Ang Pagsangyaw Nagadalag Kauswagan sa Gingharian
“Hinaot si Jehova . . . magpadaghan kaninyo sa usa ka libo ka pilo sa inyong gidaghanon karon, ug hinaot siya magapanalangin kaninyo sumala sa iyang gisaad kaninyo.”—DEUTERONOMIO 1:11.
1, 2. (a) Unsay gisaad ni Jehova sa Israel? (b) Giunsa niya pagtuman ang iyang mga saad, apan depende sa unsa?
USA KA LIBO KA PILONG PAG-USWAG! Kana ang gihangyo ni Moises alang sa “balaang nasod” ni Jehova, ang Israel. Gisaad ni Jehova ang dagkong mga butang alang nianang nasora. (Exodo 19:5, 6; tan-awa usab ang Genesis 12:2, 3.) Gituman ba niya kanang mga saara?
2 Aw, mga 500 ka tuig tapos sa pagpahayag ni Moises sa mga pulong sa ibabaw, kini gitaho: “Ang Juda ug Israel daghan kaayo, ingon sa balas nga anaa sa lapyahan sa dagat sa pagkadaghan, nga nangaon, ug nanginom ug nanagkalipay.” Ang rayna sa Sheba, nga gikan sa halayo aron molantaw sa katahom niadtong ginghariana, mipatugbaw ngadto kang Solomon: “Ania karon! Ang katunga wala isugilon kanako. Ang imong kaalam ug kauswagan milabaw sa kabantog nga akong nadungog. . . . Hinaot si Jehova nga imong Diyos pagadayegon . . . tungod kay si Jehova nahigugma sa Israel sa panahong walay katinoan.” (1 Hari 4:20; 10:7-9) Basta ang maong katawhan nag-alagad nga matinumanon ingong mga Saksi ni Jehova, iya gayod gihatag ang kadagaya ug kauswagan kanila.
3. (a) Unsay gipamatuod ni Pedro bahin sa “katawhan alang sa iyang ngalan” sa Diyos? (b) Nganong ang ngalang mga Saksi ni Jehova nahiangay sa maong katawhan?
3 Kapin sa usa ka milenyo tapos sa adlaw ni Solomon, si apostol Pedro, samtang nagpamatuod atubangan sa Kristohanong nagmandong lawas sa Jerusalem, “misugid sa unsang paagi ang Diyos sa unang panahon miliso sa iyang pagtagad ngadto sa kanasoran aron sa pagkuha gikan kanila sa usa ka katawhan alang sa iyang ngalan.” (Buhat 15:14) Ang mga Israelinhon maoy katawhan alang sa ngalan sa Diyos. Apan karon, sa makausa pa, si Jehova nagtigom “sa usa ka katawhan alang sa iyang ngalan”—ang Kristohanong kongregasyon, ang espirituwal nga Israel—nga magasangyaw alang kang Jehova, nga magapaila sa mga katuyoan sa iyang Gingharian. (Galacia 6:16) Sa tukma, kining maong katawhan mailhan karong adlawa sa tibuok yuta pinaagi sa ngalan nga gihimo mismo ni Jehova nga ilado diha sa Isaias 43:10-12, ‘mga Saksi ni Jehova.’ Unsay nalangkit sa ilang pagkahimong katawhan alang sa ngalan ni Jehova?
“Akong mga Saksi”
4. (a) Nganong ang mga Saksi ni Jehova mahimong ‘mga saksi ni Jesus’ usab? (b) Sumala sa Kasulatan, si Jesus nagbilin kanato sa unsang panig-ingnan sa pagsaksi alang kang Jehova?
