Armageddon—Ang Gubat nga Mopatunghag Tinuod nga Pakigdait

SA PINULONGAN niadtong nag-atiman sa internasyonal nga relasyon, ang pulong nga gigamit sa pagbatbat sa kahimtang sa kalibotan karon mao ang MAD—Mutual Assured Destruction. Tukma kaayo kanang terminoha. Sa 40 ka tuig sukad nga mibuto ang unang bomba atomika sa panaggubat batok sa Hiroshima, Japan, makalilisang ang pag-uswag sa nukleyar nga hinagiban sa kalibotan. Ang ubang mga report miingon nga kini sila mokabat ug katumbas sa 12 ka libo ka milyong tonilada sa TNT, o mga 3 tonilada alang sa matag tawo sa yuta!

Mahitungod sa Usa nga “wala maglalang sa [yuta] nga walay kapuslanan, nga nag-umol niini aron pagapuy-an,” si Jehova nga Diyos, sa pagkatinuod, dili, gayod motugot sa mga nasod sa pagpadayon sa ilang mahikugong dalan. (Isaias 45:18; tan-awa usab ang Salmo 104:5.) Sa dili pa sila makahigayon sa paggamit sa tanan nilang makapatayng mga hinagiban sa usag usa, ug makalaglag sa ilang kaugalingon ug sa palibot, ang Magbubuhat ug ang Tag-iya sa yuta ug ang tanang butang nga diha niana molihok. Siya misaad nga kini maoy “gubat sa dakong adlaw sa Diyos nga Makagagahom,” ang Biblikanhong Armageddon!—Pinadayag 16:14, 16.

Busa, ang Armageddon, dili kay usa lamang ka gubat sa pagsulbad sa presenteng adlawng politikal nga kasungian. Kab-oton niini ang dugay nang gipangandoy sa tawo sa nangaging kasiglohan. Paphaon niini ang tanang hinungdan sa tawhanong gubat. Tukoron niini ang tinuod nga pakigdait sa yuta. Labaw sa tanan, ipasig-uli niini ang matarong nga pagmando sa Tag-iya sa yuta, si Jehova nga Diyos, ibabaw sa iyang kalalangan. Sa unsang paagi makab-ot kining tanan? Atong tan-awon.

Pakigdait—Pinaagi sa Pagwala sa Hinungdan sa Pakiggubat

Ang usa sa katarongan nga dili makawala ang mga nasod sa gubat mao nga sila wala molampos sa pagwala sa hinungdan sa pakiggubat. Bisan pag nasayod sila nga ang nagkadaghang pundo sa mga hinagiban maoy paghikog, dili sila andam sa paghunong o sa pagpahinay niini. Sa pagkatinuod kini “katingalahan,” sa dihang molihok si Jehova ug tumanon ang mga butang nga niini napakyas ang mga nasod sa pagbuhat: “Balion niya ang pana ug putolputolon niya ang bangkaw; sa kalayo gisunog niya ang mga karro sa gubat.”—Salmo 46:8, 9.

Si Jehova sa nangagi nakapakita sa iyang katakos sa pagsumpo sa labing moderno ug makalilisang nga hinagiban nga iwarawara sa mga nasod. Pananglitan, iyang gihatagag kaluwasan ang iyang daw walay ikadepensang katawhan, ang Isrealitas, gikan sa militaryong gahom sa unang gahom sa kalibotan, ang Ehipto, pinaagi sa paggamit sa mga gahom sa kinaiyahan sa mga tubig sa Pulang Dagat. (Exodo 15:3-5) Maingon man, bisan pa sa maayong pagkaugmad nga hinagibang militar ni Haring Jabin, “siyam ka gatos ka karro sa gubat nga adunay puthawng mga sulab,” ubos sa pagpangulo sa hepe sa iyang kasundalohan si Sisera, wala magsilbi sa dihang gibuhian ni Jehova ang gahom sa baha. Ang panon sa mga kaaway nagkaguliyang, nga mitultol sa ilang kamatayon hangtod sa kataposang tawo. Ang resulta mao nga “ang yuta nakabaton ug kalinaw sulod sa kap-atan ka tuig.”—Tan-awa ang Maghuhukom, kapitulo 4 ug 5:21, 31.

Sa makahuloganon, kanang mahukmanong gubat batok sa mga kasundalohan ni Haring Jabin nahitabo sa suba sa Kison, “pinaagi sa mga tubig sa Megiddo.” (Maghuhukom 5:19-21) Busa kini naghatag kanato ug dramatikanhong pagtan-awng-daan sa bug-os nga kadaogan ni Jehova sa umaabot nga gubat sa Armageddon.

Unsang “misteryoso” nga mga puwersa, kon aduna man, ang gamiton ni Jehova batok sa iyang mga kaaway wala kita masayod. Apan nahibalo kita nga siya adunay iyang magamit nga mga puwersa nga bug-os makapukan sa militaryong mga patukoranan sa mga nasod. Ang mga siyentipiko nahibalo, pananglitan, nga ang gamhanang elektromagnetikong pulso—usa ka butang nga sila mismo makamugna pinaagi sa nukleyar nga pagbuto sa itaas—may katakos sa paglumpag sa komunikasyon ug sa mga sistema sa pagmando sa militar sa nasod, nga moresultag kaguliyang. Sa makataronganon, wad-on ni Jehova ang gahom sa mga hinagiban sa kanasoran aron sa pagtukod ug pundasyon alang sa bug-os nga pakigdait.

