Unsa Kamo Kalahi Gikan sa Kalibotan?
“Ang dagway sa pagsimba nga mahinlo ug wala mahugawi gikan sa panghunahuna sa atong Diyos ug Amahan mao kini: . . . ang paghupot sa kaugalingon nga walay buling sa kalibotan.”—SANTIAGO 1:27.
1, 2. Kinsa ang miingon nga ang mga Kristohanon malahi sa kalibotan? Nganong ang mga Saksi ni Jehova angay magdahom nga malahi sa kalibotan?
SI Jesus mao ang unang nagpahayag nga ang mga Kristohanon kinahanglang dili bahin sa kalibotan. (Juan 15:19) Ug sa pag-ampo ngadto sa iyang Amahan sa gabii una siya mamatay, siya nadunggang miingon: “Gihatag ko ang imong pulong ngadto kanila, apan gidumtan sila sa kalibotan, tungod kay sila dili bahin sa kalibotan, maingon nga ako dili bahin sa kalibotan.”—Juan 17:14, 16.
2 Ang kadaghanang relihiyon sa Kakristiyanohan wala maningkamot sa pagtuman niining mga pulonga. Bisan pa niana, naamgohan sa mga Saksi ni Jehova nga ang mga Kristohanon karong adlawa angay gayong magpabiling bulag sa kalibotan. Sila nasayod nga si Satanas mao ang magmamando niining kalibotana. (Juan 14:30; 1 Juan 5:19) Ang pagkabahin sa kalibotan nagkahulogang mailalom sa impluwensiya ni Satanas. Mipasidaan si Santiago: “Busa, si bisan kinsa nga buot mahigala sa kalibotan nagahimo sa iyang kaugalingon nga kaaway sa Diyos.” (Santiago 4:4) Busa, kita angay magdahom nga malahi.
3. Unsang paninugdang mga butang ang nagahimo sa mga Saksi ni Jehova nga lahi niadtong alirong kanila?
3 Apan sa unsang paagi malahi ang mga Saksi ni Jehova? Si Jesus miingon nga ang mga Kristohanon dili sa lawasnon mogawas sa kalibotan. (Juan 17:15) Ug, sa pagkamatuod, ang mga Saksi ni Jehova nagapuyo diha sa mga komunidad, ug kadaghanan kanila nagaminyo ug nagapamilya, sama ni bisan kinsa. Sila, usab, kinahanglang mangitag trabaho, mosagubang sa implasyon, ug magbayad sa ilang mga buhis. Apan sila lahi. Sa usa ka artikulo mahitungod kanila, ang editor sa relihiyon sa usa ka mantalaan sa Tinipong Bansa misaysay nganong kini ang iyang hunahuna. Matud niya: “Ang nagabulag sa mga Saksi gikan sa kadaghanan sa ilang mga kritiko, tingali, mao nga ang ilang bug-os nga mga kinabuhi—ang paagi sa paggugol sa ilang mga oras ug kon kauban ni kinsa—bug-os nalambiggit sa ilang mga pagtuo.” Tukma gayod! Ang mga Saksi ni Jehova bug-os napahinungod kang Jehova nga Diyos. Sila nagtuo gayod sa iyang mga saad diha sa Bibliya, ug ilang giisip nga ugdang kaayo ang tanang sugo sa Diyos kanila. (1 Juan 5:3) Kini nagahimo kanilang lahi.
4. Unsang mga butang ang nagapalisod niining pagkabulag sa kalibotan? Busa, unsay pagabuhaton natong tanan panapanahon?
4 Ugaling, ang maong pagkabulag dili popular o sayon. Sa atong adlaw-adlawng mga kinabuhi, ang pagpit-os sa pagpahiuyon maoy kusog. Ang kadaghanan kanato dunay kinaiyanhong tinguha nga dili malahi sa uban. Kon motungha ang mga isyu maylabot sa neyutralidad, kinahanglan ang lig-ong kombiksiyon nga malahi ug magsugot sa mga sugo ni Jehova. (Buhat 5:29; 15:28, 29) Busa, maalamong ang matag usa magsusi sa iyang kaugalingon panapanahon sa pagsusi kon giunsa niya pagbarog bahin sa pagkabulag sa kalibotan.—2 Corinto 13:5.
