Ang Kagamhanan nga Makahimo sa Dili Mahimo sa Tawo
“Umari, kamo nga katawhan, ug tan-awa ang mga buhat sa Diyos. Ang iyang pagtagad sa mga anak sa tawo katingalahan kaayo.”—SALMO 66:5.
1, 2. (a) Sa unsang paagi gipasundayag sa makitang uniberso ang katingalahang gahom sa Maglalalang? (b) Nganong tuohan nato ang gipamulong sa matagnaong Pulong ni Jehova bahin sa atong panahon?
SI JEHOVA may gahom sa paghimo sa dili mahimo sa tawo. Pananglitan: Ang mga tawo nahangangha sa gahom sa bombang nukleyar; apan ang gahom niini gamay ra kaayo kon itandi sa hilabihan ka dakong gahom nga makita sa atong adlaw. Apan ang atong adlaw maoy usa lamang sa 200 ka bilyong mga bitoon sa atong galaksiyang Milky Way. Gibanabana sa mga astronomo nga sa tibuok nga uniberso tingali adunay mga 100 ka bilyong mga galaksiya, ang matag usa adunay bilyonbilyong mga bitoon. Unsa ka dakong gahom ang gikinahanglan sa paglalang niining tanan! (Isaias 40:26) Kining katingalahang gahom sa Maglalalang nakapahimo sa gahom sa tawo nga wala ra sa kumingking.—Isaias 40:15,
2 Busa walay mausa ang angay magduhaduha nga si Jehova may katakos o gahom sa pagtuman sa iyang gipamulong. (Isaias 46:9, 10; 55:11) Ug atong tuohan siya kon ang iyang matagnaong pulong mopahayag kanato nga haduol na kita sa kataposan sa tinakdang panahon nga iyang gitugot sa katawhan sa paglakaw sa ilang kaugalingong paagi. Ang kasaysayan nagpakita nga ang nahimo sa tawo diha sa tawhanong kinabuhi ug sa kinabuhi sa mga mananap, maingon man usab sa yuta mismo, maoy usa ka pasipala, usa ka lama sa uniberso sa Diyos. Busa, makataronganong si Jehova sa pagpala niining maong lama sa bug-os.—Oseas 4:1-3; Judas 14, 15.
3. Unsay gipahayag sa tagna sa Bibliya bahin sa haduol nga umaabot?
3 Ang imong nakita nga nagakahitabo sa kalibotan karon maoy tin-aw nga ebidensiya nga kining maong sistema sa mga butang sa pagkatinuod anaa na sa iyang kataposang bahin sa “kaulahiang mga adlaw” nga gitagna diha sa 2 Timoteo kapitulo 3. Sa dili madugay dugmokon ni Jehova kining maong sistema sa pagkalungtad ug dili na palihokon niini si Satanas nga Yawa. Dayon sundan kana sa usa ka bug-os bag-ong sistema sa mga butang sa yuta, nga mandoan sa langitnong kagamhanan nga maoy gitudlo ni Jesus sa iyang mga sumusunod sa pag-ampo sa miingon siya: “Paanhia ang imong gingharian. Matuman ang imong kabubut-on, sa langit, maingon man usab sa yuta.”—Mateo 6:10; Daniel 2:44; Roma 16:20.
Ang Prinsipyo sa Pagpalit ug Balik
4. Sa unsang paagi gigamit ni Jehova ang prinsipyo sa pagpalit ug balik sa karaang Israel?
4 Ang tawhanong mga kagamhanan dili makawala sa sala, sakit, ug kamatayon. Apan, ang kagamhanan sa Diyos magabuhat sa dili mahimo sa tawo. Atong dugang masabtan kon sa unsang paagi mahitabo kana pinaagi sa pagpaniid sa pakiglabot ni Jehova sa iyang katawhan sa karaang Israel. Balik niadto, gigamit ni Jehova ang prinsipyo sa pagpalit ug balik, o lukat. Pananglitan, kon mapobre ang usa ka Israelinhon, iyang ikabaligya ang iyang kaugalingon ingong ulipon ngadto sa usa nga dili-Israelinhon. Apan mahimong malukat siya sa usa ka suod nga kabanay kon may ikaabot siya sa prisyo sa pagpalit.—Levitico 25:47-49.
