Armageddon, ang Tungang Silangan, ug ang Bibliya

“ANG dugokan sa tibuok matagnaong pahayag,” miingon ang awtor si Hal Lindsey, “mao ang Nasod sa Israel.” (The 1980’s: Countdown to Armageddon) Busa ang tulokibon sa mga pundamentalista nga ‘talan-awon sa Armageddon,’ mao ang ilang pagtuo nga ang Diyos adunay espesyal nga pakiglabot sa Israel. Sila nagtuo, nga ang Diyos, mangilabot kon laglagon siya sa iyang mga kaaway.

Apan, ang Bibliya, nagpakita nga ang Hudiyohanong nasod nawad-an sa pag-uyon ug sa panalipod sa Diyos sa dihang ilang gisalikway ang iyang Anak, si Jesu-Kristo. (Buhat 3:13, 14, 19) Sa matin-aw gisultihan sila ni Jesus: “Ang gingharian sa Diyos pagakuhaon gikan kaninyo ug kini igahatag ngadto sa usa ka nasod nga nagapamunga sa mga bunga niini.”—Mateo 21:43.

Bug-os nga Gisalikway?

Ang mga teologong si John F. ug John E. Walvoord (gikutlo ganiha) mitubag sa pag-ingon: “Tin-awng gipadayag ni Apostol Pablo nga ang mga saad sa Daang Tugon alang sa Israel pagatumanon pa. Si Pablo misulat, ‘Busa mangutana ako, gisalikway ba sa Diyos ang iyang katawhan? Wala gayod!’ (Roma 11:1; NIV.)” Apan, wala nila tiwasa pagkutlo ang nahibilin nianang bersikuloha: “Kay ako usab Israelinhon, sa kaliwat ni Abraham, sakop sa banay ni Benjamin.” Unsay buot ipasabot ni Pablo niini?

Dili mahitabo nga mituo si Pablo ang mga Israelitas ingong usa ka nasod nakabaton gihapon sa espesyal nga dapit diha sa Diyos, kay gipahayag sa apostol ang “dakong kasubo ug walay paghunong nga kasakit diha sa [iyang] kasingkasing” tungod sa ilang pagkadili-masanongon sa pagkamaayo sa Diyos. (Roma 9:2-5) Diha sa Roma 9:6 si Pablo midugang: “Apan, dili hinuon nga daw napakyas ang pulong sa Diyos [ngadto kang Abraham]. Kay dili ang tanan nga kaliwat sa [natural] nga Israel tinuod nga ‘Israel.’” Matikdi ang gipamulong ni Pablo: tungod kay gisalikway sa mga Hudiyo si Kristo, ang Diyos wala na moila kanila nga mao ang Israel! Ang dinihogang kongregasyon sa mga sumusunod ni Kristo Jesus mao na karon ang tinuod nga “Israel,” ang instrumento nga pinaagi niini panalanginan sa Diyos ang tanang katawhan.—1 Pedro 2:9; Galacia 3:29; 6:16; Genesis 22:18.

Hinunoa, ang Diyos, wala magsalikway sa Hudiyohanong katawhan ingong mga indibiduwal, kay si Pablo miingon: “Kay ako usa usab ka Israelinhon.” Oo, ang mga indibiduwal sulod sa Hudiyohanong nasod, sama kang Pablo, mahimong bahin sa espirituwal nga Israel kon ilang dawaton si Kristo. Diyutay lamang, nga “nanghibilin,” ang mipili sa pagdawat.—Roma 11:1, 5.

Umaabot nga Pagkakabig?

Apan, ang uban, naglaom ug dramatikong kausaban sa kasingkasing sa tanang natural nga mga Hudiyo. “Ang dakong kasakitan, nga maoy mosunod sa himaya sa Iglesya,” mipatuo ang usa ka magsusulat nga pundamentalista, “maoy paagi sa pagkabig sa Israel [ngadto sa Kristiyanidad].” Makaikag, si Pablo miingon diha sa Roma 11:25, 26: “Ang pagkahabol sa mga salabotan nahitabo sa usa ka bahin sa Israel hangtod nga ang bug-os nga gidaghanon sa mga tawo sa kanasoran mahisulod, ug niini nga paagi ang tanang Israel mamaluwas.”