Madasigon sa Pag-alagad sa Kanataran
5. (a) Unsay ginaingon sa pipila ka dili-Saksi mahitungod sa kadasig sa mga Saksi ni Jehova sa buluhatong pagsangyaw? (b) Unsa ang pipila ka prinsipyo sa Bibliya nga nagatukmod sa mga Saksi ni Jehova nga magmadasigon niining buluhatona?
5 Pananglitan, ang mga Saksi ni Jehova ilado kaayo sa ilang kadasig sa pagsangyaw. Kini nagahimo gayod kanilang lahi. Ginadayeg sila sa pipila tungod niana, samtang ang uban mapikal niana. Ang mga misyonaryo sa usa ka ebanghelikanhong organisasyon mitaho nga bisan asa sila moadto sa kalibotan ilang matagbo ang lokal nga katawhan si kinsa maoy aktibo, madasigong mga saksi ni Jehova! “Pakigsulting dugay kang bisan kinsa . . . nga misyonaryo sa bisan diin sa kalibotan mahitungod sa lokal nga mga kahimtang, ug imong mabatiang mahisgotan ang mga Saksi ni Jehova,” matud sa usa sa ilang mga basahon. Nganong ang mga Saksi madasigon kaayo niining buluhatona? Ang hinungdan mao nga ang pagsangyaw sa maayong balita maoy kabubut-on sa Diyos ug usa ka ilhanan sa tinuod nga Kristohanon. (Mateo 28:19, 20; Efeso 6:14, 15; Pinadayag 22:17) Karong adlawa, kining pagsangyaw sa mga Saksi ni Jehova maoy dayag nga pasundayag sa ilang pagkamaunongon sa Gingharian sa Diyos ug sa ilang tinguha sa pagtabang sa uban sa pagsimba kang Jehova.—Isaias 2:2-4; Mateo 24:14.
6. Unsa ang pipila ka pangutanang angay natong isukna sa atong kaugalingon sa pagsusi sa atong mga pagbati bahin sa buluhatong pagsangyaw sa maayong balita sa Gingharian?
6 Unsa ka bililhon ang buluhatong pagsangyaw alang kanimo? Sa kalibotan, gibati sa kadaghanan nga ang pagpangabuhi, o bisan kalingawan, labi pang bililhon kay sa relihiyosong mga tulomanon. (2 Timoteo 3:4; 1 Juan 2:16) Bisan pa niana, si Pablo misulat kang Timoteo: “Tagda kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat mo niini maluwas mo ang imong kaugalingon ug kadtong magapatalinghog kanimo.” (1 Timoteo 4:16) Nabatonan ba nimo kining hunahunaa? Nahinumdom ka ba usab sa pasidaan ni apostol Pedro nga kinahanglan nga ‘ibutang nimo sa hunahuna ang presensiya sa adlaw ni Jehova’? (2 Pedro 3:12) Kon mao, nan ikaw nasayod nga ang pagsangyaw sa maayong balita sa Gingharian maoy butang dinalian. Kini basin magtukmod kanimo sa paglihok sa mga paaging mopatim-awng katingad-anan alang sa mga dili-Saksi.
7. Unsang lakang ang gikuha sa daghan bahin sa buluhatong pagsangyaw? Ngano?
7 Pananglitan, si John, usa ka maestro sa Ghana, nag-isip nga ugdang sa Kasulatan. Busa siya miluwat sa iyang trabaho aron mogugol ug mas daghang panahon sa pagsulti sa mga silingan mahitungod sa Gingharian sa Diyos. Si Brian, usa ka Ingles nga batan-on, misakripisyo sa iyang higayon sa pagtungha sa unibersidad aron siya mahimong bug-os-panahong magwawali; ug si Eve, usa ka Amerikana, miundang sa kolehiyo tapos sa pila ka semestre tungod sa samang hinungdan. Ang mao bang mga batan-on dili praktikal o hungog? Sa pagkamatuod, alang kang bisan kinsa nga nagaisip nga ugdang sa Bibliya, ang ilang gibuhat maoy makataronganon. Halayo sa pagpameligro sa ilang kaugmaon, sila mibulig sa pagseguro niana. Sumala sa giingon ni Pablo, ang buluhatong ilang gipili nagkahulogan sa kaluwasan, ‘alang kanila ug niadtong magapatalinghog kanila.’—1 Timoteo 4:16.