5, 6. (a) Sa unsang paagi milampos ang prinsipyo sa pagpalit ug balik sa pagpahigawas sa katawhan gikan sa napanunod nga kasal-anan? (b) Ang tanan ba sa awtomatiko makagawas gikan sa kasal-anan?
5 Sa sama nga paagi, mitagana ang Diyos sa pagpalit ug balik sa katawhan gikan sa kaulipnan sa sala. Ang bili kinahanglang katumbas nianang nawala. (Deuteronomio 19:21) Giwala ni Adan ang hingpit, walay kataposang kinabuhi. Sanglit walay makasasalang mga tawo ang nakabaton sa katumbas niana nga bili, sila dili mahimong “makalukat bisan sa usa ka igsoon.” (Salmo 49:7) Apan, gitagna sa Bibliya ang pag-abot sa usa nga makahimo niini. Kanang usa mao si Jesu-Kristo. Gipadayag nga si Jesus adunay dili-tawhanong paglungtad sa langit. Apan ang iyang kinabuhi gibalhin ngadto sa tagoangkan ni Maria sa gahom ni Jehova. Niining paagiha nahimugso siya ingon nga tawhanon. Sanglit Diyos man ang iyang Amahan, wala siya makapanunod sa pagkasad-an nga nakadaot sa tanang katawhan.—Mateo 1:18-21; Juan 1:1,14; 1 Pedro 2:22.
6 Busa, si Jesus lamang ang nakabaton sa usa ka butang nga tugbang sa bili sa usa ka hingpit tawhanong kinabuhi—laing hingpit tawhanong kinabuhi. Apan dili sama sa masinupakong Adan, si Jesus nagpabiling matinumanon sa Diyos. Ug sa dihang iyang gitanyag ang iyang kinabuhi alang sa tawhanong banay, gidawat kini ni Jehova ingong katumbas nga bili sa pagpalit ug balik. (Galacia 1:4) Apan nagkahulogan ba kini nga ang tanan awtomatiko nga mahigawas sa pagkaulipon sa sala ug makabaton ug kahingpitan ilalom sa pagmando sa Gingharian? Dili, kay ang Juan 3:16 nag-ingon: “Kay gihigugma sa Diyos ang kalibotan nga iyang gihatag ang iyang bugtong Anak, aron kadtong tanan nga nagatuman sa ilang pagtuo kaniya dili malaglag kondili makabaton ug kinabuhing walay kataposan.” Diha lamang kon atong dawaton ang tagana sa pagpalit ug balik ug kinahanglang adunay himoon bahin niana nga atong maeksperyensiyahan ang kapasig-ulian sa atong mga lawas ug hunahuna sa kahingpitan diha sa Paraiso.—Pinadayag 21:4.
Edukasyon sa Bag-ong Sistema
7, 8. Unsa ang potensiyal nga umaabot nga pagkakat-on ang mahimo sa tawhanong utok?
7 Ang hunahuna adunay dakong potensiyal sa pagkakat-on, bisan sa dili-hingpit nga kahimtang sa tawo. Apan gamay ra gayod kaayong bahin kini kon itandi sa makat-onan pa sa Bag-ong Kahikayan, diin didto dili na mababagan sa sala ang pag-obra niini. Diha sa The Brain Book ang awtor miingon: “Sulod sa atong ulo nahimutang ang labing komplikado nga mga sistema nga nailhan sukad sa uniberso. Kini adunay gahom ug katakos nga sobra pa sa bisan unsang hinimo sa tawo nga kompiyoter.” Siya midugang: “Kanunay nga giingon nga 10 porsiento lamang sa atong potensiyal sa utok ang nagamit. Kini, karon nakita, nga sobra ra kaayo nga pagbanabana. Wala pa gani diay nato magamit ang 1 porsiento—labing menos mga 0.1 porsiento lamang.”
