Unsay Nahitabo sa Kristohanong Pagkamabinantayon?

“KON unsay akong ginaingon kaninyo ginaingon ko sa tanan, Pagbantay.” Kadtong mga pulonga ni Jesu-Kristo mabati sa mga dalunggan sa sinserong mga Kristohanon sa tibuok nga kasiglohan. Apan pila ka membro sa Romano Katoliko, Eastern Orthodox o dagkong mga iglesya sa Protestante ang nakabaton gihapon nianang makapakurat nga pasidaan nga mabati sa ilang mga dalunggan?—Marcos 13:37, King James Version.

Nganong kinahanglang magbantay ang mga Kristohanon? Bag-o pa lang mipahayag si Jesus: “Pagbantay kamo, kay wala kamo masayod kon kanus-a moabot ang agalon sa panimalay, . . . aron nga inig-abot niya sa kalit, dili siya makakita kaninyo nga managkatulog.” (Marcos 13:35, 36) Busa gisugo ang mga tinun-an ni Jesus sa pagbantay kanunay sa pag-abot sa ilang agalon, nga mao, ang pag-abot ni Kristo. Unsay katuyoan sa pag-abot ni Kristo? Ang iyang sugo sa pagbantay gihatag ingong bahin sa iyang tubag ngadto niining direktang pangutana nga gibangon diha kaniya sa iyang mga tinun-an: “Unsa may ilhanan sa imong presensiya ug sa konklusyon sa sistema sa mga butang [“kataposan sa kalibotan,” KJ]?” (Mateo 24:3) Sumala sa samang asoy, human sa paghatag sa daghang bahing ilhanan, si Kristo miingon: “Ug unya ilang makita ang Anak sa tawo nga moabot nga sinapwang sa panganod uban sa gahom ug sa dakong himaya. Apan inigsugod nag kahitabo niining mga butanga, iyahat ninyo ang inyong mga mata ug ihangad ninyo ang inyong mga ulo, tungod kay ang inyong kaluwasan nagakahiduol na. . . . Inigkakita ninyo niining mga butanga nga magakahitabo, sayri nga nagakahiduol na ang gingharian sa Diyos.”—Lucas 21:27-31.

Maayong mga Katarongan sa Pagkamabinantayon

Busa, mihatag si Jesu-Kristo sa iyang mga tinun-an ug maayong katarongan sa pagpabiling maigmat sa espirituwal sa pagbantay sa katumanan sa “ilhanan.” Kini nagpasabot nga ang ilang Agalon ‘presente’ nga dili-makita, tungod kay dili kinahanglan ang ilhanan kon pisikal, dili-makita ang iyang presensiya. Apan ang iyang espirituwal nga presensiya nagkahulogan usab nga kining daotang “kalibotan,” o “sistema sa mga butang,” misulod na sa iyang “konklusyon,” o sa panahon sa kataposan. Ug alang sa mga Kristohanon, kini nagkahulogan nga ‘nagakahiduol na ang ilang kaluwasan.’ Oo, nagkahulogan kini nga “nagakahiduol na ang gingharian sa Diyos.”

Dili ba mao man kini ang mismong diwa sa Kristohanong paglaom? Dili ba mao man kining butanga ang gitudlo diha sa tanang mga Kristohanon sa pag-ampo nga mao: “Amahan namo nga anaa sa langit, ipabalaan ang imong ngalan, paanhia ang imong gingharian, matuman ang imong kabubut-on, sa yuta maingon man sa langit”? (Mateo 6:9, 10, The Jerusalem Bible) Sa makataronganon, dili ba angay nga ang mga Katoliko nga naglitok sa ilang Amahan Namo o sa mga membro sa ubang mga iglesya nga nag-ampo sa Pag-ampo sa Ginoo magmabinantayon aron matino nga matuman ang ilang mga pag-ampo? O dili ba kaha nawala ang dakong kahulogan nianang pag-ampoa gumikan sa pagtulon-an sa ilang mga iglesya, nga tungod niini wala na silay angay pang pagabantayan?

Kon Nganong Dili na Mabinantayon ang Kadaghanan

Kinahanglang magbantay ang mga Kristohanon sa ilhanan sa presensiya ni Kristo (Grego, pa·rou·siʹa, gihubad “pag-abot” diha sa kadaghanang mga bersiyon sa Bibliya). Kay ngano? Tungod kay nagkahulogan kini nga ang Gingharian sa Diyos, ang ilang kaugalingong kaluwasan ug ang kataposan sa “kalibotan,” o ang presente daotang “sistema sa mga butang,” haduol na. Ang nagkalainlaing mga iglesya sa Kakristiyanohan angay untang makatabang sa ilang mga membro nga magmabinantayon sa espirituwal nga paagi aron dili sila mahiabtang nanagkatulog inig-abot sa

Agalon. Nakatuman ba ang mga iglesya sa ilang misyon niining bahina?

Ang usa ka matukiong reperensiyang basahon nag-ingon: “Sa midagan ang panahon nga walay nahitabong parousia kini dugang ug dugang napalayo sa panahon sumala sa panglantaw sa iglesya, ug sa ulahi mameligro nga biyaan na lang kini sa bug-os ingong artikulo sa pagtuo.”—The New International Dictionary of New Testament

Theology. Kini, sa pagkamatuod, ang nahitabo. Gibiyaan sa mga iglesya sa Kakristiyanohan ang Kristohanong pagkamabinantayon nga gisugo ni Jesus sa iyang mga tinun-an nga dili gayod paghikalimtan. Dili na sila mabinantayon sa presensiya ni Kristo ug sa pag-abot sa Gingharian sa Diyos. Ilang gisalikway ang pagpaabot sa “konklusyon sa sistema sa mga butang,” o sa “kataposan sa kalibotan.”

Ang usay-tomo nga ensiklopedia nga Pranses nga QUID 1984 naghatag ug modernong kabatbatan sa relihiyosong pagtuo mahitungod sa pagtuo sa kataposan sa kalibotan. Ilalom sa “Mga Kinaiyahan sa Katolikong Relihiyon,” kini nag-ingon: “Daw gibatbat karong bag-o sa Iglesya ang kataposan sa Kalibotan ingong indibiduwal nga pagsulay sa tanang tawo nga atubangon sa dihang mamatay siya.” Gipadako ang problema, ang The New Encyclopædia Britannica nag-ingon: “Wala ilakip sa mas establisado Kristohanong mga iglesya ang eskatolohiya [ang pagtulon-an sa “Kataposang mga Butang”] ingong walay kahulogan o walay kapuslanang sugilambong.”

Busa, unsa ang makapakurat apan dili malikayang tubag niana nga pangutana “Unsay nahitabo sa Kristohanong pagkamabinantayon?” Kini gipatay sa “mas establisadong Kristohanong mga iglesya,” nga mao, ang Romano Katoliko, Eastern Orthodox ug sa dagkong mga iglesyang Protestante. Bisag dili mabasol ang mga membro niining mga iglesyaha, hayan matingala ang kadaghanan kanila kon ngano ug sa unsang paagi gisalikway sa ilang mga iglesya ang Kristohanong pagpaabot sa presensiya ni Kristo, ang pag-abot sa Gingharian sa Diyos ug ang kataposan sa presenteng sistema sa mga butang. Ang historikal nga mga kamatuoran nga mitultol niini maoy tukion sa mosunod nga artikulo.