Usa ka Lahing Matang sa Pamatasan
8. Unsang prinsipyo sa Bibliya sa Hebreohanon 1:9 ang motabang usab sa paghimo sa mga Saksi ni Jehova nga lahi?
8 Aniay laing prinsipyo nga nagapalahi sa mga Kristohanon gikan sa kalibotan: “Gihigugma mo ang pagkamatarong ug gidumtan mo ang pagkamalapason.” (Hebreohanon 1:9) Sa konteksto, kining mga pulonga gitumong kang Jesu-Kristo, apan giila sa mga Saksi ni Jehova nga kana nagataganag usa ka sukdanan alang usab sa mga Kristohanon. (1 Pedro 2:21) Kinahanglang atong higugmaon kon unsay ginaingon sa Diyos nga matarong ug dumtan kon unsay ginaingon sa Diyos nga malapason.
9. (a) Unsa ang pipila ka matang sa pagkamalapason? (b) Sa unsang paagi ang tinamdan sa Kristohanong kongregasyon bahin sa pagkamalapason lahi sa iya sa kalibotan?
9 Gipaila ni apostol Pablo ang pipila ka matang sa pagkamalapason niining mga pulonga: “Ang mga makihilawason, mga tigsimbag diyosdiyos, mga mananapaw, mga lalaking gitipigan alang sa dili-kinaiyanhong mga katuyoan, mga lalaking modulog sa mga lalaki, mga kawatan, mga tawong dalo, mga palahubog, mga tigpasipala, mga tikasan dili magapanunod sa gingharian sa Diyos.” (1 Corinto 6:9, 10) Karong adlawa, ang kalibotan matinugoton sa tuman, ilabina kon bahin sa moralidad. Apan ang mga sukdanan sa Bibliya dili mabalhinon. Ang Bibliya nagaingong ang Kristohanong malangkit sa imoral nga mga buhat angay nga mahigugmaong tabangan sa pagbag-o sa iyang dalan. (Galacia 6:1; Santiago 5:19, 20) Kon siya dili magbag-o, nan siya pagalikayan sa mga Kristohanon.—1 Corinto 5:9-13.
10. Nganong ang mga Saksi ni Jehova kinahanglang manalipod sa ilang kaugalingon gikan sa malapasong mga buhat?
10 Nagbutangbutang ang pipila nga kining paagiha sa pagdumala sa mga butang maoy dili mahigugmaon o pagkapanatiko. Ilang palabihon ang labi pang liberal nga paagi sa kalibotan. O naamgohan mo bang ang maong mga lihok labaw pang nagapadayag sa pagdumot sa malapasong mga buhat kay sa dili paghigugma sa makasasala. Ug nasabtan mo bang ang Kristohanong kongregasyon kinahanglang molihok niining paagiha aron kini magpabiling Kristohanon? Matud ni Santiago: “Ang relihiyon nga pagadawaton sa Diyos nga atong Amahan ingong putli ug walay-ikasaway mao kini: . . . ang paghupot sa kaugalingon nga walay buling sa kalibotan.” (Santiago 1:27, New International Version) Sa unsang paagi ang usa ka pundok makaangkong nakabaton sa matuod nga relihiyon kon motugot nga kini mahugawan sa seryosong sala?