4 Si Jesus mismo nagsugo sa maong katawhan, nga miingon: “Kamo mao unya ang akong mga saksi . . . ngadto sa kinalay-ang bahin sa yuta.” (Buhat 1:8) “Akong mga saksi”—kini bang mga pulonga ni Jesus nagkahulogang mahitungod lamang kang Jesus, ug dili kang Jehova, nga igahatag ang pamatuod? Halayo niana! Niadtong hinungdanong panahon, sa gibalhin ang pag-uyon ni Jehova gikan sa unodnon ngadto sa espirituwal nga Israel, kinahanglan ang paghatag ug bug-os nga pagsaksi mahitungod kang Kristo nga ibabaw kaniya gitukod ang maong bag-ong kahikayan. Bisan pa niana, si Jesus nagapabiling sakop kanunay sa iyang Amahan. Iyang gihatag ang panig-ingnan alang kanato sa pagsaksi mahitungod sa ngalan ug Gingharian ni Jehova.—Juan 5:30; 6:38; 17:6, 26; 18:37.
5. (a) Mahitungod sa unsang mga bahin maylabot kang Jesus nga kita magasaksi? (b) Niini, sa unsang paagi kita nagasunod sa mga lakang ni Jesus?
5 Si Jesu-Kristo mao ang Tigpataliwala sa bag-ong tugon ug ang dinihogang mga Kristohanon nga anaa niana gitawag sa pagpanunod sa Gingharian. Siya mao “ang Pangulong Ahente sa kinabuhi” si kinsa gigamit ni Jehova sa pagtubos sa katawhan gikan sa kamatayon. Si Jesus “kinahanglang magmando ingong hari” hangtod ang tanang kaaway sa Diyos ug tawo mapukan ug mapasig-uli na ang mahimayaong paraiso niining yutaa. Siya mao “ang Anak sa Diyos” nga magatawag sa mga patay gikan sa ilang mga lubnganan sa pagkabanhaw. (Hebreohanon 9:15; Buhat 3:15; Salmo 110:1, 2, 5; 1 Corinto 15:25-28; Lucas 23:42, 43; Juan 5:25-29) Busa, ingong mga Saksi ni Jehova, kita nagasaksi usab mahitungod sa talagsaong bahin sa Anak sa pagbayaw sa ngalan ni Jehova. Niini, kita nagasunod sa mga lakang sa atong Agalon, kinsa mismo iladong saksi ni Jehova—“ang Matinumanong Saksi.”—Pinadayag 1:5; 3:14; Juan 18:37; 1 Pedro 2:21.
Kinsa ang Nagasangyaw?
6. (a) Kinsa lamang karong adlawa ang nagahatag sa Gingharianong pagpamatuod? (b) Nganong ikaingon nga sila ‘nagabuhat sa labaw nga mga buhat’?
6 Karong adlawa, ang nahiusang katawhan ang nagasangyaw “ngadto sa kinalay-ang bahin sa yuta.” Kini ang katawhan nga gihisgotan ni apostol Pedro—ang ‘katawhan alang sa ngalan sa Diyos’—nga nagasaksi kang Jehova ug sa iyang Gingharian pinaagi kang Kristo Jesus. Mahitungod niini, si Jesus miingon ngadto sa iyang mga disipulo: “Siya nga nagtuo kanako, kana siya magabuhat usab sa mga buhat nga akong ginabuhat; ug siya magabuhat ug mga buhat nga labaw kay niini, tungod kay ako moadto sa akong Amahan.” (Juan 14:12) Gikan sa tuo nga kamot sa iyang Amahan sa mga langit, ang Haring Jesu-Kristo nagadumala karon sa labing bug-os nga pagsangyaw nga sukad gihimo dinhi sa yuta. Sumala sa gitagna ni Jesus, sa dihang “kining maayong balita sa gingharian gikawali na sa tibuok gipuy-ang yuta alang sa usa ka pamatuod sa tanang nasod . . . unya moabot ang kataposan.”—Mateo 24:14.
7. (a) Nganong ang mga sekta sa Kakristiyanohan napakyas sa pagsaksi? (b) Sa kaatbang, nganong ang mga Saksi ni Jehova madasigon kaayo sa ilang pag-alagad?
