“Bug-os Tumana ang Imong Ministeryo”
Ako maugdang nagatugon kanimo sa atubangan sa Diyos ug ni Kristo Jesus, kinsa magahukom sa mga buhi ug mga minatay, . . . sa bug-os tumana ang imong ministeryo.”—2 TIMOTEO 4:1, 5.
1. Unsa ang relasyon ni Pablo ug ni Timoteo?
SA GISULAT ni apostol Pablo ang iyang ikaduhang sulat kang Timoteo, si Pablo nangagpas na sa iyang tumong ingong ministro sa Diyos sulod sa mga 30 anyos. Iyang nadawat ang daghang panalangin gikan kang Jehova. (2 Timoteo 1:2) Gipili ni Pablo si Timoteo nga magbuhat nga suod uban niya sa buluhaton sa pagpanaw, nga nag-alagad sa mga kongregasyon. Ilang gipahimuslan nga nagkauban ang daghang katuigan sa mabungahong mga kasinatian.—Buhat 16:1-5.
2. Unsa ang kahulogan sa mga pulong ni Pablo sa 2 Timoteo 4:6-8?
2 Nagsingabot na niadto ang panahong matapos na ang ministeryo ni Pablo. Siya misulat: “Ako ginaula na sama sa usa ka halad nga ilimnon, ug ang takdang panahon sa pagpahigawas kanako nagkahiduol na. Gibugno ko na ang maayong pakigbugnoay, natapos ko na ang pagdalagan hangtod sa dag-anan, gibantayan ko ang pagtuo. Sukad karon gitagana na alang kanako ang purongpurong sa pagkamatarong, nga igahatag kanako sa Ginoo, ang matarong nga maghuhukom, ingon nga ganti nianang adlawa, apan dili lamang kanako, kondili sa tanan usab nga nahigugma sa iyang pagpadayag.” (2 Timoteo 4:6-8) Kini nagpasabot nga ang kamatayon ni Pablo nagkahiduol na. Gisabot nga naagoman ni Pablo ang kamatayon ilalom sa paglutos ni Nero sa 66 K.P. Sa nag-atubang sa kamatayon, unsang mga hunahuna ang mitungha sa hunahuna ni Pablo? Tingali kini: Maayo ba ang pagkatuman ko sa akong pag-alagad? Natapos ko bang malamposon ang akong ministeryo? Oo, si Pablo nakapahayag sa iyang pagtuo nga iyang nabuhat kana! Lig-on kaayo ang iyang pagtuo, ug masaligon siyang iyang maangkon ang ganti sa pagtawag sa kahitas-an. Dako gayod ang iyang katagbawan tungod kay siya wala mobulag sa iyang tinudlong-buluhaton!
3. Una siya mamatay, unsang maayong butang ang nahimo ni Pablo alang kang Timoteo?
3 May nabilin pang gamayng panahon aron buhaton ni Pablo ang butang maayo. Una pa matulog sa kamatayon, unsang maayong butang nahimo ni Pablo alang kang Timoteo? Ubos sa inspirasyon iyang gihatag ang bililhong tambag. Atong mabasa ang iyang mga hunahuna ug mga pulong diha sa basahong Ikaduhang Timoteo. Kini ang iyang kataposang mga sinulat diha sa Kasulatan alang usab sa atong kaayohan.
4. Unsang pahimangno ang gihatag ni Pablo kang Timoteo?
4 Wala pa matapos ni Timoteo ang iyang tinudlong-buluhaton diha sa ministeryo, busa misulat si Pablo: “Ako maugdang nagatugon kanimo sa atubangan sa Diyos ug ni Kristo Jesus, si kinsa mao ang magahukom sa mga buhi ug sa mga patay, ug pinaagi sa iyang pagpadayag ug sa iyang gingharian, iwali ang pulong, buhata kana nga dinalian sa maayong panahon, sa gubot nga panahon, himoa ang pagbadlong, pagsaway, pagpahimangno, uban ang bug-os nga hataas-nga-pailob ug arte sa pagtudlo. Kay moabot unya ang yugto sa panahon sa dihang sila dili na moantos sa maayong pagtulon-an, kondili, nahiuyon sa ilang kaugalingong mga tinguha, ilang tigomon ang mga magtutudlo sa ilang kaugalingon aron gitikon ang ilang mga igdulongog; ug ang ilang mga igdulongog ilang ilingiw sa kamatuoran ug ipaabong ngadto sa tinumotumo nga mga sugilanon. Ikaw, hinunoa, batoni ang pagkamalinawon sa hunahuna sa tanang butang, antosa ang kadaotan, buhata ang buluhaton sa ebanghelista, bug-os tumana ang imong ministeryo.”—2 Timoteo 4:1-5.