Nagtana ba si Pablo ug umaabot nga pagkabig sa masa sa mga Hudiyo? Sa unsang paagi maingon niana, sanglit siya mismo nagpadayag nga diyutayng nanghibilin lamang sa mga Hudiyo ang modawat kang Kristo? (Roma 11:5) Tinuod, nag-ingon si Pablo nga ang mga Hudiyo makasinati ug espirituwal nga “pagkahabol sa mga salabotan” hangtod nga “ang bug-os gidaghanon” sa mga Hentil mahisulod sa Kristohanong kongregasyon.a Apan, gipakita sa Gregong eskolar si Richard Lenski nga dinhi ang pulong “hangtod” wala magpasabot nga may mahitabong pagkabig sa ulahi. (Itandi ang paggamit sa “hangtod” diha sa Buhat 7:17, 18 ug sa Pinadayag 2:25.) Si Pablo sa pagkatinuod nag-ingon nga ang mga salabotan sa natural nga mga Hudiyo magpabilin nga ‘mahabol’ hangtod sa kataposan. Apan, ang Diyos, maalamong nagtigom sa “bug-os nga gidaghanon” sa espirituwal nga Israel (144,000) pinaagi sa pagpasulod sa magtutuong mga Hentil ngadto sa Kristohanong kongregasyon. “Ug niini nga paagi [dili pinaagi sa kausaban sa kasingkasing sa Hudiyohanong nasod] ang tanang [espirituwal] nga Israel mamaluwas.”

Makabaton sa Yutang Saad—sa “Walay Kataposan”?

Nan, unsa, ang ikasulti bahin sa yuta nga nahimutangan sa Nasod sa Israel? Ang Diyos ba adunay usa ka tagsaong kaikag diha niini? Daghan ang nagtuo niini, sama sa teologong Protestante si William Hurst. Si Hurst miingon: “Walay parsela nga yuta sa nawong sa yuta nga labing gipangagpas o kanunayng gihatagan ug pagtagad sa katilingban sa mga nasod gawas sa yuta sa mga Hudiyo.” Mikutlo sa Genesis 13:14, 15, gipahinumdoman kita niya nga nagsaad ang Diyos nga iyang ihatag kining yutaa ngadto sa binhi ni Abraham sa “walay kataposan.”—King James Version.

Busa obligado ba si Jehova nga Diyos sa pagpanalipod sa yuta sa Israel batok sa pag-atake? Kon mao, ang Tungang Silangan nga “Armageddon” haduol na. Hinunoa, nagpahayag lamang ang Diyos kang Abraham nga ang iyang kaliwat makapuyo ning yutaa, dili sa walay kataposan, kondili sa usa ka “walay takda” nga yugto sa panahon.b (Genesis 13:14, 15) Tungod sa pagsalikway kang Jesu-Kristo, nawad-an sila sa tanan nilang pangangkon niining yutaa—ug sa panalipod sa Diyos.

Armageddon—Diin?

Diha sa Pinadayag 16:14, 16 gipakita sa Bibliya nga ang dinasig-sa-yawa nga propaganda maoy moagak sa mga lider sa kalibotan “ngadto sa gubat sa dakong adlaw sa Diyos nga Makagagahom.” Kini midugang: “Ug ilang tigomon sila ngadto sa dapit nga gitawag sa Hebreohanon nga Har–Magedon.” Kini ba nagpasabot ug kataposang gubat sa Tungang Silangan? Dili, kay walay lugar sa yuta nga gitawag “Har–Magedon” (sa literal, “Bukid sa Megiddo”) ang naglungtad. Sa panahon sa Bibliya, dihay Tungang Silangan nga siyudad nga gitawag Megiddo. Nahimutang kini sa kapatagan nga gipakita sa hapin niini nga gula. Daghang dagkong mga gubat ang nahitabo duol sa Megiddo. Apan kaniadto, ug karon, walay bukid didto. Busa, simboliko ang lokasyon sa “Har–Magedon,” o “Armageddon.” Simbolo sa unsa?

Ang tagna ni Ezekiel nagpakita nga masugdan ang Armageddon tungod sa pag-atake sa nagkalainlaing kasundalohan batok sa “Israel.” Ang mga tig-atake pangunahan sa ‘Gog sa Magog,’ kansang mga kasundalohan moabot gikan sa “kinatumyang bahin sa amihanan.” Kinsa kining maong “Gog”? Ang pundamentalistang teologong si Hal Lindsey masaligong mipahayag (sama sa uban): “Adunay usa lamang ka nasod nga anaa sa ‘halayong amihanan’ sa Israel—ang U.S.S.R.” Maingon man ang iyang teoriya mao nga kadtong sakop sa “panon sa kasundalohan” sa Gog (gitawag Meshech, Tubal, Persia, Ethiopia, Put, Gomer, ug Togarmah sa Bibliya) kaabin sa Sobyet ilabina ang kanasoran sa Arabia.—Ezekiel 38:1-9, 15.

Hinunoa, ang mga nasod nga gilista nga kaabin sa Gog, wala hiili sa eksena sa kalibotan sa mga adlaw ni Ezekiel. Busa mahitabo ang katumanan sa tagna sa “kataposang bahin sa mga tuig,” diin wala na sa eksena sa yuta ang karaang mga kaaway sa Israel. (Ezekiel 38:8) Busa, ang wala hiilhi ug halayo nga “yuta [ni Gog] sa Magog” dili mahitabo nga naglarawan sa ilado ug dili gikan sa halayo nga Unyon Sobyet.