7 “Kining maayong balita sa gingharian” mao ang labing makalipay nga balita nga sukad gikamantala ngadto sa mga tawo. Kini mao ang mahimayaong maayong balita nga mahitungod niana bug-os naghilom ang relihiyosong mga sekta sa Kakristiyanohan. Sila walay Gingharianong paglaom sa umaabot. Dili katingad-anang sila napakyas sa pagsangyaw! Sila napakyas sa pagmatikod sa labing makapaukyab nga hitabo sa tibuok kasaysayan—ang pag-abot diha sa himaya sa Gingharian sa Anak sa tawo aron molingkod sa iyang mahimayaong trono ug maghukom sa kanasoran ug mga katawhan sa yuta. Kana maoy butang nga pagasaksihan! Busa, ilalom sa pagtultol sa manulonda, ang mga saksi ni Jehova ug sa iyang Kristo karon nagapahayag sa “walay kataposang maayong balita . . . ingong malipayong mga balita ngadto sa mga nagapuyo sa yuta, ug sa tanang nasod ug banay ug dila ug katawhan.” Maikagon ka bang nagapakig-ambit niining maong pagsaksi?—Pinadayag 14:6, 7; Mateo 25:31-33.
Dakong Pamatuod sa 1984
8. (a) Nganong kita angay magmalipayon mahitungod sa Taho sa Pag-alagad sa Tuig 1984? (b) Unsay nagadani sa bag-ong mga disipulo?
8 Ang Taho sa Pag-alagad sa Tuig 1984 sa mga Saksi ni Jehova sa Tibuok Kalibotan, nga makita sa mga panid 20-23 niining magasina, nagapakita unsa ka dagaya ang pagpanalangin sa atong Diyos, si Jehova, sa paningkamot sa iyang mapaubsanong mga saksi. Sa tanan, 203 ka kayutaan ang gihawasan. Niini kanila, 172 ka yuta nagtahog pag-uswag sa magmamantala. Ug ikalipay, ang maong mga magmamantala sa Gingharian nagahisgot usab kon sa unsang paagi ‘sila gipadaghan sa Ginoo, oo, gipadagaya diha sa gugma sa usag usa ug sa tanan.’ (1 Tesalonica 3:12) Ang mahigugmaong panaghiusa taliwala sa katawhan ni Jehova, uban ang pagsangyaw sa Gingharian, nagadani sa kapid-ang bag-ong mga disipulo. Kanila si Jesus nagaingon: “Kamo mahibalo sa kamatuoran, ug ang kamatuoran magpahigawas kaninyo.”—Juan 8:31, 32.
9. (a) Sa unsang paagi nakapribilehiyo ka tingali sa pag-apil sa paghimo niining tahoa? (b) Unsay ginapaila sa mga numero bahin kang Jehova ug sa iyang katawhan?
9 Sa unsang paagi natigom kining talagsaong taho sa pag-alagad? Kini naglangkob sa mga taho sa pag-alagad sa kanataran nga imong—ang tinagsa ka magmamantala sa Gingharian—matinumanong gihatag sa matag bulan. Dili ka ba malipay nga ikaw may gamayng bahin sa maong dakong taho? Kining mga numeroha nagapakita unsa ka kahibulongan si Jehova ‘nagabubo sa usa ka baha sa panalangin’ ibabaw sa iyang mga Saksi—kining “katawhan alang sa iyang ngalan”—si kinsa iyang gihiusa diha sa tibuok-yuta nga bugkos sa mahigugmaong pag-alagad.—Malakias 3:10; Salmo 56:10, 11; Colosas 3:14.
10. (a) Unsay nagapasiugda nga ang mga saksi kinahanglang magsakripisyo sa kaugalingon? (b) Unsay ginaingon sa Kasulatan mahitungod sa mga maghuhupot-sa-integridad ug sa ilang balos?