5 Kanang maayong tambag nakahatag gayod ug dakong kaayohan kang Timoteo, apan kita, usab, makabaton bag kaayohan niana? Kita nagapuyo sa “kataposang mga adlaw” nga mahitungod niana si Pablo misulat. Daghang katawhan karong adlawa dunay ‘dagway sa pagkadiyosnon, apan nagapanghimakak sa gahom niini.’ (2 Timoteo 3:1-5) Ang maong mga tawo makiling lamang sa pagpamati sa “mga magtutudlo” nga magagitik sa ilang mga igdulongog. Apan, dugang pa sa pagsangyaw sa pulong diha sa tigom sa kongregasyon, ang matuod nga Kristohanon adunay obligasyon sa pagsangyaw sa tanan sa publiko, nga mangita niadtong mosanong sa “ang pulong.” Busa kining tambaga nahiangay karong adlawa alang sa Kristohanong mga saksi ni Jehova.
Kon Unsaon Pagtuman sa Bug-os ang Ministeryo
6. (a) Nganong angay natong “iwali ang pulong”? (b) Unsa ang mga kaayohan sa pagtagad kon giunsa nato pagtuman ang atong ministeryo?
6 Ang ministeryo adunay lainlaing mga bahin; adunay daghang butang pagabuhaton sa ministro. Nahauna, mihisgot si Pablo, “iwali ang pulong.” Kini mao ang pulong gipili ni Jehova nga ipadayag ngadto sa iyang mga alagad. Kini ang pulong sa kamatuoran nga gipahayag ni Jesus. Si Jehova nagapahibalo kon unsa ang iyang mensahe alang sa katawhan sa usa ka tino nga panahon, nga nagabaton sa iyang mga saksi sa yuta sa pagpahayag sa iyang kiliran sa isyu. Ang paagi ni Jehova mao ang paghatag sa mensahe sa pasidaan una siya molihok. (2 Cronicas 36:15, 16; Isaias 42:9; 43:12; Jonas 3:2-4) Ang iyang mensahe mosangpot sa kaayohan alang niadtong magapatalinghog niana; ilang mabatonan ang luwas nga dapit. Kadtong dili magapatalinghog kinahanglang makaagom sa balos sa dihang si Jehova molihok sa pagpatuman sa iyang hukom. Kinahanglang pas-anon nila ang kaugalingon nilang responsabilidad. (Buhat 20:20, 2l, 26, 27) Apan, ang dalang maalamon alang sa ministro sa Diyos mao: “Tagda kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat niini imong maluwas ang imong kaugalingon ug kadtong magapatalinghog kanimo.”—1 Timoteo 4:16.
7. Nganong kini dinalian nga buluhaton bisan pag mopatim-awng dili maayo ang mga kahimtang?
7 Ang buluhaton sa pagwali ginahimo ilalom sa nagkadaiyang mga kahimtang, apan kinahanglang kini magpadayon sa unahan. “Buhata kini nga dinalian sa maayong panahon, sa gubot nga panahon,” misulat si Pablo. Ang mensahe mahimong magkahulogan sa kinabuhi alang sa katawhan. Busa, sa bisan unsang mga kahimtang nga hiagoman sa matinumanong ministro, iyang pagaisipon ang mensahe ingong dinalian ug mangitag mga paagi aron hidunggan ang pulong, bisan pag motungha ang pagsupak sa buluhaton sa pagwali. Tin-aw natong masabtan kini sa panig-ingnan ni Jesus ug sa rekord diha sa basahong Mga Buhat sa Bibliya.
8. (a) Unsay makatabang sa ministro sa pagwali sa pulong? (b) Nganong ang pagbadlong mahimo tingaling bahin sa ministeryo?
8 Aron sa pagwali sa pulong, kon kaha sa sulod o gawas sa kongregasyon, ang ministro kinahanglang sinati sa Pulong sa Diyos, nga usa ka estudyante niana. Kinahanglang gahinan niyag panahon ang pagtuon, paghinuktok ug pagpalandong, nga matinguhaong kana hisabtan niya pag-ayo. Ang pagwali kinahanglang ipasukad sa pagkasinati sa mga pagtulon-an sa kamatuoran. Gisultihan ni Pablo si Tito nga ang magtatan-aw kinahanglang “magakupot nga malig-on sa matinumanon nga pulong kon mahitungod sa iyang arte sa pagpanudlo, aron siya makaarang sa pagpahimangno pinaagi sa pagtulon-an nga maayo ug sa pagbadlong niadtong masupakon.” (Tito 1:9) Ang Pulong sa Diyos nagasilbing usa ka paagi sa pagbadlong niadtong nahitipas sa gikinahanglan ni Jehova, nga magatul-id sa nakasala sa iyang kaugalingong kaayohan. Kining tanan bahin sa bug-os nga pagtuman sa ministeryo.