Pakigdait—Alang Lamang Niadtong Nagkinahanglan Niini

Sagad nang ginaingon nga gisangka ang mga gubat sa mga tawo, dili sa mga hinagiban. Busa, bisag bililhong mawala ang hinungdan sa pagpakiggubat, kana mismo dili makagarantiya ug walay kataposang pakigdait. Sa makataronganon, kon buot kitang makakita ug tinuod nga pakigdait, ang politikal, rasanhon, ug nasyonalistikong mga pagdumot nga nakapabahin sa kalibotan sa hilabihan ka daghang bloke ug mga kampo kinahanglang wagtangon usab. Kini, buhaton ni Jehova nga Diyos pinaagi sa pagpakanaog sa dugay nang ginaampo sa minilyon: “Paanhia ang imong gingharian.”—Mateo 6:9, 10.

Bisan pag ang nangatumang mga tagna sa Bibliya tin-awng nagpakita nga natukod na ang Mesiyanikong Gingharian sa mga kamot ni Jesu-Kristo sa kalangitan sa Gubat sa Kalibotan I sa tuig 1914, ang kanasoran wala moabiabi niini. Walay usa kanila ang naghunahuna sa pagtugyan sa ilang mga armas ug sa pagsurender sa ilang kamandoan. Hinunoa, sa ilang makalilisang nga pakigbisog sa pagmando sa kalibotan, nalangkit sila sa labing dakong gubat nga nahitabo sukad niadtong panahona.

Sa matagnaon, ang ikaduhang Salmo nagbatbat sa kahimtang: “Nganong naglungotlungot ang mga nasod ug ang katawhan nagbagulbol ug walay kapuslanang mga butang? Ang mga hari sa yuta nanagpahamutang sa ilang kaugalingon ug ang mga punoan nagkahiusa batok kang Jehova ug batok sa iyang dinihogang usa.” Maoy hinungdan nga gisugo ni Jehova ang iyang tinudlong Hari si Jesu-Kristo: “Dugmokon mo sila sa sungkod nga puthaw, pulpogon mo sila ingon sa banga sa magkokolon.”—Salmo 2:1, 2, 9; 110:2.

Kining kadaogan sa dinihogang Hari sa Diyos gibatbat sa malarawanong detalye diha sa Pinadayag 19:11-20:3. Ang Pulong sa Diyos, si Jesu-Kristo, gipaluyohan sa mga panon sa manulonda, nakitang nagsakay sa maputing kabayo, “ug siya nagapanghukom ug nagapakiggubat sa pagkamatarong. . . . Gikan sa iyang baba nagagula ang usa ka mahait nga espada, nga maoy iyang itigbas sa kanasoran.” Dako kaayo ang moresultang pagpamatay sa mga daotan. Sa iyang masilhigong kadaogan, atubangon sa madaogong Hari ang tinuod nga hinungdan sa tanang kapaitan ug kasakitan sa yuta. Ang panan-awon sa Pinadayag nagbatbat niini ingong natuman na kini sa pag-ingon: “Ug iyang gidakop ang dragon, ang karaang serpente, nga mao ang Yawa ug Satanas, ug gigapos siya sulod sa usa ka libo ka tuig.”

Pakigdait—Usa ka Libo ka Tuig ug Human Niana

Mahanduraw ba nimo kon unsay kahulogan sa usa ka libo ka tuig nga pakigdait alang sa katawhan? Ang mga awtoridad karon nakasabot nga ang gutom, sakit, ug kakabos taliwala sa kanasoran mawala kon ang tipik nga bahin sa ginatos ka bilyong dolyar nga gigasto sa armamento kada tuig gamiton pa sa pagsulbad kanila. Hunahunaa lang kon unsay makab-ot kon ang tanang kahinguhaan sa yuta gamiton sa mapuslanong paagi. Dili kadto mahandurawong damgo sa panan-awon sa gidasig si Isaias sa pagtagna bahin sa pagmando sa “Prinsipe sa Pakigdait,” si Jesu-Kristo: “Sa kadagaya sa harianong pagmando ug pakigdait walay kataposan.”—Isaias 9:6, 7.

Ang hinungdanong pangutana mao: Maluwas ka ba sa kalaglagan sa Armageddon aron sa pagtagamtam sa walay kataposang pakigdait? Tingali mangutana ka, ‘Unsay akong buhaton aron maluwas?’ Ania ang tambag sa Bibliya: “Pangitaa si Jehova, kamong tanang mga maaghop sa yuta, nga nanagtuman sa Iyang mga tulomanon. Pangitaa ang pagkamatarong, pangitaa ang pagkamaaghop. Kay tingali kamo pagatagoan sa adlaw sa kasuko ni Jehova.” (Sofonias 2:2, 3) Malipay ang mga Saksi ni Jehova sa pagtabang kanimo sa pagbuhat niini. Busa, ang Armageddon alang kanimo dili maoy usa ka gubat nga mohatag bug-os nga kalaglagan kondili usa ka gubat nga motultol ug tinuod nga pakigdait.

[Hulagway sa panid 6]

Gipakita ni Jehova sa Pulang Dagat ang iyang katakos sa pagpawalay epekto sa makalilisang nga mga hinagiban sa gubat