10 Ang kinadak-an niining pagsangyawa o pagsaksi nahimo ilalom sa paglutos o kalisdanan ug sa dakong pagsakripisyo-sa-kaugalingon. Kini pagadahomon, kay ang pulong “pagsaksi” sumala sa pagkagamit dinhi maoy hubad sa Gregong martýs o martyr, nga gikan niana gikuha usab ang pulong “martyr,” nga nagkahulogang usa nga nagasaksi pinaagi sa iyang kamatayon. Kini nagapasiugda nga kita, ingong mga Saksi ni Jehova, angay masakripisyohon sa kaugalingon, nga determinado kanunay sa pagkugi ug paghupot sa integridad ilalom sa tanang kahimtang, bisan pag hangtod sa kamatayon kon gikinahanglan.—Lucas 9:23; itandi ang Job 2:3; 27:5; 31:6; Buhat 22:20; Pinadayag 2:10.
Gipanalanginan ang mga Maghuhupot-sa-Integridad
11, 12. (a) Si Jehova nagahatag sa unsang makapalig-ong mga pasalig? (b) Sa unsang paagi ang iyang katawhan nagmadaogon ibabaw sa totalitaryanhong mga pagpiot?
11 Sa mga panahon sa paglutos, ang ‘katawhan sa ngalan’ ni Jehova nagkinahanglan sa “gahom nga labaw sa kasagaran” sa pagbuntog sa mapintas nga mga atake ni Satanas ug sa iyang mga demonyo. Si Jehova nagahatag nianang gahoma ug nagaluwas ug nagapauswag sa matinumanon niyang mga saksi. (2 Corinto 4:7-9; Isaias 54:17; Jeremias 1:19) Kuhaang pananglitan ang kahimtang sa Axis nga mga gahom panahon sa Gubat sa Kalibotan II, nga gipangunhan sa Alemanya, Italya, ug Hapon. Pinaagi sa paggamit sa mapintas diktador nga mga gobyerno, ang Yawa ‘mibugwak gikan sa iyang baba sa usa ka suba’ sa paglutos, sa paglumos sa buluhatong pagsaksi nga gitultolan sa langitnon samag-babaye nga organisasyon sa Diyos. Apan milampos ba si Satanas niini? Wala gayod! Gimaneobra ni Jehova ang mga hitabo mao nga ang demokratikanhong mga nasod sa yuta naglamoy nianang bahaa. ‘Ang mga daotan giputol’ ug ang maunongong mga saksi ni Jehova karon sa kahibulongan nagamauswagon nianang mga yutaa.—Pinadayag 12:15, 16; Salmo 37:28, 29.
12 Dili pa dugay, nianang tulo ka nasod, ang Watch Tower Society kinahanglang magtukod ug magsangkap sa dagkong mga pabrika aron ipagawas ang laing matang sa baha—minilyon sa minilyong Bibliya ug may-kalabotang mga basahon sa Gingharian sa paglig-on sa mga Saksi ni Jehova ug sa ubang gigutom-sa-kamatuorang katawhan. Sa Alemanya, Italya, ug Hapon, karong adlawa kapin sa 300,000 ka magmamantala sa Gingharian ang nagahimo sa pagsaksi diha sa mga balay sa katawhan. Ug sa tibuok nga kanataran sa kalibotan si Jehova nagapanalangin sa kauswagan sa iyang nagahupot-sa-integridad nga katawhan!—Itandi ang Salmo 115:12-15.
13. (a) Unsay ginapakita diha sa Taho sa Tuig nga ang matinumanong mga saksi nagsunod sa 1984 nga teksto sa tuig? (b) Sa unsang paagi kini angay magadasig kanato?