Pagpahimangno Gikinahanglan
9. Nganong gikinahanglan ang Kristohanong pagpahimangno?
9 Usahay gikinahanglan ang mga pahinumdom alang niadtong tingali wala magbuhat sa tanang angay nilang buhaton o nakulangag pagpabili ug kadasig sa pag-alagad kang Jehova. Ang Kristohanong pagpahimangno pabilhan ug dako niadtong nahigugma kang Jehova. Malipay sila nga makadungog kon unsay ginasulti ni Jehova ug magaisip niana ingong tugob espirituwal nga pagkaon. (Isaias 55:3; Hebreohanon 12:5, 6) Busa usa ka maayong pag-alagad sa atong isigkamagbubuhat—ug sa katawhang makiling sa pag-alagad kang Jehova—ang pagpahimangno kanila pinaagi sa Pulong sa Diyos. Si Pablo mismo mihatag ug daghang pahimangno.—Roma 15:30; 16:17; 1 Corinto 1:10, 11; 1 Timoteo 4:13; 6:11, 12; Hebreohanon 10:24.
10. Nganong gikinahanglan ang hataas-nga-pailob maylabot sa paghatag ug pahimangno?
10 Ang dedikadong ministro kinahanglang mahibalo usab unsaon pag-ugmad ang mga bunga sa espiritu sa Diyos. Tingali kinahanglan ang dakong pailob ug pag-antos aron sa pagsulay pagpahimangno niadtong dili dayon mosanong. Ang pipila mahimong magpakitag kakulang sa pagpabili sa paningkamot nga himoon sa paghatag kanilag pahimangno ug pagdasig. Bisan pa niana, kinahanglang buhaton kini ilabina sa tanang Kristohanong ansiano. Ang arte sa pagtudlo mahiapil dinhi. Sa dugang gamiton sa tawo ang Pulong ni Jehova, sa dugang siya mahanas sa paggamit niana. Sa diha nga mailhan sa magtutudlo ang estudyante, siya makaarang na sa pagpasag impormasyon ngadto kaniya. Gibatbat pag-ayo ni Pablo ang hustong paagi diha sa 1 Tesalonica 5:14: “Kami nagapahimangno kaninyo, mga igsoon, maymayi ang mga samokan, lipaya ang mga kalag nga nawad-ag paglaom, paluyohi ang mga mahuyang, magmapailobon sa tanan.”
Pahilayo sa mga Apostata
11. Unsay atong pagabuhaton sa mga apostata?
11 Buot ni Pablo nga mahuptan ni Timoteo ang iyang katimbang, o magmasinaboton sa tanang butang. Kinahanglang dili niya tugotang siya mahisama niadtong dili moantos sa maayong pagtulon-an ug ilingiw ang ilang mga igdulongog sa kamatuoran. Ang matuod nga ministro sa Diyos karong adlawa dili sobra ka mabalak-on ug madisturbo sa iyang kalihokan sa dihang iyang hisayrang ang pipila nagapahilayo sa Pulong sa Diyos ug sa maayong pagtulon-an niini. Kita gipasidan-an na nga aduna unyay mga apostata ug mga tawong gustong pagitik sa ilang mga igdulongog. Ang tambag sama sa anaa sa 2 Juan 9-11, 1 Corinto 5:11-13 ug 2 Timoteo 3:5 wala magtugot sa pagpakig-uban sa mga nagapahilayo sa kamatuoran. Ni atong paliton o basahon ang ilang mga sinulat. Adunay daghan pa nga gustong magpatalinghog sa kamatuoran, ug uban kanila kita makabaton sa atong Kristohanong pagpakig-uban.—1 Timoteo 6:20, 21.
12. Nganong kinahanglang mobarog nga malig-on ang Kristohanong ministro?
12 Mitambag si Pablo: “Ang mga tawong daotan ug mga impostor mosamot pagkadaotan, nga magalimbong ug hilimbongan.” (2 Timoteo 3:13) Sa kahayag nianang abanteng pasidaan, ang Kristohanong ministro dili mokuyog kanila. Siya nagapatalinghog sa maayong tambag sa apostol: “Apan, magpadayon ka sa mga butang nga imong nakat-onan ug nadani ka sa pagtuo, kay nasayran nimo gikan kang kinsa imong nakat-onan kana sila, ug sukad sa pagkabata imong nahibaloan ang balaang mga kasulatan, nga makahimo kanimong maalamon alang sa kaluwasan pinaagi sa pagtuo maylabot kang Kristo Jesus. Ang tibuok Kasulatan gibugna sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina sa pagkamatarong, aron ang tawo sa Diyos mahimong bug-os may katakos, bug-os masangkapan alang sa tanang maayong buhat.” (2 Timoteo 3:14-17) Ang regular nga pagtuon sa Pulong sa Diyos maoy panalangin niadtong matinguhaon sa pagtuman sa ilang ministeryo.