11. Sa unsang paagi ang Kristohanong mga sukdanan magaapektar sa sinultihan sa Kristohanon?
11 Ang ‘pagdumot sa daotan’ sa usa ka Kristohanon makaabot pa sa halayo. Ang Bibliya nagaingon: “Ayaw ninyo paghisgoti ang pakighilawas ug ang kahugawan sa tanang matang o ang kadalo sa inyong taliwala, maingon nga nahiangay kini sa balaang katawhan; ni ang makauulaw nga pamatasan o ang sulting binuang o ang mahilas nga panistis.” (Efeso 5:3, 4) Busa ang matuod nga mga Kristohanon nailhan taliwala sa ilang mga kauban tungod sa dili paggamit sa hugaw nga sinultihan, pag-estorya sa malaw-ay nga mga tistis o pagkalipay sa paghisgot sa hugaw nga mga butang. Ang mahinlong hunahuna ug mahinlong sinultihan mausbawong nagakatalagsaon karong adlawa.
12 Ang mga Saksi ni Jehova lahi gani kon bahin sa kalingawan. Sanglit “ang tibuok kalibotan nahiluna sa gahom sa usang daotan,” sila nakakat-on sa pag-amping bahin sa kalingawan nga itanyag sa kalibotan. (1 Juan 5:19) Ilang ginalikayan sa bug-os ang daghang mga dula sa parti, mga magasin, video, pelikula, musika, ug mga salida sa telebisyon nga dunay demonyohanon o pornograpikanhong unod, o nagapasiugda sa daotan, sadistikong kapintasan. Sila mabinantayon, usab, sa gitawag pamilyahanong kalingawan nga mopasiugda sa pagkamahilayon o matinugotong mga ideya nga ang mga Kristohanon dili makauyon. (1 Corinto 15:33) Si bisan kinsang nagaisip nga ugdang sa Bibliya dili mangitag kalingawan diha sa mga butang nga angay dili gani pagahisgotan taliwala sa mga Kristohanon.
13. Pagkamubo bag pangisip ang pagpiot sa atong kaugalingon bahin sa kalingawan? Isaysay.
13 Kini mao ba ang imong hunahuna? O imo bang gibating ang maong mga hunahuna nagahimo sa mga Saksi ni Jehova nga mubog-pangisip o mapioton? Kon mao, palandonga: Kon madiskobrehang nahugawan ang usa ka produktong pagkaon ug kuhaon dihadiha gikan sa mga estante sa tindahan, ang mga pumapalit dili moreklamo nga gipiotan ang ilang kagawasan tungod kay sila dili na makapalit niana. Hinunoa, sila malipay nga mapanalipdan gikan sa pagkahilo sa pagkaon. Ang mga Saksi ni Jehova, sa susama, dili moreklamong ang ilang kagawasan mapiotan sa dihang ipunting kanila ang kahugawan sa kadaghanang kalingawan sa kalibotan. Hinunoa, sila mahupayan nga mapanalipdan gikan sa kapeligrohan nianang kahugawana.
Sila Nahigugma sa Usag Usa
14. Unsang hiyas ang giingon ni Jesus magapalahi sa Kristohanong komunidad gikan sa kalibotan alirong niini?
14 Ania ang laing sukdanan sa pagkabulag sa Kristohanon sa kalibotan. Sa gabii una siya mamatay, si Jesus miingon ngadto sa iyang mga sumusunod: “Pinaagi niini ang tanan mahibalo nga kamo akong mga tinun-an, kon kamo adunay gugma sa inyong taliwala.” (Juan 13:35) Nganong ang gugma mahimong usa ka ilhanan alang sa mga tagagawas? Tungod kay, sa katibuk-an, ang kahimtang sa kalibotan karong adlawa maoy sumala gayod sa giingon ni Pablo nga maingon kini: “Ang mga tawo mahimong mga mahigugmaon sa ilang kaugalingon, mga mahigugmaon sa salapi, . . . walay gugma nga kinaiya.” (2 Timoteo 3:2, 3) Sa maong silinganan, ang tibuok-kalibotang komunidad sa katawhang adunay gugma sa ilang taliwala mahimong katingalahan. Ang maong panag-igsoonay nagalungtad taliwala sa mga Saksi ni Jehova.—1 Pedro 2:17.
