Ang Tungang Silangan—Dapit sa Armageddon?
“ARMAGEDDON”—unsay kahulogan niining ngalana sa Bibliya? Ginapailaila sa matag panahon sa makahuloganong hapin, ang serye sa impormatibong mga artikulo niining temaha gihisgotan sa upat ka isyu sa Ang Bantayanang Torre sa Hunyo ug Hulyo 1985. Gilaoman nga kining Kasulatanhong panaghisgot molipay kaninyo uban sa kahibalo kon unsa gayod ang tinuod nga ARMAGEDDON.
“SAMTANG nagdagan ang kalibotan padulong sa kataposang takna sa pakigbisog, ang importanteng siyudad nga tan-awon dili ang New York, Moscow, Paris, Peking, o Cairo. Ang siyudad nga tan-awon mao ang Jerusalem!” Matud pa ni John F. ug John E. Walvoord diha sa ilang librong Armageddon, Oil and the Middle East Crisis.
Ginerbiyos ang kadaghanan nga nagpanan-aw sa Jerusalem ug sa magubot nga dapit nga nahimutangan niini. Miingon ang Times sa London, “Ang Tungang Silangan nahimong mas makalilisang.” Nahadlok ang uban nga ang umaabot US-Sobyet nga komprontasyon didto dili na unya malikayan. Sa pagka Enero misamot pagkadaot ang relasyon tali sa magkaatbang nga dagkong mga gahom nga tungod niini giirog sa Bulletin of the Atomic Scientist ang iladong “orasan sa kalaglagan” (simbolo kon unsa ka duola ang kalibotan sa nukleyar nga kalaglagan) ngadto sa tres minutos sa dili pa magtungang gabii. Ang Bulletin mipahayag: “Busa nagbarog kita diha sa makatalagmanong panahon, sa ngilit sa yugto sa komprontasyon, usa ka yugto sa panahon diin ang pagkatinuod sa puwersa makapawalay kahulogan sa uban pang porma sa pahayag taliwala sa dagkong mga gahom. Makalilisang kini nga palaabuton.”
Hinunoa, ang nagauswag nga gidaghanon sa mga magwawaling pundamentalista, mga teologo, ug mga ebanghelista sa TV, mibayaw niini nga mga hitabo. Ang misamot nga tensiyon sa Tungang Silangan daw milampos sa paghatag kalig-onan sa ilang makapukawng mga panagna nga hapit nang mahitabo nianang lugara ang Armageddon! Ug pinaagi sa pagpalanog sa alarma diha sa mga libro, mga pakigpulong, ug sa mga produksyon sa telebisyon, nakatigom sila ug daghang sumusunod.
Giawayan niining mga komentarista ang eksaktong pagkasunodsunod sa mga hitabo. Apan maingon-ingon niini ang malarawanong ‘talan-awon sa Armageddon’: Ang pagsugod sa ‘pag-ihap sa kalaglagan,’ sila miingon, sa natukod ang Nasod sa Israel. Busa ilang gibati nga ang gitawag nga himaya haduol na. Sumala pa kanila, hapit nang mawala sa kalit dinhi sa yuta ang tinuod nga mga Kristohanon—pagasakgawon pa langit. Human sa pito ka tuig nga “kasakitan,” nanagna ang daghang ebanghelisador nga ang nasod sa Israel makabig sa Kristiyanidad. Hinunoa, ang kadaghanan sa tawhanong rasa, ginaingon nga mailalom sa lamat sa karismatikong diktador (ang “Anti-kristo”) nga maoy mangulo sa kaaniban sa napulo ka nasod. Ilang gituohan, nga ang Israel, makig-anib kaniya. Apan ang alyadong mga nasod sa Arabe ug ang uban nga pangulohan sa Rusya, mohimog kalit nga pag-atake sa Israel. Santaon sa Diyos sa milagrosong paagi kining maong pagsulong, matud pa sa mga pundamentalista. Hinuon, adunay mosunod, nga laing pag-atake gikan sa “Anti-kristo,” nga maoy mopukaw ug bug-os nga gubat sa Tungang Silangan—ang Armageddon.
Tingali katuohan kining pamation alang sa uban. Gawas pa, tinuod nga nagtagna ang Bibliya nga pagatigomon ang nasod alang sa gubat diha sa “Armageddon.” (Pinadayag 16:14-16, King James Version) Apan tinuod bang gipakita sa Bibliya nga kining hitabo mahitabo sa Tungang Silangan? Ug unsa may kalabotan sa lokasyon niining gubata?