Imong Kinabuhi, Imong Integridad ug ang Kard
“KON moabot ang kasamok, makalikay ang tawong maalamon: apan ang walay pagtagad nagapadayon ug siya magaantos tungod niini.”—Proverbio 27:12, Septuagint, ni Charles Thomson.
Kanang dinasig nga proverbio nagpasiugda sa bili sa paghunahunang daan. Ang usa ka ‘kasakit,’ o kalamidad, nga buot likayan sa mga alagad sa Diyos mao ang paglapas sa ilang integridad. Sulod sa daghang katuigan matinuorong ginahimo kana sa mga Saksi ni Jehova bahin sa sugo sa Diyos nga ang mga Kristohanon ‘maglikay sa dugo.’—Buhat 15:28, 29.
Nasayod ang mga Kristohanon nga human sa usa ka aksidente tingali mawad-an silag panimuot ug dili makahatag detalyadong pagpatin-aw o kon nganong dili sila makadawat ug mga pag-abunog dugo. Bisag makasulti ang nasamdang Saksi ug moingon nga—subay sa prinsipyo sa napahibalong panugot—dili siya buot magpaabunog dugo, mabalaka ang mga doktor o mga empliyado sa ospital nga basig ikiha sila kon dili nila sundon ang naandang pagtambal. Busa mga katuigan na nga ang mga Saksi ni Jehova nagdala ug Medical Alert nga kard. Kini pinirmahan, dokumentong gisaksihan nga magpalibre sa mga doktor ug mga opisyales sa ospital sa kadaot sa moresulta unyang mga komplikasyon sa pagkasayod bahin sa pagdumili sa dugo. Ang bag-ong kard pinirmahan ug pinetsahan matag tuig; busa, ang dokumento kanunayng bag-o ug balido.
Kon nagtinguha ka sa pagsunod sa balaod sa Diyos bahin sa dugo, regular ba nimong ginadala ang usa niining mga dokumentoha? Gitino ba nimo nga bag-o kini ug, kon posible, pinirmahan sa imong suod nga paryente? Panid-i sumala sa mosunod nga sulat kon nganong angay nimong buhaton ang ingon:
“Mapasalamaton kaayo ko ug ang akong bana sa inyong pagtagana kanamog espirituwal nga pagkaon sa husto nga panahon ug sa matudloong mga materyal sa pagtabang kanamo. Buot nakong iasoy kon sa unsang paagi kanang materyala nakaluwas sa among kinabuhi.
“Hunyo 6, 1983 kadto, ug ulanon nga gabii samtang nagpadulong kami sa pagpauli gikan sa trabaho. Nagtrabaho kami ingong mga kontraktor sa bag-ong pagpamalay nga adunay 30 milyas gikan sa balay ug among gihapit ang among tulo ka bata sa tunghaan. Samtang ang akong bana, si John, nagmaneho paamihanan diha sa haywey sa among gamayng trak, naghisgot kami bahin sa among umaabot nga distritong kombensiyon. Akong nakita ang pahabagatang tractor-trailer nga trak nga nabikil ug natulilik ug naigo sa balabag sa haywey nga hilabihan kusoga nga mialintabo ang lapok ug ang mga sagbot. Ug sa usa lamang ka pamilok ang trak mihagba sa balabag ug mikalit paghagsa sa atubangan kanamo samag dakong pader sa semento.
“Gipalandong namo kanunay kon unsay mahitabo kon malangkit kami sa aksidente. Among gisunod ang instruksiyon mahitungod sa pagpakigsulti sa among doktor sa pamilya ug sa lokal nga ospital bahin sa paggamit sa mga pag-abunog dugo. Apan unsa kahay mahitabo kon kami walay panimuot, gawas sa lungsod ug dili makadumili sa abuno sa dugo? Dinhi niining dapita nga napuslan kadtong mga tabang nga mahigugmaon ninyong [ang Sosyedad sa Watchtower] gitagana: ang kard sa Medical Alert. Among gidaladala kini sa tanang panahon. Tukma kining gisulatan, gipetsahan ug gipirmahan.
“Samtang wala akoy panimuot diha sa naglubag nga kagun-oban, usa ka rehistradong nars nga babaye mihunong. Buot niyang dalhon ang duha ka bata nga maabot, kay ang usa kanila nagkadugo tungod sa samad sa bagolbagol, ug gitugotan siya ni John. Ang usang batang babaye naipit tapad nako sa trak nga mabuksan lamang ang pultahan kon walwagon.
“Sa dihang miabot ang Emergency Medical Service, gihangyo ni John ang atendant sa pagradyo ug una sa ospital ug sa pagsulti kanila nga sa bisan unsang sirkumstansiya kinahanglan dili hatagan ang mga bata ug dugo. Midumili ang atendant, hangtod nga gibasa ni John kaniya ang kard sa Medical Alert. Nakombinse siya niini sa pagradyo sa mensahe ngadto sa ospital.
“Dili maayo ang kahimtang ni John, grabe ang iyang mga samad sa ulo, ang wala niyang bukton nabali ug daghang mga bun-og. Apan padayon siyang nag-ampo nga dili siya mawad-ag panimuot sa hataas nga panahon aron matino nga ang mga panginahanglan ug tinguha sa iyang pamilya maatiman.
“Nabali ang akong duha ka bat-ang, ang usa nagupok, ug nabali ang wala nga bukog sa bat-ang, nga miresultag pagdugo sa ilalom. Sa dihang miabot kami sa ospital, may panimuot gihapon ako. Gisultihan sa doktor si John nga sulod sa pipila ka oras mawad-an ako sa katunga sa akong dugo ug mamatay kon dili ako makadawat ug pag-abuno sa dugo. Bisan pa sa kahimtang ni John, siya mipadayon sa pagsulti kanila, ‘Walay dugo.’ Apan gisamok nila siya, gisultihan siya nga mawad-an siyag asawa, ug nag-ingon, ‘Kinsa may moatiman sa imo unyang mga anak?’ Sa kataposan ilang nakita ang akong kard sa Medical Alert. Gipakopyahan kini sa doktor ug girekord kini. Sanglit usa man ka legal nga dokumento, ilang gitahod kini ug mihunong sa pagpugos sa pag-abuno sa dugo. Sa milabayng unom ka oras naulian ako sa panimuot ug makasulti na sa akong kaugalingon. Apan ang katingalahan—bisag hunahunaon sa uban, nga walay bili—ang gamay nga kard nakaluwas kanako sa pagdawat sa pag-abunog dugo nga ipugos diha kanako samtang ako walay panimuot.
“Naospital ako hapit pito ka semana, apan mas dali ang akong pagkaayo, may bahin, tungod kay walay langyawng dugo nga gihatag kanako, lakip sa mga komplikasyon niini. Kaming tanan nahiusa ingong pamilya ug maayo ang pagpasig-uli sa among lawas. Iya kang Jehova ang pasalamat sa pagtagana kanamo niining katingalahang tabang sama sa kard sa Medical Alert. Kini sa pagkatinuod nakatabang gayod!”
Mabatonan sa mga Saksi ni Jehova kining bililhong mga dokumento diha sa mga ansiano sa ilang mga kongregasyon. Ang eksperiyensiya sa ibabaw nagailustrar kon nganong ikaw ug ang imong pamilya kinahanglang “magmaalamon” ug kanunayng magdala sa kompleto ug bag-ong kard sa Medical Alert.—Proverbio 22:3.