Buhi ang Pulong sa Diyos
Siya Adunay Pagtuo ug Kaisog—Ikaw Aduna Ba?
KINING batang babayeng Israelinhon gibihag sa grupo sa manunulong nga mga Siryanhon. Sa ulahi gidala siya ngadto sa asawa ni Naaman, ang hepe sa kasundalohan sa Sirya. Niini nga teritoryo sa kaaway, nga halayo sa iyang puloy-anan sa Israel, nahimo siyang sulugoon sa asawa ni Naaman.
Maisog si Naaman, kusgan nga tawo ug tinahod sa tanan. Apan, kining dakong hepe sa militar gitakboyan sa makalilisang nga sakit nga sanla, nga magkutkut sa mga parte sa lawas sa tawo. Balik sa Israel, sa wala pa siya madakpi, nakadungog ang gamayng Israelinhon sa mga milagro nga gihimo ni Jehova nga Diyos pinaagi sa iyang manalagnang si Eliseo, lakip ngani sa pagbalik sa kinabuhi sa patayng anak nga lalaki sa babaye. (2 Hari 4:8-37) Dili sama sa kadaghanan, ang gamayng bata adunay bug-os nga pagtuo sa mga milagro sa Diyos, ug siya may kaisog sa pagsulti bahin kanila.
Busa usa ka adlaw niana, sumala sa imong makita, gisultihan sa batang babaye ang asawa ni Naaman: ‘Kon moadto lang unta ang akong agalon sa Samaria, ang manalagna ni Jehova didto makaayo sa iyang sanla.’ Buweno, sa kataposan, dihay miadto kang Naaman ug mitaho sa gisulti sa batang Israelinhon. Hayan nakadayeg si Naaman niini!
Sumala sa gilarawan dinhi, atong mahanduraw si Naaman nga miduol sa bata ug misulti ug maingon-ingon niini: ‘Ako ang hepe sa kasundalohan sa Sirya. Apan bisan pa niana nangaresgo ka sa pag-agda kanako sa pag-adto sa imong nasod, ngadto sa manalagna sa imong Diyos, aron ako maayo sa akong sanla. Inday, ikaw adunay dakong pagtuo ug dili-mahakugong kaisog, nagpameligro sa akong kasuko sa pagpakita kanako niini nga kalulot. Mangayo ako ug permiso sa hari sa Sirya sa pag-adto sa Israel.’—2 Hari 5:1-5.
Makita ba nimo ang imong kaugalingon sa kahimtang sama niining batang Israelinhon? Ikaw ba nahibalo sa kaayo ni Jehova ug sa iyang katuyoan sa paglalang ug bag-ong sistema sa mga butang nga niini ang tanang tawo makabatog maayong panglawas ug mahimong mabuhi sa walay kataposan? (2 Pedro 3:13; Pinadayag 21:3, 4) Ngani, kadaghanan sa mga tawo karon walay kasayoran bahin niining mga butanga!
Busa, ingong batan-on, tingali imong makita ang imong kaugalingon nga mahimutang sa usa ka situwasyon sama nianang sa batang babaye nga gilarawan dinhi. Ang magtutudlo ug ubang mga estudyante niini nga klase wala mahibalo mahitungod kang Jehova. Sa ingon niini nga kahimtang, kon ikaw adunay higayon, may pagtuo ug kaisog ka ba sa pagsulti ug sa pagtabang sa uban sa pagtudlo kon asa sila makadawat ug espirituwal nga pagkaayo?
Apan unsay nahitabo kang Naaman? Naayo ba siya? Lain na usab nga sugilanon kana, ug atong tagdon unya kana sa ulahi.