Hustisya Alang sa Tanan—Sa Unsang Paagi Mahitabo Kini?

NGANONG gitugotan ni Jehova nga ang inhustisya modagaya pag-ayo sa yuta? Tungod kay gipalabi sa mga tawo nga maingon niana! Sa sinugdan, lahi ang kahimtang. Sa gilalang sila sa sinugdan, si Adan ug si Eva wala mag-antos sa pagkadili-hingpit. Sila bahin sa kalalangan nga gipahayag mismo sa Diyos nga “maayo kaayo.” (Genesis 1:31; Deuteronomio 32:4) Dugang pa, wala niadtoy Satanas, ug ang tawo gimandoang direkta sa Diyos. Busa, sa sinugdan walay inhustisya.

Apan kadto wala motunhay. Usa ka hingpit espiritung linalang mirebelde ug nahimong Satanas. Sa takoban sa usa ka bitin, iyang gitental si Eva sa ideya sa independensiya. Gibutang sa Diyos ang usa lang ka pagdili diha sa unang tawhanong magtiayon. Sila dili angay mokaon sa bunga sa usa ka kahoy. Kon mokaon sila, sila mamatay gayod. Apan si Satanas miingon kang Eva: “Dili kamo mamatay. Kay nahibalo ang Diyos nga sa adlaw mismo sa inyong pagkaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.”—Genesis 3:1-5.

Si Eva, ug dayon si Adan, milapas sa kasugoan sa Diyos. Buot nilang mahisama sa Diyos, nga mohimo sa ilang kaugalingong mga desisyon mahitungod sa matarong ug sa daotan. Busa, mitalikod sila sa Diyos ug mibukas sa dalan sa pagkatukod sa tawhanong pagmando, uban ang tanang suliran niini.

Si Adan ug si Eva nakaagom usab ug kausaban sa lawas. Sila gihukman sa Diyos sa kamatayon, sumala gayod sa iyang giingon nga himoon niya. Sila nahimong dili na hingpit, ug kadto misangpot sa pagkadaot sa tibuok tawhanong banay—ang ilang mga kaliwat. Misaysay si apostol Pablo: “Pinaagi sa usa ka tawo [Adan] ang sala misulod sa kalibotan ug ang kamatayon tungod sa sala, ug sa ingon ang kamatayon mikuyanap sa tanang tawo tungod kay silang tanan nakasala.” (Roma 5:12) Nianang paagiha ang pasukaranang mga hinungdan sa inhustisya mipatim-aw.

Bisan pa niana, atong mabasa: “Pinaagi sa hustisya ang usa ka hari nagahimo sa usa ka yuta nga magpabiling magabarog.” (Proverbio 29:4) Ang tawhanong katilingban dili bug-os ‘mobarog’ o bug-os mahimong lig-on hangtod igatuboy ang hustisya sa tibuok yuta. Mahitabo ba gayod kana?

Ang Gingharian sa Diyos ug Hustisya

Sanglit si Jehova nga Diyos maoy “mahigugmaon sa hustisya,” kita makapanegurong kini mahitabo. (Salmo 37:28) Apan sa unsang paagi? Ang mga pulong sa Pag-ampo sa Ginoo nagatug-an kanato. Sulod sa kasiglohan ang sinserong mga Kristohanon nagaampo: “Umanhi ang imong gingharian. Matuman ang imong kabubut-on, maingon nga natuman sa langit, dinhi usab sa yuta.” (Mateo 6:10) Busa, pinaagi sa Gingharian sa Diyos, ang kabubut-on sa Diyos sa kataposan pagabuhaton dinhi sa yuta.