15. Unsa ang pipila ka kahimtang nga niana ang mga Saksi ni Jehova adunay higayon sa pagpakitag gugma sa usag usa?
15 Kining gugmaha mamatikdan kaayo ug kadaghanan komentohan sa mga tagagawas sa dihang ang mga Saksi magkatigom sa ilang mga kombensiyon. Kon adunay dagkong mga katalagman, ang mga Saksi moanha dayon, nga magadalag hinabang sa ilang mga igsoon. Ug sulod sa kongregasyon, ang matuod nga mga Kristohanon nagapakitag gugma ug konsiderasyon sa usag usa. Bisan pag adunay mga suliran sa personalidad, sila nagapaningkamot gayod sa ‘pag-antos sa usag usa ug pagpasaylo sa usag usa nga madagayaon.’—Colosas 3:12-14.
Dili Nila Pandolon ang Usag Usa
16. (a) Unsang kahimtang nga gihisgotan ni Pablo ang mihatag sa unang-siglong mga Kristohanon sa maayong higayon sa pagpakita sa giladmon sa ilang gugma sa usag usa? (b) Unsang prinsipyo ang iyang gisaysay nga dunay daghang modernong kapadapatan?
16 Ang maong gugma nagahimo sa mga Saksi nga lahi sa laing paagi. Karong adlawa, daghan ang mahunahunaon ug sa pagkaabughoan nagapanalipod sa ilang mga katungod. Apan, si apostol Pablo mihatag sa lahing sukdanan: “Atong tinguhaon ang mga butang nga madaiton ug ang mga butang nga makapalig-on sa usag usa.” (Roma 14:19) Sa konteksto, si Pablo naghisgot mahitungod sa usa ka sulirang naglungtad niadto bahin sa pagkaon. Ang mga Kristohanon, nga lahi sa mga Hudiyong ilalom sa Moisesnong Kasugoan, libreng mokaon sa bisan unsang gusto nila basta sila dili mahimong ulitan. Apan, ang pipila nga sukad sa pagkabata nag-isip sa pipila ka kalan-on ingong dulumtanan, natugaw dihang ilang nakitang ang isigka-Kristohanon nga nagkaon niana. Ang mao bang mga Kristohanon mipugos sa pagkaon sa bisan unsang buot nila? Wala kon ilang gisunod ang tambag ni Pablo. Matud niya: “Maayo ang dili pagkaon sa unod o pag-inom sa bino o pagbuhat sa bisan unsa nga tungod niana mapandol ang imong igsoon.” (Roma 14:21) Pagkamahigugmaong tambag! Hisabtan ba nimo sa unsang paagi kini makagiya kanato diha sa ubang natad?
17, 18. (a) Sa unsang paagi ang prinsipyo sa Roma 14:21 ikapadapat kon bahin sa maisog nga ilimnon? (b) Sa unsang paagi kini ikapadapat kon bahin sa sinina? (c) Unsang laing mga natad ang imong mahunahunaan nga niana ang pagpadapat niining prinsipyoha mismo motabang kanato sa pagpakitag gugma sa usag usa?
17 Pananglitan, ang Bibliya nagatugot sa mga Kristohanon sa pag-inom nga kasarangan sa maisog nga ilimnon. (1 Timoteo 3:8; 5:23) Apan ang pipila sensitibo mahitungod sa maisog nga ilimnon. Ang uban wala maanad niana o dili makaangay niana. Kon anaa ka sa usa ka salusalo uban sa tawong sama niana, sulayan ba nimo ang pagpugos o pag-ulaw-ulaw kaniya aron moduyog kanimo sa pag-inom ug alkoholikong ilimnon? O dili ba hinuon ikaw mismo molikay aron siya dili maproblema?