8 Handurawa lang kon unsay mahimo sa tawhanong utok kon maabot na niini ang iyang bug-os nga potensiyal diha sa Bag-ong Kahikayan. Hunahunaa lang ang katingad-anang mga butang nga gilalang ni Jehova niining yutaa nga bahin kanila makakat-on kita, sama sa mga hayop niini, mga isda, ug mga tanom. Hunahunaa, usab, ang pagkakat-on bahin sa katingalahang uniberso uban sa bilyonbilyong mga galaksiya niini. Palandonga ang mga katakos nga atong mahanas sama sa arte, musika, mga pagbuhatbuhat, ug daghan pang ubang butang.
9. Unsang matang sa edukasyon ang mopatunghag dagkong mga kaayohan diha sa Bag-ong Kahikayan?
9 Adunay laing matang sa edukasyon sa Bag-ong Kahikayan nga mohatag dakong kaayohan sa tanan. Si Jesus miingon: “Silang tanan pagatudloan ni Jehova.” (Juan 6:45) Kini mao ang labing taas nga matang sa edukasyon. Ug mabatonan kining tanan sa mga ginsakopan sa Gingharian sa Diyos, lakip niadtong makalabang buhi sa kataposan niining sistema sa mga butang. (Pinadayag 7:9, 14) Ang ubang mga ginsakopan sa Gingharian gipadayag diha sa Juan 5:28 ug 29, diin miingon si Jesus: “Ang takna nagasingabot na nga ang tanan nga anaa sa handumanang mga lubnganan managpakadungog sa iyang tingog ug managpanggula.” Kining pagkabanhaw sa binilyong mga tawong patay—imposible nga mahimo sa tawo—nagkahulogan nga adunay dakong edukasyonal nga buluhaton nga himoon alang kanila.
10. Sa unsang paagi mapadayon ang edukasyon diha sa Bag-ong Kahikayan?
10 Karon adunay daghang nagkasumpaking mga sistema sa edukasyon. Apan diha sa Bag-ong Kahikayan, ang langitnong kagamhanan sa Diyos motaganag usa ka tibuok-yuta nga sistema sa edukasyon sa pagtudlo sa mga tawo sa kamatuoran bahin kang Jehova sa hiniusang paagi. Ang bahin niini mao ang pagtudlo sa mga tawo bahin sa tukmang tawhanong relasyon. Walay pagtudlo bahin sa garbo sa rasa, nasyonalidad, o sosyal nga kahimtang. Hinunoa, ang mga pumuluyo sa yuta makakat-on sa paghigugma sa usag usa, sa pagtahod sa dignidad sa usa. Ang maong edukasyon moresulta ug maayong pagbag-o sa mga personalidad nga magpasibaw sa superyor nga mga hiyas ni Jehova.—Buhat 10:34, 35; Colosas 3:9-12.
11, 12. Sa unsang paagi atong matino nga molampos sa iyang katuyoan ang maong edukasyon diha sa Bag-ong Kahikayan?
11 Molampos ba kining matanga sa edukasyon? Kita makatino nga molampos kini. Ang usa ka katarongan mao nga si Jehova, nga dili magbakak, nag-ingon nga molampos kini. (Tito 1:2) Dugang pa, kining matanga sa edukasyon nagalihok na karon! Si Jehova adunay tibuok-kalibotang nagapanudlong organisasyon nga nagtudlo sa minilyong katawhan bahin sa iyang kagamhanang Gingharian ug sa mga kinahanglanon niini. Nahitabo na kini kay ang pagmando sa Gingharian nagalihok na sa misugod sa 1914 “ang kaulahiang mga adlaw.”