Ang Gingharian sa Diyos maoy tinuod nga kagamhanan. Kini langitnon, sa ingon labi pang gamhanan kay sa bisan unsa pang tawhanong kagamhanan. Kini usab adunay usa ka Hari nga gitudlo sa Diyos, nga ang Hari mao si Jesu-Kristo, si kinsa mahunahunaon kaayo sa hustisya. (Salmo 72:12-14) Nagasaad si Jehova nga iyang panalanginan ang pagmando niining Ginghariana ilalom kang Kristo, “sa pagtukod niining malig-on ug sa paglig-on niini pinaagi sa hustisya ug pinaagi sa pagkamatarong.”—Isaias 9:7.

Ang pagkatuman sa daghang tagna karong adlawa nagapamatuod nga kining Ginghariana usa na ka kamatuoran. (Lucas 21:31, 32) Si Jesus maoy usa na ka Hari! Apan sa unsang paagi iyang ipahinabo ang hustisya alang sa katawhan tungod sa tanang kababagan? Atong tan-awon.

Maoy katuyoan sa Diyos nga ang iyang Gingharian ilalom kang Kristo mahimong usa ka tibuok-kalibotang kagamhanan. Sa matagnaon si Jehova nagaingon: “Siya [Kristo] magbaton ug mga sakop gikan sa dagat ngadto sa dagat ug gikan sa Suba ngadto sa kinatumyan sa yuta.” (Salmo 72:8) Sa matuman na kini sa tibuok yuta, mawala na ang usa ka dakong tinubdan sa inhustisya. Ang tawo dili na magmando sa iyang kaugalingon. Apan sa unsang paagi mahitabo kini sa dihang daghan kaayong kagamhanan ang nagalungtad karong adlawa, nga ang matag usa seloso kaayo sa iyang kaugalingong soberinidad?

Ang tinuod mao, gihatagan sa Diyos ug kinutoban ang panahon sa dihang ang tawhanong mga kagamhanan magmando, ug kanang kuto sa panahon miabot na. Sa paghisgot sa tanang nasyonalistikanhong kagamhanan sa atong adlaw, misulat si manalagna Daniel: “Sa mga adlaw niadtong mga haria ang Diyos sa langit magatukod sa usa ka gingharian nga dili gayod malaglag. Ug ang gingharian mismo dili igahatag ngadto sa lain nga katawhan. Kini magadugmok ug magalaglag niining tanan nga gingharian, ug kini mismo mobarog sa mga panahong walay katinoan.”—Daniel 2:44.

Niining paagiha, ang usa ka tibuok-kalibotan nga kagamhanan, ang Gingharian sa Diyos, sa dili madugay magapuli sa nasyonalistikanhong mga kagamhanan karong adlawa ug magamando sa katawhan diha sa hustisya. Pagkadako unya kana nga kausaban sa kaayohan! Ugaling, anaa pa gihapon ang suliran bahin kang Satanas. Unsay himoon sa Gingharian sa Diyos kaniya?

Ang Gingharian sa Diyos ug si Satanas

Si Satanas mipatim-aw nga sayo sa kasaysayan sa tawo, ug siya mao ang unang misugyot ngadto kang Eva sa ideya sa pagrebelde batok sa Diyos. Busa, sa gipahayag ang silot ngadto kang Adan ug Eva tungod sa ilang sala, wala hikalimti sa Diyos si Satanas. Iyang gitagna ang pag-abot sa usa ka “binhi” si kinsa magabatok kang Satanas, ug sa kataposan maglaglag kaniya: “Igabutang ko ang panagkaaway . . . tali sa imong binhi ug sa iyang binhi. Siya magasamad kanimo sa ulo ug ikaw magasamad kaniya sa tikod.” (Genesis 3:15) Sumala sa misangpot, kining sinaad nga binhi mao si Jesu-Kristo. (Galacia 3:16) Ang duha ka talagsaong pag-atubangay nahitabo na tali ni Satanas ug ni Jesus ingong bahin nga katumanan nianang karaang tagna.