13 Bisan pa niana, ang Yawa, kay nasayod nga hamubo na ang iyang panahon, nagapadayon sa pagpakiggubat batok niadtong “nagabantay sa mga sugo sa Diyos ug adunay buluhaton sa pagsaksi kang Jesus.” (Pinadayag 12:12, 17) Ang pagsupak ni Satanas ilabinang mapintason diha sa kayutaang nalista diha sa nag-ubang taho ingong “28 ka Ubang Nasod.” Ang mga saksi niining mga teritoryoha matinumanong nagsunod sa atong teksto sa tuig 1984, “nga nagapasundayag sa labaw pang kaisog sa pagpahayag sa pulong sa Diyos.” (Filipos 1:14) Ang pag-uswag sa ilang magmamantala nga 3.1 porsiento dalayegon kaayo. Kay nadasig sa ilang panig-ingnan, hinaot kitang tanan madasigong magpadayon sa pagtanyag “ngadto sa Diyos sa usa ka halad sa pagdayeg, nga mao, ang bunga sa mga ngabil nga nagahimog dayag nga pagpahayag sa iyang ngalan.”—Hebreohanon 13:15.
14. (a) Unsa ang mahimong mosangpot nga “usa ka pamatuod” alang kanato? (b) Bisan pa sa unsang mga kahimtang nga kita magpadayon sa pagsaksi nga maisogon, ug ngano?
14 Samtang mosamot pagkadaotan ang kahimtang sa kalibotan, ang uban kanato, sa walay duhaduha, pagalutoson, pagataralon sa hukmanan ug bilanggoon. Si Jesus naghisgot nianang mga kasinatiana apil sa mga butang “nga mahitabo gayod” una pa ang kataposan, ug midugang: “Kini mosangpot nga usa ka pamatuod alang kaninyo.” Nan, sa tanang kahimtang ang mga Saksi ni Jehova kinahanglang mopadayon sa pagsangyaw mahitungod sa Diyos ug kang Kristo. Daghan ang nagapadayon sa pagbuhat niini bisan pa sa mapait nga pagsupak sa pamilya, pagbiaybiay sa kaubang mga empliyado o mga kasaring, ug mga pakaulaw nga ipahamtang kanila diha sa ilang teritoryong sangyawanan. Nagasaksi ka bang maisogon bisan pa sa masulayong mga kahimtang? Nan usa ka niadtong giingnan ni Jesus: “Pinaagi sa pagkamainantoson sa inyong bahin inyong maangkon ang inyong mga kalag.”—Lucas 21:7, 9-19.
Kauswagan sa Gingharian!
15. Unsa ang pila ka talagsaong punto diha sa tsart niining panira?
15 “Kauswagan sa Gingharian”—nahiangay gayod nga tema sa atong distritong mga kombensiyon sa ting-init sa 1984! Kadto gayod mao ang atong labing maayong tuig nga may pag-uswag. Tan-awa lamang ang tsart niining panira! Kini gitigom gikan sa mga taho sa 95 ka sanga sa Watch Tower Society nga nagadumala sa buluhatong pagsaksi diha sa 203 ka kayutaan.
16. Hisgoti ang pila ka mahulagwayon, malipayong mga kapahayagan gikan sa tibuok yuta.
16 Dili motugot ang luna nga atong ipatik tanan ang gisulat nga mga kapahayagan sa kalipay nga among nadawat gikan sa mga sangang buhatan duyog sa ilang tinuig nga mga taho, apan ania ang pipila ka sampol gikan sa tibuok yuta:
Alaska: Ang tibuok balangay sa Metlakatla nanglantaw sa pagtukod sa 230 ka Saksi ni Jehova sa matahom nga Kingdom Hall sa 32 oras; kadto gidedikar sa Dominggo niadto mismong hinapos-sa-semana.
Honduras: ang 3,663 ka magmamantala mao ang labing kinatas-ang ihap sukad; kay ang tumatambong sa Memorial maoy 17,005 dako pa gayod ang buluhaton.
Brazil: Ang bag-ong kinatas-ang mga ihap miabot sa tayuktok nga may 160,927 ka magmamantala, uban ang 474,450 ka tawong mitambong sa Memorial.