12 Sukad nianang panahona, ang tagna sa Mateo kapitulo 25 nagakatuman. Kini nagpakita nga si Jesus milingkod sa gahom sa Gingharian samtang ang mga kaaway sa Diyos ania pa sa yuta. Ang bersikulo 32 nag-ingon: “Ug ang tanang kanasoran pagatigomon atubangan kaniya, ug iyang lainon ang mga tawo gikan sa usag usa, sama sa usa ka magbalantay nga nagalain sa mga karnero gikan sa mga kanding.” Kining samag mga karnero ginatudloan ni Jehova pinaagi sa iyang nagauswag ug makitang organisasyon. Mapasalamaton sa ilang nakat-onan, sila naningkamot sa pagbag-o sa ilang personalidad diha sa larawan sa Diyos. Ug ang kamatuoran mao nga nakaapektar ang maong edukasyon sa minilyon sa mga tawo alang sa kaayohan karon mismo maoy seguradong timaan nga mahitabo kini sa mas dakong sukod diha sa Bag-ong Kahikayan sa Diyos.
Pagtukod ug Paraiso
13. Unsang dakong buluhatong pagpanukod ang mahitabo ilalom sa pagmando sa Gingharian?
13 Ang laing matang sa buluhaton ilalom sa pagmando sa Gingharian mao kanang paghimo sa yuta nga usa ka paraiso. Ug walay makita sa paraiso nga mga balongbalong o kakabos. Ang mga tawo gustog maanindot nga mga balay nga adunay lagwerta ug mga kahoy, mga bulak, ug mga tanaman. Kadtong andam nga magpatudlo sa Diyos makabaton gayod niana. Ang Isaias 65:21 ug 22 nagtagna: “Ug sila sa tinuod magatukod ug mga balay ug magapuyo niini; ug sila sa tinuod magatanom ug kaparasan ug magakaon sa ilang bunga. Sila dili magatukod ug lain ang magapuyo; sila dili magatanom ug dili lain ang magakaon. . . . Ang akong mga pinili magapahimulos pag-ayo sa buhat sa ilang mga kamot.”
14, 15. Nganong makasalig kita nga ang mga alagad ni Jehova makahimo sa pagtukod ug paraiso?
14 Ayaw pagduhaduhai ang mahimo ni Jehova uban sa mainamdamong mga kasingkasing ug mga kamot sa iyang katawhan diha sa Bag-ong Kahikayan. Bisan karon ang kalibotan sa mga magtutukod nahibulong sa nahimo sa mga katawhan ni Jehova sa pagpanukod, sama sa daling pagpanukod ug mga Kingdom Hall. Human nga natukod ang usa niini sa Tinipong Bansa, usa ka editoryal sa pamantalaan miingon: ‘Adunay mas labaw pa ang nahimo niadtong 2,000 ka boluntaryo. Angayng tan-awon pag-ayo sa mga lider sibiko ang nahimo sa miaging hinapos sa semana. Ang kadasig, ang dedikasyon ug ang tinguha nga maabot ang tumong maoy mipatungha ug dalayegong mga resulta. Kon ang lokal nga mga grupo molihok pa sama kanila, ang bisan unsang tumong—kon sa pagpasig-uli, pagsumpo sa krimen, o pagpauswag sa komunidad—makab-ot unta. Ang panon sa mga trabahante nagpamatuod sa dakong potensiyal nga mahimo kon magkahiusa ang komunidad. Naghinaot kami nga ang Kingdom Hall maoy tuboran sa inspirasyon sa kongregasyon sa mga Saksi. Usa na ka inspirasyon alang sa tanan ang paglungtad niini.’
15 Kining pagkamainandamon ug nagauswag nga katakos sa mga alagad ni Jehova gamiton sa mas dako pang kaayohan diha sa Bag-ong Kahikayan sa Diyos. Ug unsa ka malipayon ang pagpuli sa tanang dili matahom nga mga dapit ug matahom nga mga balay ug mga palibot! Pagkamakatagbaw nga mahibaloan nga matag adlaw ang imong mga pagkugi makapaduol sa yuta ug usa ka adlaw sa pagkahimong tibuok-yuta nga paraiso!