Mga Panalangin Gikan sa Kristohanong Panagkauban
13. Sa unsang paagi ang pagbuhat diha sa ministeryo uban kang Pablo nakahatag ug kaayohan kang Timoteo, ug sa unsang paagi kita makabatog kaayohan?
13 Dako gayod nga panalangin kang Timoteo nga siya nakig-uban kang Pablo sa daghang katuigan, nga nakapaniid sa unsang paagi magagawi ang matinumanon, hamtong nga ministro sa Diyos. Gigamit ni Pablo ang ilang mga kasinatian ingon nga maayong pahinumdom alang kang Timoteo: “Imong gisunod gayod ang akong pagpanudlo, ang akong pagkinabuhi, ang akong katuyoan, ang akong pagtuo, ang akong hataas-nga-pailob, ang akong gugma, ang akong pagkamainantoson, ang akong mga paglutos, ang akong mga pag-antos, ang matang sa mga butang nahitabo kanako sa Antioquia, sa Iconio, sa Listra, ang matang sa mga paglutos nga akong giantos; ug bisan pa niana ako giluwas sa Ginoo gikan nianang tanan. Sa pagkamatuod, ang tanang matinguhaon sa pagkinabuhi nga diyosnon labot kang Kristo Jesus pagalutoson usab.” (2 Timoteo 3:10-12) Bisan tuod kita karon walay direktang pakigkontak kang Pablo, ang mabug-osong talaan sa iyang mga paagi nga makaplagan diha sa Bibliya makatabang usab kanato.
14. Nganong kita angay maandam sa pag-antos sa kadaotan?
14 Gihisgotan ni Pablo ang iyang mga paglutos ug mga pag-antos, ug ang iyang tambag alang sa Kristohanong ministro mao nga maandam sa pag-antos sa kadaotan. (2 Timoteo 4:5) Sa kadaghanan kinahanglan ang pag-agi sa usa ka matang sa paglutos diha sa bug-os nga pagtuman sa atong ministeryo. Usa ka pribilehiyo ang paghupot sa integridad ilalom sa pagsulay ug paglipay sa kasingkasing ni Jehova. (Proverbio 27:11) Ang usa ka pagpamatuod mahimong mosangpot nga madayeg si Jehova!
Ang Buluhaton sa Usa ka Ebanghelista
15. Nganong kinahanglang himoon ang pagwali sa maayong balita samtang atong ginatuman sa bug-os ang atong ministeryo?
15 Ang pagwali sa maayong balita nagakuhag dakong bahin sa panahon sa matinumanong Kristohanong ministro. Matud ni Jesus: “Ang maayong balita kinahanglang igawali una sa tanang kanasoran.” (Marcos 13:10) Iyang gitin-aw nga ang kataposan dili moabot hangtod nga gikawali na nga igo ang maayong balita. Si Pablo nakapribilehiyo sa pagpakig-ambit sa maayong balita sa daghang magtutuo sa tibuok Imperyo sa Roma. Kadto misangpot sa pagkaporma sa bag-ong mga kongregasyon ug pagkatudlo sa mga magtatan-aw. Sila, sa baylo, uban sa ilang Kristohanong mga igsoong lalaki ug babaye miapil sa buluhatong pagwali sa maayong balita ug busa nakapakaylap sa halayo sa buluhatong pagwali. Ang dako sa buluhaton gihimo sumala sa gibatbat ni Pablo, ‘sa pagpanudlo sa dayag ug sa balay-balay.’ (Buhat 20:20) May maayong mga sangpotanan niadto, ug may ekselenteng mga sangpotanan karong adlawa sa dihang ang Kristohanong pagwali ginabuhat sa tibuok kalibotan.—Juan 14:12.
