Mga Magmamantala sa Gingharian Nagtaho

Nanagmaya ang Daghang Kapuloan

ANG pahayag ni Jesus ngadto sa iyang mga tinun-an mao: “Kamo akong mga saksi . . . ngadto sa kinalay-ang bahin sa yuta.” (Buhat 1:8) Ang maong sugo sa kataposan mosakop sa dako kaayong bahin sa Western Pacific, diin ang buluhaton sa Gingharian sa tibuok Micronesia karon ilalom sa pagdumala sa sanga sa Guam sa Watch Tower Bible and Tract Society. Daghan sa mga molupyo niining matahom nga kapuloan nagakalipay karong adlawa. Ngano man? Ang Salmo 97:1 nagahatag sa hinungdan: “Si Jehova mismo nahimong hari! Papagmayaa ang yuta. Papagmayaa ang daghang kapuloan.”

Daghang pinulongan ang gigamit sa pagsulti sa nagkadaiyang kapuloan niining bahina sa kalibotan, ug kini dakong suliran sa pagpakaylap sa maayong balita nga “Si Jehova mismo nahimong hari.” Busa, usa ka haylait niining tuig sa pag-alagad mao ang pagkadawat sa binulang edisyon sa Ang Bantayanang Torre diha sa lima ka dagkong pinulongan, ingon man sa Akong Basahon sa mga Estorya sa Bibliya ug sa pulyetong Tagamtama ang Kinabuhi sa Yuta sa Walay Kataposan diha sa ubay-ubayng pinulongang Micronesian. Ang pagbatog mga basahon diha sa lokal nga mga pinulongan alang niining nahilit nga katawhan maoy dakong panalangin ug nagatagana sa dakong panginahanglan. Ang lokal nga molupyo maayog pagsanong, ilabina sanglit ang mga relihiyon sa Kakristiyanohan ingong lagda wala magtagad sa paghubad sa mga basahon ngadto sa ilang mga pinulongan.

◻ Pananglitan, sa nindot nga pulo nga Moen sa Truk ang mga misyonaryo mitaho nga ang Akong Basahon sa mga Estorya sa Bibliya sa Trukese nakapakisaw samtang gidawat kana sa mga tagbalay ug gipakita ngadto sa ilang mga higala ug mga paryente. Ang katawhan nagpahunong sa mga misyonaryo sa kadalanan nga nangutana sa basahon, ug ang pipila nangadto pa sa balayng misyonaryo sa wala pay 6:30 s.b. nga nangutana niana. Ang uban pa nangadto sa Departamento sa Edukasyon aron makakuhag mga kopya gikan sa usa ka Saksi ni Jehova nga nagatrabaho didto.

Usa ka edukador nangutana sa unsang paagi ang mga Saksi makagama sa maong basahon diha sa Trukese sa dihang ang mga Katoliko ug mga Protestante didto na sa daghang katuigan apan wala makagamag sama niadto. Bisan ang kanhing mga magsusupak buot sa basahon.

◻ Usa ka kasinatian gikan sa Kapuloang Marshall nagpakita sa unsang paagi ang kamatuoran sa Bibliya makadalag panaghiusa ug kalipay sa usa ka panimalay. Ang bana niadto palahubog ug hinabako kaayo, ingon man makugihon, nagatuman nga Katoliko. Duha ka batan-ong Saksi ang miduaw kaniya sa iyang balay ug, bisan sa pagsupak sa iyang asawa, iyang gidawat ang usa ka pagtuon sa Bibliya. Gisupak siya sa iyang asawa sulod sa tulo ka tuig. Apan sa pagpaniid nga nausab siya tungod sa kamatuoran kay siya mihunong sa pagtabako, wala na mahubog, ug misugod sa pagbuhat sa mga butang kauban sa iyang pamilya, sa kataposan siya namati sa maayong balita ug nakig-ambit sa iyang nakat-onan sa uban. Gipalegal sa magtiayon ang ilang kaminyoon ug gipasimbolohan ang ilang pahinungod kang Jehova pinaagi sa bawtismo. Ang bana karon nagaalagad nga ansiano diha sa kongregasyon, samtang ang iyang asawa nagapanglantaw sa payunir nga pag-alagad.

Ang kalipay ug pakigdait miabot niining panimalaya sama sa nahitabo ngadto sa daghang ingong panimalay sa kapuloan nga matud sa salmista managmaya tungod kay si Jehova nahimong Hari.—Salmo 144:15.

[Mapa sa panid 11]

(Alang sa bug-os nga pagkahan-ay sa teksto, tan-awa ang publikasyon)

Belau

Yap

Rota

Guam

Saipan

Truk

Ponape