Usa ka Nahiusang Pamilya sa Tibuok-yuta
16. Nganong ang mga pumuluyo sa Bag-ong Kahikayan dili na gayod mahulga pa sa kapintasan?
16 Ang mga pumuluyo unya sa Bag-ong Kahikayan dili na gayod mobati sa hulga sa krimen, terorismo, o gubat. Ang Salmo 46:9 nag-ingon: “Ang [Diyos] magapahunong sa mga gubat hangtod sa kinatumyang bahin sa yuta.” Ang “Prinsipe sa Pakigdait,” si Jesu-Kristo, magpakanaog ug walay kataposang pakigdait sa tibuok-yuta, kay “sa kadagaya sa harianong pagmando ug sa pakigdait walay kataposan.” (Isaias 9:6,7) Uban sa tinuod nga pakigdait, ug uban sa enterong pamilya nga naedukar sa hataas nga mga sukdanan, ang tanan mahiusa diha sa usa ka dili mabugtong higot sa gugma. Busa, wala na unyay maglungtad pa nga makapabahing mga utlanan sa nasod.
17. Bisan karon unsa ka kaylap ang pakigdait ug panaghiusa sa mga alagad sa Diyos?
17 Sobra ra ba kining mga saara nga mahimong tinuod? Dili, tungod kay ang pakigdait ug panaghiusa maoy usa na ka kamatuoran taliwala niadtong maunongong nagpasakop sa pagmando sa Gingharian! Palandonga kini: Kapin sa duha ug tunga ka milyong mga saksi ni Jehova ang nakaylap sa tibuok yuta. Apan, natuman na nila ang Isaias 2:4, diin kini nag-ingon: “Ug ilang himoon ang ilang mga espada nga mga punta sa daro ug ang ilang mga bangkaw himoon nga mga galab. Ang nasod dili na mobakyaw sa espada batok sa laing nasod, ni makakat-on pa sila mahitungod sa gubat.” Bisan unsay kahimtang ang mga Saksi ni Jehova dili gayod mokuha sa kinabuhi sa ilang mga igsoon, ni kang bisan kinsa, diha sa tanang dapit. Sumala sa gipahayag sa usa ka Italyanong publikasyong Il Corriere di Trieste: “Andam sila nga moatubang sa kamatayon imbes sa paglapas sa pangunang sugo . . . DILI KA MAGPATAY!” Tungod sa pagsunod sa mga sukdanan sa Diyos, tinuod nga adunay pakigdait ug panaghiusa ang mga Saksi ni Jehova, nga imposible nga makab-ot sa kalibotan. Ug ang kamatuoran nga ang minilyon kanila nakapahimulos niining kahimtanga taliwala ning nabahin sa kagubot nga kalibotan maoy klarong ebidensiya kon unsay mahimo kon ang Gingharian sa Diyos na ang modumala sa tanang mga kalihokan sa yuta.—Juan 13:34, 35; 1 Juan 3:10-12.
18 Dugang pa niining internasyonal nga pakigdait ug panaghiusa, ang pagsunod sa superyor nga mga sukdanan sa Diyos mopatunghag mga tawo nga magatagad sa ilang mga silingan ug sa mga kabtangan sa ilang mga silingan. Busa, sila ‘nagagawi nga matinud-anon diha sa tanang mga butang.’ (Hebreohanon 13:18) Mahitungod niini, ang Pranses-Canadian nga kolumnista, sa pagsulat diha sa Le Journal de Montreal, miingon bahin sa mga Saksi ni Jehova: “Kon sila pa lamang unta ang mga tawo sa kalibotan, dili na unta kinahanglang kandadohan pa ang atong mga pultahan ug i-swits ang alarma.
18, 19. Unsa ang ubang mga kaayohan nga modangat niadtong mosunod sa hataas nga mga sukdanan sa Diyos?