18 Palandonga ang laing pananglitan: ang bahin sa sinina. Ang Bibliya wala magbatbat kon unsang matanga sa sinina ang igasul-ob sa Kristohanon, bisan tuod kini nagaingong kini kinahanglang makasaranganon ug hinlo. (1 Timoteo 2:9) Karong adlawa, ang kadaghanang nasod dunay pila ka lagda sa sinina nga giisip nga dalawaton sa pormal nga katilingban. Kasagaran, kining kalagdaana nagatugot sa makataronganong pagkadaiya, apan ang dakong pagbulag niana mopatim-aw nga pagkamagarbohon sa kaugalingon, pagkaunodnon, o pagkabuangbuangon. Ang mga Kristohanon, mga lalaki ug mga babaye, kinahanglang magbutang niini sa hunahuna. Andam ka ba sa paglimite sa imong kagawasan bahin sa sinina tungod sa maayong balita ug aron dili ka makapandol sa imong mga igsoon?
19-21. (a) Nganong ang mga Saksi ni Jehova naningkamot sa paghupot sa ilang pagkabulag sa kalibotan? (b) Sa unsang laing natad kita angay maningkamot nga mabulag sa kalibotan?
19 Oo, si Jesus husto sa miingon siyang ang mga Kristohanon mahimong “dili bahin sa kalibotan.” (Juan 17:16) Sa pagsangyaw sa maayong balita, sa paglikay sa daotan, ug sa gugma ug konsiderasyon sa usag usa, ang mga Saksi ni Jehova tinuod nga lahi. Ang maong pagkabulag nagadalag mga panalangin alang sa mga Saksi, nga dili labing menos kay kini nagapanalipod kanila gikan sa daghang sulirang nagahampak sa kalibotan karong adlawa.
20 Gimahal mo ba ug ginaugmad kining pagkabulag diha sa imong kinabuhi? Hinumdomi, kon ang mga Saksi ni Jehova dili gayod bulag, sila labi pang mahisama sa kalibotan, nga ang diyos mao si Satanas nga Yawa. (2 Corinto 4:4) Mawad-an sila sa ilang tin-awng ilhanan ingong ‘balaang katawhan,’ ug mapakyas sa paghupot sa ilang kaugalingon nga “wala mahugawi sa kalibotan.” Busa, sila dili na makabaton sa “putli, wala-mahugawi nga relihiyon, sa mga mata sa Diyos.” (Santiago 1:27, The Jerusalem Bible; 1 Pedro 1:14-16) Kon ikaw nangandoy nga mas mahisama sa kalibotan, hinumdomi ang pasidaan sa Santiago 4:4.
21 Gitagna ni apostol Pablo nga ang laing hiyas magalabi sa kalibotan karong adlawa. Siya miingong ang mga tawo mahimong “mga mahigugmaon sa salapi.” (2 Timoteo 3:1, 2) Katumanan sa iyang mga pulong, ang pagpangagpas sa salapi karon maoy gamhanan kaayo nga alang sa daghan kini ang labing dakong impluwensiya sa ilang mga kinabuhi. Ang mga Kristohanon lahi ba usab niini? Posible bang mabuhi sa kalibotan karong adlawa nga dili mahimong ‘mahigugmaon sa salapi’? Atong pagahisgotan kini sa mosunod nga artikulo.
Makahinumdom Ka Ba?
◻ Nganong pagadahomon sa Kristohanon nga siya malahi sa kalibotan?
◻ Unsang mga kasulatan ang motabang sa mga Saksi ni Jehova sa pagbaton sa hustong panghunahuna bahin sa buluhatong pagsangyaw?
◻ Sa unsang nagkalainlaing paagi ang pagpadapat sa Hebreohanon 1:9 nagahimo sa mga Saksi ni Jehova nga lahi sa kalibotan?
◻ Unsa ang epekto sa pagpadapat sa prinsipyong gisaysay sa Roma 14:21 diha sa ilang pamatasan?
12. Sa unsang paagi ang mga Saksi ni Jehova lahi sa kalibotan kon bahin sa kalingawan?
[Hulagway sa panid 13]
Ang mga Saksi ni Jehova nakakat-on sa pag-amping mahitungod sa kalingawan nga itanyag sa kalibotan