Thailand: Buhi ang espiritu sa pagpayunir, nga may 22 porsiento sa tanang magmamantala ang diha sa maong pag-alagad niadtong Abril.
Papua New Guinea: Ang kinatas-ang ihap sa auxiliary payunir miuswag ug 91 porsiento; ang tumatambong sa Memorial miuswag ug kapin sa 1,000—ngadto sa 7,704.
Austria: Ang espiritu sa pagpayunir nagauswag, ug kami may lima ka sunodsunod kinatas-ang ihap nianang natara; kami may pito ka kinatas-ang ihap sa mga magmamantala, nga ang kinaulahian maoy 15,618.
Zambia: Among nakab-ot ang kinatas-ang ihap sa tanang panahon nga 58,925 ka magmamantala: ang tumatambong sa Memorial maoy 393,431—110,447 nga labaw kay sa miaging tuig.
17. (a) Sa unsang paagi ang natad sa pagpayunir nagamauswagon? (b) Unsang praktikal nga mga tumong ang gisugyot, ug alang kang kinsa? (c) Unsa ang bag-ong kinatas-ang ihap sa magmamantala, ug unsa tingali ang nakaamot niini?
17 Ang mga taho nagapadayag nga ang matinumanong mga misyonaryo ug payunir nagapadayon sa pagpanguna sa pagsangyaw ngadto sa mga teritoryo nga bag-o ug daan. Tinuod makapadasig nga makitang miuswag ang mga payunir. Ang bug-os nga gidaghanon sa auxiliary nga payunir sa Abril misulbong ngadto sa tanang-panahong kinatas-ang ihap nga 323,644 nga maoy 49-porsientong pag-uswag. Daghan kanila ang nakapribilehiyo sa pag-uswag ngadto sa pagkaregular payunir. Dugang pa, daghan sa atong batan-ong mga magmamantala sa Gingharian nagahimo sa payunir nga pag-alagad nga ilang tumong ug nagahimog praktikal nga pagpangandam alang niana sulod sa kataposan nilang katuigan sa hayskul. Ang katibuk-ang resulta makita diha sa talagsaong pag-uswag sa mga payunir. Kini nakatabang usab sa pag-ugmad sa espiritu sa kakugi diha sa atong mga kongregasyon, nga nakaamot, sa walay duhaduha, sa bag-ong tibuok-kalibotang kinatas-ang ihap nga 2,842,531 ka magmamantala, usa ka 7.2 porsientong pag-uswag kay sa 1983 kinatas-ang ihap. Dili ka ba malipay nga ikaw nakaambit sa maong pag-uswag?
18. (a) Unsang dagkong mga pag-uswag ang anaa sa 1984? (b) Ang taho sa Memorial nagapaila sa unsang potensiyal sa kauswagan, ug sa unsang paagi ang atong mga magbabasa makasanong?
18 Ang malipayong pagsaksi nga gihimo sa 1984 gibanaag usab diha sa miuswag nga pagpahimutang sa mga magasin ug sa ubang basahon, sa kinalabwang gidaghanon sa oras sa pagsangyaw nga gitaho, sa talagsaong pag-uswag sa mga subliduaw sa mga tawong interesado ug sa mga pagtuon sa Bibliya sa balay nga gidumala uban kanila. Kita nagapanglantaw gayod sa dugang mga bunga gikan niining makugihong pag-alagad! Ug adunay dakong potensiyal sa mas dako pang pagpanigom! Kini gipadayag sa talagsaong tumatambong panahon sa Panihapon sa Ginoo sa miaging Abril 15. Sa mga kongregasyon sa mga Saksi ni Jehova sa tibuok yuta, ang katibuk-ang 7,416,974 mitambong, nga 9,081 niana nagpaila nga sila sakop sa “gamay nga panon” sa Ginoo pinaagi sa pag-ambit sa tinapay ug sa bino. Hinaot ang tanan namong magbabasa magpadayon sa pagtubo sa espirituwal, aron hatagag dapit ang pagpakig-ambit sa dakong pamatuod ug sa pagpanigom nga anaa pa sa unahan.—Itandi ang Efeso 4:15; Filipos 1:9-11.