Ang nahauna mipatim-awng kadaogan ni Satanas. Iyang gimaneobra nga si Jesus mamatay diha sa usa ka kahoy sa pagsakit. Sa ingon ang “tikod” ni Jesus ‘nasamaran.’ Apan ang kadaogan ni Satanas wala magdugay. Si Jesus gibanhaw gikan sa patay ug gibayaw ngadto sa hataas nga katungdanan sa langit. (Buhat 2:23, 24, 32-36) Didto, siya sa wala madugay gipurongpurongan ni Jehova nga Diyos ingong Hari sa Gingharian sa Diyos. Unya ang laing makasaysayanhong pag-atubangay nahitabo.

Ang mga sangpotanan gibatbat diha sa Bibliya: “Ang dakong dragon gitambog, ang unang bitin, ang usang gitawag Yawa ug Satanas, si kinsa nagalimbong sa tibuok gipuy-ang yuta; siya gitambog sa yuta, ug ang iyang mga manulonda gitambog kauban niya.” Ang sangpotanan? Kalipay sa langit, nga sa maong panahon nahinloan na sa makapadaot nga presensiya ni Satanas. Apan “alaot ang yuta ug ang dagat, tungod kay ang Yawa nanaog kaninyo, nga may dakong kapungot, kay nahibaloan niyang siya adunay hamubo na lamang panahon.” (Pinadayag 12:9, 12) Kita nagapuyo nianang “hamubo na lamang panahon” karon. Daghan sa mga inhustisya nga atong makita karong adlawa maoy tungod sa “dakong kapungot” ni Satanas.

Hinuon, sa dili madugay moabot pa ang laing pag-atubangay ni Satanas ug ni Jesu-Kristo. Gibatbat usab kini sa Bibliya: “Iyang gidakop ang dragon, ang unang bitin, kinsa mao ang Yawa ug Satanas, ug gigapos siya sa usa ka libo ka tuig. Ug iyang gitambog siya ngadto sa bung-aw ug gitakpan kana ug gitimrihan kana ibabaw kaniya, aron siya dili na makapahisalaag sa kanasoran hangtod matapos ang usa ka libo ka tuig.”—Pinadayag 20:2, 3.

Kini mahitabo sa dili madugay, sa dihang ang Gingharian sa Diyos magapuli sa nasyonalistikanhong mga kagamhanan niining kalibotana. Kini sa kataposan motultol sa kataposang pag-atubangay sa dihang, sumala sa matagnaong pagbatbat sa Bibliya, “ang Yawa . . . igatambog ngadto sa linaw sa kalayo ug asupre” sa iyang kalaglagan, ang kataposang ‘pagsamad sa iyang ulo.’—Pinadayag 20:10.

Busa, ang laing babag sa hustisya mahanaw na unya. Apan anaa pa gihapon kanato ang suliran sa kinaiyanhong pagkadili-hingpit sa tawo. Ang kadaghanang inhustisya sa kalibotan nagagikan sa tawo mismo. Unsay mahimo sa Gingharian sa Diyos mahitungod niana?

Ang Gingharian sa Diyos ug Pagkadili-hingpit sa Tawo

Ang pagkadili-hingpit sa tawo nagsugod sa nakasala si Adan ug Eva. (Roma 5:12) Ang tanang kaliwat ni Adan, nga may usa ra ka eksepsion, maoy makasasala. Ang maong eksepsion mao si Jesus. Siya natawo sa milagrosong paagi nga walay kasal-anan ug sa tibuok niyang kinabuhi siya nagpabiling matinumanon ug walay sala. (Hebreohanon 7:26) Sa ingon, siya nakatanyag sa usa ka hingpit tawhanong kinabuhi ingong lukat alang sa dili-hingpit nga katawhan. Iyang gisulbad ang suliran sa tawhanong pagkadili-hingpit. “Maingon nga diha kang Adan ang tanan mamatay, mao usab nga diha kang Kristo ang tanan mangabuhi.”—1 Corinto 15:22.