16. Unsang ebidensiya ang nagapakita nga daghan ang nagapadapat sa tambag ni Pablo sa 2 Timoteo 4:5?
16 Tungod sa pagtuo, ang daghan nagapahimulos sa kahigayonan sa pagpauswag sa ilang kalihokan sa buluhaton sa pagwali. Kaliboan ang misulod sa natad sa misyonaryo, ug ginatos ka libo ang nagapakig-ambit sa payunir nga pag-alagad. Sa 203 ka kayutaan aduna na karoy kapin sa 2,800,000 nga magsasangyaw sa maayong balita sa kapin sa 47,000 ka kongregasyon, ug nagauswag ang gidaghanon. Kining kahibulongang mga butang ebidensiya nga gibutang sa kasingkasing sa dedikadong mga alagad ni Jehova ang balaang sugo kanila ug “bug-os nagatuman” sa ilang ministeryo.
Pagtuman sa Buluhaton
17. Unsay gustong makita ni Jehova nga pagabuhaton sa iyang mga alagad mahitungod sa buluhatong gihatag kanila karong adlawa?
17 Gitudlo ni Jehova ang iyang mga dinihogan ngadto sa usa ka ministeryo, ug ang “dakong panon” nagabuhat kiliran por kiliran duyog kanila. Sa matagnaon, sa Ezekiel kapitulo 9, ang buluhaton gipanig-ingon sa pagbutang ug timaan diha sa mga agtang niadtong nagapanghupaw ug nagaagulo. Kita nasayod gikan nianang tagnaa nga moabot ang panahon dihang magaingon ang lalaki nga may tintero sa sekretaryo: “Nahimo ko na ang sumala sa imong gisugo kanako.” Mahimuot si Jehova sa iyang mga alagad sa diha nga ilang tumanon ang iyang gisugo kanila.—Ezekiel 9:4, 11; Genesis 6:22;
18, 19. Unsa ang pipila ka paagi nga makapadapat ka karon sa pahimangno ni Pablo sa 2 Timoteo 4:1-5?
18 Samtang mapanid-an natong ang mga hitabo sa kalibotan maugmad nga nahiuyon sa mga tagna mahitungod niining kataposang mga adlaw, dili matabang nga atong bation gayod ang pagkadinalian sa buluhatong pagwali nga gihatag kanato. Nalangkit ang mga kinabuhi. Ang pagtigom nagakahitabo ug si Jehova nagapadali niini sa iyang panahon. (Isaias 60:22) Busa, bisan kon unsa ang imong kaakohan o responsabilidad ingong dedikadong alagad ni Jehova, buhata kana sa pagpahimuot sa bug-os kaniya. (Colosas 1:10; 3:23, 24) Ibutang sa hunahuna ang buluhatong gihatag kanimo nga pagabuhaton ug sulayi ang pagbuhat niana sa bug-os. Kon ikaw nagaatiman sa pila ka buluhaton diha sa Kingdom Hall, buhata kana sa bug-os. Kon ikaw gitudlo sa mga buluhaton uban sa usa ka grupo sa Pagtuon sa Basahon sa Kongregasyon, pagbuhat nga suod niana ug magpahimangnoay ug magdasigay sa usag usa. Kon usa ka ka payunir o misyonaryo, tinoa ang pagkugi sa pagkab-ot sa mga tumong sa imong pagsangyaw.—Roma 12:6-9.
19 Makapangutana ka usab sa kaugalingon, May dugang pa ba nga akong mahimo sa pagtabang sa ubang mga Kristohanon, ilabina ang mga bag-ohan sa kongregasyon, nga makapalig-on kanila? Kon ang bahin sa imong ministeryo mao ang pagkaansiano sa kongregasyon, ilha ang dagway sa “ang panon” ug atimana pag-ayo ang tanang kaanib niana. Tagda nga walay mausa ang mahimong dili aktibo o dili mabungahon mahitungod sa tukma nga kahibalo sa atong Ginoong Jesu-Kristo. (2 Pedro 1:5-8) Labaw sa tanan, magmaigmat sa kon unsay imong ginabuhat diha sa buluhatong pagwali sa maayong balita sa tuyo nga ikaw “bug-os magatuman sa imong ministeryo.”
Nahinumdom Ka Ba?
◻ Unsa ang kahimtang ni Pablo sa iyang gisulat ang Ikaduhang Timoteo?
◻ Nganong hinungdanon ang pagwali sa pulong?
◻ Nganong hinungdanon ang pagpahimangno?
◻ Unsaon pagtagad ang bakakong mga magtutudlo?
◻ Nganong hinungdanon kaayo ang pagwali sa maayong balita karong adlawa?
5. Unsang tambag ni Pablo ang makapaikag ilabina kanato?
[Hulagway sa panid 16, 17]
Ang ikaduhang sulat ni Pablo kang Timoteo nakatabang kaniya ‘sa pagtuman nga bug-os sa iyang ministeryo’