Si Jehova—Makalilisang Apan Mahigugmaon

“KANG kinsa ninyo ako gitandi”? nangutana si Jehova nga Diyos. Bisan ang pinakataas nga pinulongan dili gayod bug-os makapahayag sa dili hitupngang gahom ug himaya sa Diyos. Siya mismo nagdapit kanato sa pagpalandong sa kalapad sa kalangitan, nga nag-ingon: “Ihangad ang inyong mga mata sa itaas ug tan-awa. Kinsay naglalang niining mga butanga? Ang Usa nga nagadala sa ilang panon sa tinagdaghan, siya nagatawag kanilang tanan pinaagi sa ngalan. Ug tungod kay abunda sa dakong enerhiya, ug kay siya kusgan sa kagahom, walay mausa ang nakulang kanila.”—Isaias 40:25, 26.

Ang libolibong mga bitoon nga makita sa mata maoy tipik lamang nga bahin sa mga 100 bilyones ka bitoon nga naglangkob sa atong galaksiya! Apan naihap ug ginganlan ni Jehova ang tanang bitoon sa enterong uniberso! Palandonga, usab, ang dakong bul-og sa enerhiya nga anaa niining tanang butanga. Ang atong adlaw adunay sentral nga temperaturang 27 ka milyong grado Fahrenheit (15 milyones grado Celsius). Unsa ka “dakong enerhiya” ang nabatonan ni Jehova sa paglalang ug bilyonbilyon niining nukleyar nga mga halinganan!

Busa ang pagsabot kang Jehova sa bug-os saylo na sa atong limitadong katakos. Miingon si Elihu: “Mahitungod sa Makagagahom, dili nato siya matuki; siya dako uyamot sa kagahom . . . Busa ang mga tawo may kahadlok kaniya.” (Job 37:23, 24) Apan, si Jehova, nagkinahanglan ug labaw pa sa atong kalisang o kahadlok. “Kinahanglang imong higugmaon si Jehova nga imong Diyos uban sa bug-os mong kasingkasing ug sa bug-os mong kalag ug sa bug-os mong gahom,” misugo ang Bibliya. (Deuteronomio 6:5) Apan unsaon nato sa paghigugma sa usa nga dili gayod nato masabtan sa bug-os? Oo, bisan nagpuyo sa hataas nga mga kalangitan, mahigugmaon niyang ginaatiman ang dili hingpit nga mga tawo ug nagtugot kanila sa pagbaton ug lakbit nga pagsabot bahin kaniya.—Itandi ang Salmo 113:5-9.

Ang Iyang “Mata,” “Dalunggan,” ug “Nawong”

Ang usa sa paagi nga gitabangan kita ni Jehova sa pagsabot kaniya mao ang pagtugot sa iyang kaugalingon nga mabatbat sa tawhanong mga termino. Si apostol Pedro miingon: “Ang mga mata ni Jehova nagasud-ong sa mga matarong, ug ang iyang mga dalunggan nagapamati sa ilang mga pangamuyo; apan ang nawong ni Jehova batok niadtong nagabuhat sa mga daotan.”—1 Pedro 3:12; itandi sa Exodo 15:6; Ezekiel 20:33; Lucas 11:20.

Siempre, adunay mga pasumbingay, nga dili dawaton sa literal, sama sa pagtawag sa Kasulatan sa Diyos nga “ang adlaw,” ang “taming,” o “ang Bato.” (Salmo 84:11; Deuteronomio 32:4, 31) ‘Apan dili ba nag-ingon ang Bibliya nga kita gilalang “sumala sa iyang dagway“?’ mangatarongan ang uban. (Genesis 1:26, 27) Oo, apan ang pag-ingon nga ang Diyos adunay literal nga baba, ilong, ug dalunggan mopatunghag mabug-at nga mga suliran. Ang igdulongog ba sa Makagagahom nga Diyos, pananglitan, tinuod nga limitado nga madunggan sa literal nga dalunggan ang tingog sa sound waves? Dili, kay ang Bibliya nagpakita nga ang Diyos “makadungog” bisan sa walay mga pulong nga pahayag sa tawhanong mga kasingkasing. (Genesis 24:42-45) Ni ang iyang katakos sa “pagkakita” nagadepende sa mga balod sa kahayag.—Salmo 139:1, 7-12; Hebreohanon 4:13.

Busa ang hingpit nga tawo naglarawan, dili sa pisikal nga mga parte, kondili sa mga hiyas sa Diyos sama sa gugma ug hustisya. Ilabinang magpakita ang mga Kristohanon niining mga hiyasa samtang ilang sundon ang sugo ni apostol Pablo kinsa miawhag: “Sul-obi ang inyong kaugalingon sa bag-ong personalidad, nga ginabag-o pinaagi sa tukmang kahibalo sibo sa dagway sa Usa nga nagabuhat niini.”—Colosas 3:10.