Sa dili madugay, kadtong nagainsistir sa paglihok nga dili matarong makakaplag nga sila walay dapit diha sa mahinlo nga yuta ilalom sa Gingharian sa Diyos. Apan kadtong may pagtuo sa halad ni Jesus magaanig dagkong mga panalangin. “Ang mga matul-id mao ang magapuyo sa yuta, ug ang mga walay-ikasaway mao ang mahibilin ibabaw niana. Mahitungod sa mga daotan, sila pagaputlon gikan sa yuta mismo.” (Proverbio 2:21, 22) Sa ingon ang laing babag sa hustisya mahanaw na.

Ang Gingharian sa Diyos ug Ikaw

Oo, si Jesus, ingong Hari sa Gingharian sa Diyos, duol nang magwagtang sa tanang dagkong kababagan sa atong pagkakita sa hustisya alang sa tanan sa yuta. Unya makita sa katawhan nga matuman ang saad: “Adunay bag-ong mga langit ug usa ka bag-ong yuta nga atong ginapaabot . . . ug niini magapabilin ang pagkamatarong.” (2 Pedro 3:13) Wala unyay dapit ang inhustisya nianang matarong nga yuta.

Siempre, kining mga panalangina maoy umaabot pa. Apan, bisan karon ang Gingharian sa Diyos ilalom kang Kristo Jesus maoy aktibo, ug kita makabatog kaayohan gikan niana. Gitagna mismo ni Jesus nga sa atong adlaw “kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang mga nasod.” (Mateo 24:14) Kanang tagnaa ginatuman na. Daghan ang nagasanong sa pagsangyaw ug nagapasakop sa ilang kaugalingon nianang Ginghariana bisan karon. Niining paagiha sila mohaom niining matagnaong mga pulong:

“Mahitabo gayod nga sa kataposang bahin sa mga adlaw nga . . . daghang katawhan ang manglakaw ug magaingon: ‘Umari kamo, kamong katawhan, ug manungas kita ngadto sa bukid ni Jehova, ngadto sa balay sa Diyos ni Jacob; ug siya magatudlo kanato sa iyang mga dalan, ug kita magalakaw sa iyang mga alagianan.’ Kay gikan sa Sion ang kasugoan mogula, ug ang pulong ni Jehova gikan sa Jerusalem.”—Isaias 2:2, 3.

Ang minilyon sa tibuok yuta nga nagapahiuyon nianang tagnaa nagatuon sa Bibliya ug nagatuon sa pagkinabuhi sa paagi nga buot sa Diyos nga sila magkinabuhi. Apil sa ubang butang, sila naningkamot sa pagkinabuhi sumala sa mga pulong sa manalagna Miqueas: ‘Sa pagtuman sa hustisya ug paghigugma sa kalulot ug mapaubsanong paglakaw uban sa ilang Diyos.’ (Miqueas 6:8) Sa ingon ilang ginapakita ang katim-os sa ilang tinguha sa pagkinabuhi ilalom sa usa ka kagamhanan nga may hustisya. Bisan karon sila nagapahimulos ug daghang panalangin gikan nianang kagamhanana samtang ang tagna ni Isaias natuman: “Tan-awa! Ang usa ka hari magamando alang sa pagkamatarong mismo; ug mahitungod sa mga prinsipe, sila magamando ingon nga mga prinsipe alang sa hustisya mismo.”—Isaias 32:1.

Nangandoy ka ba nga molantaw sa usa ka kalibotan diin magalungtad ang hustisya? Kon mao, ibutang ang imong pagsalig diha sa Gingharian sa Diyos. Pakig-uban karon sa katawhang may samang tinguha. Unya lantaw sa unahan nga may pagsalig sa pagkinabuhing walay kataposan ilalom sa pagmando sa Diyos si kinsa “mahigugmaon sa pagkamatarong ug sa hustisya.”—Salmo 33:5.