Nan, kinsa, kanang nahimutang sa ‘halayo’ nga yuta ug naghambin ug mapintas nga kasuko batok sa katawhan sa Diyos? Diha sa Pinadayag 12:7-9, 17, ang Bibliya nagtubag: “Unya nahitabo ang gubat didto sa langit: si Miguel ug ang iyang mga manulonda nakiggubat batok sa dragon . . . ug gitambog ang dakong dragon, ang serpente nga karaan, ang ginganlag Yawa ug Satanas.” Unsay gihimo ni Satanas sa gitambog siya gikan sa langit ngadto sa ubos espirituhanong gingharian? Ang Bibliya nag-ingon: “Ug nasuko ang dragon sa babaye [langitnong organisasyon sa Diyos], ug miadto siya aron sa pagpakiggubat batok sa mga nanghibilin sa iyang binhi, sa nanagbantay sa mga sugo sa Diyos ug nagahupot sa mga panghimatuod mahitungod kang Jesus.”

Busa, si Satanas mao ang “Gog.” Sa daghan nang kasiglohan, si Satanas ug ang panon sa iyang mga demonyo mihimo niini nga pakiggubat batok sa nanghibilin sa espirituwal nga Israel—ang dinihogang Kristohanong kongregasyon. (Galacia 6:16) Kining maong mga Kristohanon kaylap sa tibuok yuta; wala sila mahimutang sa usa ka sentral nga dapit nga masulong sa kaaniban sa kasundalohan sa Tungang Silangan. Apan sumala sa gitagna ni Ezekiel, sila “nanagpuyo sa kasegurohan” ilalom sa panalipod sa Diyos. (Ezekiel 38:11) Ang presenteng adlaw natural nga Israel, nga gilibotan sa kaawayng mga silingan ug nag-antos sa malisod nga mga problema sa politikal ug sa sosyal, sa pagkatinuod wala gayod “magpuyo sa kasegurohan.”

Apan, ang Bibliya, nagpakita nga ang talan-awon sa kalibotan mahiagom ug kalit nga kausaban. Ang “Babilonyang Bantogan,” ang kalibotanong empiryo sa bakak nga relihiyon, mag-antos sa kalit nga kalaglagan. (Pinadayag, kapitulo 18) Duyog sa kalumpagan sa bakak nga relihiyon, ang nanghibiling tinuod nga mga Kristohanon makitang daw dili madaog, ug si Satanas, o “Gog,” dili makapugong sa pagsulay sa paglaglag kanila. Iyang tinoon nga ilalom sa satanasnong impluwensiya “ang mga hari sa tibuok pinuy-anang yuta” tigomon “ngadto sa gubat sa dakong adlaw sa Diyos nga Makagagahom” sa Har–Magedon.—Ezekiel 38:12-16; Pinadayag 16:14, 16.

Busa, ang “Har–Magedon,” dili usa ka gamayng dapit diha sa Tungang Silangan. Hinunoa, kini maoy usa ka situwasyon sa kalibotan. Magkahiusa ang tibuok nga kalibotan sa pagbatok kang Jehova nga Diyos ug sa iyang mga saksi. (Isaias 43:10-12) Kini maoy mapintas nga pag-atake ni Satanas batok sa tinuod nga mga Kristohanon—dili gubat tali sa kanasoran diha sa dapit sa Tungang Silangan—nga makapukaw Diyos sa pagpakiggubat sa pagpanalipod sa Iyang katawhan!—Ezekiel 38:18-23; Zacarias 2:8.

Busa labaw pa ang ginahimo sa tinuod nga mga Kristohanon karon kay sa lumalabayng pagtan-aw sa Tungang Silangan. Ang ilang pangunang pagtagad mao ang pag-agak sa mga tawo sa tinuod nga gipahayag sa Pulong sa Diyos bahin niining umaabot nga gubat. Nakabaton ang mga Saksi ni Jehova ug dungog sa tibuok nga kalibotan nga maisogong nagdala niining balita ngadto sa mga balay sa katawhan. Apan, tingali mahibulong ka kon ngano nga ang Diyos sa gugma mopakanaog ug ingon niini nga matang sa gubat. Aduna bay posibilidad nga makalabang buhi niining matanga sa gubat? Ang among sunod nga duha ka isyu sa Ang Bantayanang Torre mopatin-aw niining mga pangutanaha.

[Mga footnote]

[Hulagway sa panid 5]

Ang mga hitabo ba karon sa Tungang Silangan maoy ilhanan sa Armageddon?

[Hulagway sa panid 6]

Ang Jerusalem ba mao ang yawi sa mga hitabo nga motultol sa Armageddon?