19. Tungod sa unsa kita makapasalamat kang Jehova, ug unsa ang atong pag-ampo mahitungod sa umaabot?
19 Tinuod, kita makasubli sa mga pulong ni Moises sa pag-ingon mahitungod sa mga Saksi ni Jehova, ang modernong-adlawng “katawhan alang sa iyang ngalan”: “Si Jehova nga inyong Diyos mipadaghan kaninyo, ug ania karon kamo sama sa mga bituon sa mga langit sa pagkadaghan.” (Deuteronomio 1:10) Maoy among pag-ampo nga ang atong Soberanong Ginoo, si Jehova, mopadayon sa pagpausbaw sa pagsangyaw sa Gingharian ug pagdugang sa kauswagan!
Unsay Imong Ikasulti?
◻ Nganong ang mga Saksi ni Jehova mahimong ‘mga saksi ni Jesus’ usab?
◻ Unsang dakong pagsaksi ang nahatag sa 1984?
◻ Unsay nagapakitang gipanalanginan ni Jehova ang matinumanong mga saksi?
◻ Sa unsang mga paagi ang 1984 nga taho magdasig kanato?
[Kahon sa panid 26]
‘Mangayaon, Malipayon, Mapasalamaton’
Gikan sa usa ka yuta diin ang buluhaton sa mga Saksi ni Jehova gidid-an sulod na sa kapin sa 40 anyos miabot kining tahoa: “Ang kinadak-ang kangaya nga [among] naagoman mao ang miuswag nga pagsangyaw ug pagpanudlo sa kanataran. Daghan ang nag-alagad nga auxiliary payunir. Usa kanila nagpahayag sa iyang mga gibati ning mga pulonga: ‘Puno ako sa kangaya, kasadya ug kalipay, ug uban ang dulot nga katagbawan.’ Ang laing auxiliary payunir miingon: ‘Ako malipayon kaayong akong ginabuhat ang butang makapahimuot kang Jehova. Nakasugod akog lima ka bag-ong pagtuon sa Bibliya sa balay.’ Ang lain pa midugang: ‘Mapasalamaton ako kang Jehova nga mitabang kanako sa pag-ugmad sa gugma nga gikinahanglan sa pagtabang sa ubang tawo.’ Sa usa ka kongregasyon nga may 61 ka magmamantala 38 ang nag-alagad nga auxiliary payunir sa usa ka bulan. Ingong resulta, 66 ka bag-ong pagtuon sa Bibliya ang nasugdan.”
[Chart sa panid 20-23]
1984 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN
(Tingnan ang bound volume)
[Chart sa panid 25]
Pagtandi sa Taho sa Kalibotan
1984 1983 Pag-uswag
Mga Sanga sa Watch Tower 95 94
Mga Yutang Nagtaho 203 205
Kinatas-ang Ihap sa Magmamantala 2,842,531 2,652,323 7.2%
Aberids nga Magmamantala 2,680,274 2,501,722 7.1%
Aberids nga Payunir 258,936 206,098 25.6%
Auxiliary Payunir (Abril) 323,644 217,860 48.6
Total nga Oras sa Pagsangyaw 505,588,037 436,720,99l 15.8
Napahimutang nga Literatura 36,639,925 36,039,400 1.7
Napahimutang nga Suskrisyon 1,812,221 1,756,153 3.2%
Napahimutang nga Magasin 287,358,064 258,698,636 11.1%
Subliduaw 195,819,093 174,687,309 12.1
Ab. Pagtuon sa Bibliya 2,047,113 1,797,112 13.9
Tumatambong sa Memorial 7,416,974 6,767,707 9.6%
Umalambit sa Memorial 9,081 9,292