Mga Pangutana Gikan sa mga Magbabasa

◼ Kon dili makatambong ang usa ka Kristohanon sa pagsaulog sa Panihapon sa Ginoo, unsa ang kinahanglan niyang buhaton?

Hinungdanon gayod nga motambong ang mga Kristohanon sa tinuig nga pagsaulog sa Panihapon sa Ginoo, kay si Jesus miingon sa gisugdan kini: “Sa kanunay buhata ninyo kini sa paghinumdom kanako.” (Lucas 22:19) Gihimo kini sa unang mga Kristohanon. Busa si apostol Pablo nakasulat bahin sa mga igsoon sa Corinto kinsa sa matag tuig ‘nagtagbo ingong kongregasyon,’ o ‘nagtigom,’ alang sa Memoryal sa haladnong kamatayon ni Jesus. (1 Corinto 11:20, The New English Bible; NW) Apan unsay ilang himoon sa Memoryal ning malisod nga kahimtang? Pananglitan, unsay gihimo ni Pablo sa katuigan nga nabilanggo siya (nga giguwardiyahan ug tingali gikadenahan) sa Cesaria?—Buhat 23:35; 24:26, 27

Tungod sa tin-awng sugo ni Jesus, bisan si Pablo nga nahilain sa okasyon sa Panihapon sa Ginoo, sa walay duhaduha nagrepaso sa Kasulatanhong mga bahin sa maong okasyon. Ingong dinihogan sa espiritu nga Kristohanon, gihimo niya ang tanan niyang mahimo sa pakigbahin sa labing tukmang mga butang nga iyang magamit ingong mga simbolo. Komung ilimnon ang bino kaniadto, busa bisag usa ka binilanggo si Pablo tingali adunay bino ug matang sa tinapay nga magamit. Kana malagmit ang nahitabo sa gipriso siya sa Roma, diin gitugotan siya sa pagdawat ug mga bisita. Tingali ang ubang mga igsoon sa Roma naningkamot sa ‘pakigtigom uban kaniya’ sa gamayng grupo sa pagsaulog sa Panihapon sa Ginoo.—Buhat 28:30.

Sa tibuok kalibotan karon, ang mga kongregasyon sa mga Saksi ni Jehova magtigom sa petsa nga katumbas sa Nisan 14 sa Memoryal sa kamatayon ni Kristo. Apan may mga panahon nga adunay motunghang tagsaong mga kababagan. Usahay, tungod sa dagkong mga unos o baha ang ubang mga membro sa kongregasyon mapugngan, sa pakigtigom sumala sa naplano. Sa tagsaong mga kahimtang, tungod sa martial law gidid-an sa armadong kasundalohan ang mga lungsoranon sa paggawas human sa pagsalop sa adlaw. Ang ubang mga Kristohanon dili makatambong sa pagsaulog sa kongregasyon tungod kay naospital o nagkasakit ug grabe. Unsay mahimo ning situwasyona?

Samtang tukma alang sa tibuok kongregasyon nga magkahiusa ning hinungdanong okasyon, ang mga sirkumstansiya sama sa gipadayag sa ibabaw makapahimo niini nga imposible. Tungod sa daot kaayo nga klima, o sa natural nga mga katalagman, o susama niini, makapugong sa pamilya o bahin sa kongregasyon sa pakigtigom uban sa kongregasyon, ang nahilain mahimong makigtigom ug maghisgot sa Kasulatanhong asoy sama sa makita sa Lucas 22:7-23, 28-30 ug sa 1 Corinto 11:20-31, ug sa paghisgot sa kahulogan sa okasyon. Maingon man, tungod sa kurpiyo ang kongregasyon dili makatigom sa eksaktong gabii, ang labing maayong kapilian mao ang pakigtigom uban sa Grupo sa Pagtuon sa Libro sa Kongregasyon o sa mga grupo sa palibot, ang kinatibuk-ang gidaghanon sa mitambong magsilbing taho sa kongregasyon sa mga tumatambong. Ang mubong pakigpulong mahimong ihatag sa may katakos, dedikadong igsoon diha sa grupo. Walay kinahanglang kabalak-an nga walay tukmang mga simbolo ang mabatonan basta walay usa nga nakigbahin kanhi sa tinapay ug bino ingong dinihogang Kristohanon ang motambong niining emerhensiya nga situwasyon.

Ang balaod sa Diyos sa Israel adunay espesyal nga kahikayan alang sa usa nga wala makaambit sa regular nga panihapon sa Paskua; mahimong makaambit niini ang indibiduwal sa molabay ang usa ka bulan (30 ka adlaw). (Numeros 9:10, 11; 2 Cronicas 30:1-3, 15) Maingon man, sa tagsaong situwasyon uban sa espirituwal nga Israelinhon nga dili gayod makatambong o dili ka dalitan sa mga simbolo sa Nisan 14, siya [lalaki o babaye] makaambit sa molabay ang 30 ka adlaw. Aplikado lamang kini sa kaso sa dinihogang Kristohanon kinsa nailalom sa sugo sa pag-ambit sa tinapay ug sa bino.—Galacia 6:16.

Sa miaging Abril 4, 1985, sa misalop ang adlaw, ang mga kongregasyon sa tinuod nga mga Kristohanon sa tibuok yuta nagtigom sa pagsunod sa sugo ni Jesus: “Buhata kini sa paghinumdom kanako.” Among gidapit kamo sa pakigtigom uban kanila sa umaabot.—1 Corinto 11:25, NE.