinoam ug Abigail. Human mapildi ang mga bandido ug nabawi ang mga binihag ug ang mga butang nga nakuha, si David nga gikan sa Ziklag nagpadala ug mga inagaw sa gubat ngadto sa iyang mga higala, ang mga ansiyano sa Juda sa lainlaing mga siyudad. (1Sa 30) Daghang gamhanang mga tawo nga sinangkapan sa hinagiban ang miduyog kang David didto sa Ziklag, ug didto iyang nabalitaan ang kamatayon ni Haring Saul. (2Sa 1:​1, 2; 4:10; 1Cr 12:​1, 2, 20-22) Human sa pagkadestiyero didto sa Babilonya, ang pipila sa mga anak sa Juda namuyo niini nga siyudad. (Neh 11:​25, 28) Lainlaing mga dapit ang gisugyot ingong nahimutangan sa Ziklag, apan si Y. Aharoni ug ang uban pa mipabor nga kini nahimutang sa Tell esh-Shariʽah (Tel Seraʽ), mga 7 km (4 mi) sa S sa Gerar ug 22 km (14 mi) sa AK sa Beer-seba.