19 Kining maunongong mga ginsakopan sa kagamhanan sa Diyos walay mga problema sa krimen sa ilang taliwala, samtang dili na kini makontrolar sa kalibotan. Lain pa, sanglit nagsunod sa hataas nga moral nga sukdanan sa Bibliya, sila wala hampaka sa mga sakit nga napasa sa sekso o sa mga paghulog sa gisabak nga nahimong epidemiya sa tanang nasod. Ug gihatagag lalom nga pagtahod sa mga alagad ni Jehova ang kaminyoon, nga sukwahi sa matugotong tinamdan sa kalibotan bahin sa kahikayan sa kaminyoon. Sa unsang paagi nakapabilin ang mga Saksi ni Jehova sa maong mga sukdanan? Tungod kay si Jehova mao ang nag-agak sa iyang maunongong mga magsisimba, ug “diha sa Diyos ang tanang butang posible.”—Mateo 19:26.
Pakigtigom Ngadto sa Tinuod nga Pagsimba
20. Unsa ang labing makahuloganong kalihokan sa modernong panahon?
20 Namatikdan man kini sa tawo o wala, ang tibuok-yuta nga pagtigom sa mga tawo nga samag karnero ngadto sa organisasyon ni Jehova mao ang labing hinungdanong kalihokan sa modernong panahon. Ginatuman niini ang tagsaong tagna sa Isaias 2:2, 3: “Ug mahitabo sa kaulahiang mga adlaw nga ang bukid sa balay ni Jehova [ang binayaw niyang matuod nga pagsimba] lig-ong matukod ibabaw sa mga kabukiran, ug kini igatuboy ibabaw sa kabungtoran; ug ngadto niini magaganayan ang tanang kanasoran. Ug daghang tawo ang motungas ug moingon: ‘Umari, kamo nga katawhan, ug mangadto kita sa bukid ni Jehova, . . . ug siya magatudlo kanato sa iyang mga dalan, ug magalakaw kita sa iyang mga alagianan.’”
21. Ang mga tawong matinud-anon ug mga kasingkasing gidasig sa pagbuhat ug unsa?
21 Among gidasig ang tanang tawo nga may matinud-anong kasingkasing nga mahimong bahin niining makawiwiling kalihokan sa kalibotan padulong sa tinuod nga pagsimba ug sa matarong nga kagamhanan. Tagamtama karon ang mga panalangin nga nagagikan sa pagpakig-uban sa usa ka katawhan nga naedukar sa kasugoan ug sa mga prinsipyo sa Diyos. Sa maunongon magpasakop ka sa kagamhanan sa Gingharian nga sa dili madugay maghimo niining yutaa nga paraiso. Ibutang ang imong pagsalig diha niining Ginghariana ug dili sa mga plano niining kalibotana, kay ang Salmo 127:1 nag-ingon: “Gawas nga si Jehova ang magatukod sa balay, kawang lamang ang kahago niadtong nagatukod niini.” Sanong sa pagdapit sa Salmo 66:5: “Umari, kamo nga katawhan, ug tan-awa ang mga buhat sa Diyos. Ang iyang pagtagad sa mga anak sa tawo katingalahan kaayo.” Busa dumuol sa Diyos kinsa nagpasalig ug labing maayong kagamhanan alang sa katawhan, ang kagamhanan nga mohimo sa dili mahimo sa tawo, ang kagamhanan nga sa dili madugay mao lamang ang bugtong nga kagamhanan nga maglungtad niining yutaa.
Unsaon Nimo sa Pagtubag?
◻ Nganong makatino kita nga tumanon ni Jehova ang iyang mga katuyoan?
◻ Sa unsang paagi ang prinsipyo sa pagpalit ug balik moobra sa pagpagawas sa usa gikan sa kasal-anan?
◻ Unsang dakong buluhaton sa pagpanudlo ug pagpanukod ang mahitabo sa Bag-ong Kahikayan?
◻ Unsay ebidensiya karon nga maglungtad ang pakigdait, panaghiusa, ug gugma sa yuta diha sa Bag-ong Kahikayan?
[Hulagway sa panid 17]
Ilalom sa pagmando sa Gingharian, ang mga tawong mahigugmaon sa kamatuoran “pagatudloan ni Jehova”
[Hulagway sa panid 19]
Usa na ka kamatuoran ang pakigdait ug panaghiusa taliwala niadtong nagpasakop sa kagamhanan sa Gingharian