Ang Ipasabot sa mga Balita

Kadaot Tungod sa Gutom

Ang laing ebidensiya sa kataposang mga adlaw mao ang gutom. Sa pagpunting sa atong panahon, gitagna ni Jesu-Kristo ang ‘mga kanihit sa pagkaon sa usa ka dapit ngadto sa laing dapit.’—Mateo 24:3, 7.

Ang gutom karon nagahadlok sa daghang katawhan sa luag nga dapit sa amihanan-sentral Aprika ug nagabilig dakong kagul-anan ug kamatayon nga minilyon sa iyang agi. Apan sa malangkobon wala hisayri nga tali sa 1958 ug 1961 ang hulaw, mga baha ug mga dangan naghimo sa daot nga mga ani sa Tsina nga grabeng mga kanihit sa pagkaon. Sa unang panahon, ang opisyales sa dakong-yuta sa Tsina karong bag-o miangkon nga kapin sa diyes milyones sa iyang populasyon ang namatay sulod niadtong upat ka tuig nga gutom. Ang magsusulat sa Associated Press si Jeff Bradley nagkutlo sa tigpamaba sa The State Statistical Bureau, si Xu Gang, nga miingong sulod nianang katuigana “kapin sa 10 milyones nga katawhan” nakaagom sa dili-kinaiyanhong mga kamatayon “tungod sa ginamag-tawo nga mga hinungdan ug sa grabeng kinaiyanhong mga katalagman.”

Bisan sa paningkamot sa pagtabon sa mga kamatuoran, ang nangamatay sa gutom niining sigloha dili matago. Kining tanan modugang sa dakong katumanan sa tagna ni Jesus mahitungod sa ‘ilhanan sa iyang presensiya ug sa konklusyon niining sistema sa mga butang.’—Mateo 24:3.

“Unsay Nagakahitabo sa Atong Katilingban?”

Kadaghanan karong adlawa, ang kapintasan mahitabo sa labing wala-dahoma nga mga panahon ug mga dapit. Pananglitan, ang kalinaw sa sayo sa usa ka hapon sa Dominggo sa gawas sa siyudad sa Sydney gibuak sa kalit sa dihang ang karibal “bikie” nga mga gang nga sinangkapan sa mga pusil, riple, kutsilyo, batota, igtotornilyo ug mga kadena dayag naggubatay sa usag usa. Sa natapos ang away 15 minutos sa kaulahian, unom ka sakop sa duha ka motorsiklo nga gang ug usa ka 14-anyos nga babayeng tumatan-aw nagbuy-od nga patay. Labing menos 20 nga uban ang nasamdan, nga ang pipila seryoso.

Usa ka pangutana nga ginasukna sa daghang tawo sa Australia ug sa ubang bahin sa kalibotan maayong pagkasuma diha sa The Australian sa Septiyembre 3, 1984: “Unsay nagakahitabo sa atong katilingban?” Ang mga indibiduwal nga “natudloan ni Jehova” nasayod sa tubag. (Juan 6:45) Ang bag-o pang nasaksihan sa Australia usa ra ka kuwadro sa hataas nga rolyo sa nagpadayong mga buhat nga pintas nga nakita sa tibuok kalibotan sukad sa tuig 1914. Walay dapit sa yuta ang dili apektado sa makapatay nga paghikap sa kapintasan. Ginapunting sa Bibliya kining mga butanga ingong ebidensiya nga ang katawhan nagapuyo na sa “kataposang mga adlaw.” Ingong katumanan sa matagnaong Pulong sa Diyos, karon atong makita ang “pag-uswag sa pagkamalapason” ug usa ka katilingban nga gihampak sa mga tawo nga “walay pagpugong-sa-kaugalingon, mabangis, walay gugma sa pagkamaayo.”—Mateo 24:12; 2 Timoteo 3:1-3.