Mga Panan-awon sa Himaya

Sa karaang mga panahon, adunay pipila ka alagad ni Jehova nga nakapribilehiyo sa pagdawat ug dinasig nga mga panan-awon sa langitnong himaya ni Jehova. Ang usa niining mga tawhana mao si Ezekiel. (Ezekiel 1:1) Dili ikabatbat ang iyang nakita sa panan-awon! Migamit na lamang si Ezekiel ug mga pasumbingay ug mga kaamgiran, nga sagad magpamulong nga ang iyang nakita “sama sa” materyal nga mga butang nga pamilyar. Pananglitan, ang propeta miingon:

“Dihay usa ka butang nga sama sa panagway sa usa ka bato nga sapiro, nga may-ong sa trono. Ug diha sa may-ong sa trono mao ang may-ong sa panagway sa usa ka tawo ibabaw niana sa itaas. Ug nakita ko nga ingon sa nagasiga nga ambar, ingon sa panagway sa kalayo sulod niini nga naglibot, gikan sa dagway sa iyang mga hawak ngadto sa itaas; ug gikan sa dagway sa iyang mga hawak ngadto sa ubos nakita ko ang ingon sa panagway sa kalayo, ug dihay kasiga nga naglibot kaniya. Dihay ingon sa panagway sa balangaw nga anaa sa panganod sa adlaw nga may ulan. Mao man ang panagway sa kasidlak nga naglibot. Kini mao ang panagway sa may-ong sa himaya ni Jehova.”—Ezekiel 1:26, 28.

Pagkadako nga himaya ang gibatbat ni Ezekiel! Nakakitag kaamgid nga panan-awon si apostol Juan kang Jehova, ug siya misulat: “Tan-awa! dihay usa ka trono sa langit, ug sa trono dihay naglingkod. Ug ang naglingkod niini, may panagway, nga maorag mutya nga haspe ug kornalina, ug ang trono giliyokan sa usa ka balangaw nga maorag bulok sa esmeralda.” (Pinadayag 4:1-3) Bisag gilarawan si Jehova sa ingon nga pagkatahom, wala siya ilarawan ingong mabangis nga Diyos. Hinunoa, mahapsay ang talan-awon, malinaw sama sa balangaw.—Itandi sa Genesis 9:12-16.

Ang kamatuoran nga gitugotan sa Diyos bisan ang limitadong talan-awon sa iyang langitnong kahalangdon nagpakita nga ang iyang katuyoan sa katawhan malinawon. Busa, kadtong nahigugma sa Diyos makasalig sa pagduol kaniya ingong maluloy-ong “Tigpatalinghog sa pag-ampo.”—Salmo 65:2.

Ang tawong si Job miingon bahin sa Diyos: “Tan-awa! Kini maoy bahin lamang sa iyang mga dalan, ug pagkadiyutayng hunghong ang atong mabati mahitungod kaniya!” (Job 26:14) Tinuod, adunay, daghan kaayong butang nga tun-an mahitungod kang Jehova nga Diyos, kinsa nagpanalangin sa iyang mga alagad ug palaabutong mabuhi sa walay kataposan. (Juan 17:3) Apan bisan ang “panahong walay kataposan” dili paigo alang kanato sa “pagtugkad sa buhat nga nahimo sa Diyos gikan sa sinugdan hangtod sa kataposan.”—Ecclesiastes 3:11.

Apan, kon unsay nahibaloan o nakat-onan sa mga matinud-anon ug kasingkasing, mopalihok kanila sa paghigugma ug sa pagsunod kang Jehova. (1 Juan 5:3) Usa ka ba niining matanga sa indibiduwal? Dili masayon ang pagsunod sa Diyos. Apan kon modangat ka sa pagkaila kang Jehova nga Diyos ug sa iyang mahigugmaong mga paagi, walay paningkamot nga daw dako kaayo. Busa, determinado ka ba sa pagkuhag dugang kahibalo niining makalilisang apan mahigugmaong Diyos?

[Hulagway sa panid 6]

Ang mga tawo sama kang Ezekiel ug Juan adunay mga panan-awon nga mohatag lamang kanatog gamayng ideya sa katingalahang himaya ni Jehova

[Hulagway sa panid 7]

Ang paglalang ug ang pagngalan sa Diyos sa mga bitoon mohatag lamang kanatog gamayng ideya sa iyang walay kinutubang gahom