Pagdawat sa Hagit sa Kristohanong Pagkahamtong
“Sa pagsulti sa kamatuoran, motubo kita sa tanang butang ngadto kaniya nga mao ang ulo, si Kristo.”—EFESO 4:15.
1, 2. (a) Sa unsang paagi ‘ang mga bunga sa tiyan’ usa ka ganti? (b) Unsay dahomon sa bag-ong nahimugsong mga masuso?
ANG himsog, abtik nga masuso tinuod makapalipay kaayo. Diyutay ra ang mga tawo nga dili mahimuot sa makalingawng mga kalaki niini. Kini tinubdan sa dili-matapos nga kahinam ug kahimuot, ang sentro sa pagtagad bisan diin kini moadto. Hisabtan, kini gimahal sa mga ginikanan ingong ‘ilang garbo ug kalipay’ bisan pa sa tanang kahago ug kagubot nga ipahinabo niini. Sa pagkamatuod, “ang mga bunga sa tiyan maoy usa ka ganti.”—Salmo 127:3.
2 Apan, bisan pag unsa ka hiligugmaon ang usa ka masuso, unsay mahitabo kon dili kini mohatag ug ilhanan sa pagtubo? Kon magpabilin kini sa maong kahimtang tapos sa daghang bulan o tingali katuigan sa mahigugmaong pag-atiman sa mga ginikanan, nan tin-awng may seryosong suliran. Sa pagkamatuod, ang pagtubo mahimong kaamgid sa kinabuhi; gidahom nato kini sa tanang buhing butang. Kini pamatuod sa gahom sa paglalang ug sa kaalam ni Jehova.—Lucas 2:52.
Kinahanglanon ang Espirituhanong Pagtubo
3. Unsang pagtubo ang gitagna ni Jesus, unsang katumanan ang makita?
3 Katumanan sa tagna ni Jesus, ang pagtubo sa laing matang nagakahitabo. Sa tibuok kalibotan, nagapadayon ang espirituwal nga “pag-ani.” (Mateo 9:37) Sulod sa 1984 nga tuig sa pag-alagad, pananglitan, unom ka nasod mitahog mga aberids nga kapin sa usa ka gatos ka libong magmamantala sa Gingharian. Tulo ra ka tuig nga miagi, sa 1981, duha ra ka nasod ang mitaho niana. Sa miaging unom ka tuig, 827,144 ka bag-ong saksi ni Jehova ang nabawtismohan ug kapin sa 5,000 bag-ong kongregasyon ang naporma. Gipadali ni Jehova ang iyang buluhaton.—Isaias 60:22.
4. Unsa ang resulta sa tibuok-kalibotang pagtubo sa katawhan ni Jehova?
4 Kining mga numeroha nagapakitang duolag usa sa matag tulo ka tawo nga regular nakig-uban sa katawhan ni Jehova ug nagapakigbahin sa buluhatong pagsangyaw karong adlawa ang nabawtismohan sulod sa miaging unom ka tuig. Usa ka ba kanila? Kon mao, ikaw nahimong tinubdan sa dakong kalipay niadtong mibulig kanimo sa pagkakat-on sa kamatuoran, sa tanan nimong Kristohanong kauban ug sa imong langitnong Amahan, si Jehova nga Diyos. (Proverbio 27:11) Sama sa unang tikang nga himoon sa usa ka masuso, ang tikang nga imong gikuha sa pagpahinungod sa imong kaugalingon kang Jehova maoy makapahinam nga hitabo. Kadto nagpasabot sa abante, mauswagong lihok sa imong bahin. Kadto usa ka ilhanan sa pagtubo.
5. Unsang mga pangutana ang angay isukna sa indibiduwal sa iyang kaugalingon? Unsay makatabang sa pagkaplag sa mga tubag?
5 Komosta man sukad niadto? Uban ang mahigugmaong pagtagad sa imong isigka-Kristohanon, nagapakita ka bag ebidensiya sa inanay espirituwal nga pagtubo? ‘Sa unsang paagi ako makaila?’ Tingali mangutana ka. Aw, hinumdomi ang giingon ni apostol Pablo mahitungod sa pagtubo: “Sa bata pa ako, ako nagsulti ingon ug bata, naghunahuna ingon ug bata, nangatarongan ingon ug bata; apan karon nga ako nahamtong na, gihiklin ko na ang mga kinaiya sa usa ka bata.” (1 Corinto 13:11) Busa, dili lamang ang paglabay sa panahon apan ang paghiklin sa “mga kinaiya sa usa ka bata” ang nakapahimo niyang tawong hamtong. Unsa ba ang maong mga kinaiya?
6, 7. (a) Batbata ang usa ka ‘kinaiya sa usa ka bata’ ug ang kapeligrohan niana. (b) Sa unsang paagi mapadayag ang maong kinaiya? Unsa ang mahimong sangpotanan?
6 Usa ka butang bahin sa mga masuso mao nga sila adunay mubo kaayong panahon sa pagtagad. Bisan pag sila mausisaon sa tanang butang alirong nila, sila usab dili matagna, mabalhinon, ug dili mahimutang. Dayag, si bisan kinsang magpabilin sa maong kahimtang anaa sa dakong espirituwal nga kapeligrohan. Lagmit siya “ituyatuya sa mga balod ug ianod-anod sa tanang hangin sa pagtulon-an pinaagi sa panglimbong sa mga tawo, pinaagi sa pagkamalalangon sa pagmugnag kasaypanan,” sumala sa pagbatbat niana ni apostol Pablo sa Efeso 4:14.
7 Ang mga balod ug hangin kalit nga moabot ingon man mahanaw. Karong adlawa, sa dihang giplano nga makaraan ang mga butang, ang mga hilig, uso ug urog moabot ug mahanaw. Ang mga butang giisip nga kinahanglanon sa dili pa dugay bug-os makaraan ug mahikalimtan. Bisan kon kini sa natad sa kalingawan, binistehan ug pamostura, o sa bisan unsa, pagkadili-maalamon—ug pagkabinata—nga mabitik sa kanunayng pagkagusto ug pagbaton sa kinamodernohan sa tanang butang, nga unya malupigan ug daling mahiubos. Sa espirituwal nga mga butang, ang sangpotanan sa maong pagkamabalhinon makadaot.—Itandi ang Santiago 1:6-8.
8. Unsa ang laing ‘kinaiya’ sa espirituwal nga mga bata, ug unsa ang kapeligrohan niini?
8 Ang laing ‘kinaiya sa mga bata’ mao nga sila diyutay kaayog pagsabot kon unsay maayo o daotan, matarong o sayop. Sa susama, ang espirituwal nga mga bata “wala pa mabansay sa ilang mga gahom sa pag-ila sa matarong ug daotan,” ug kana ang hinungdan si apostol Pablo miawhag sa iyang isigka-Kristohanon nga “magpadayon sa pagkahamtong, nga dili magpahimutang pag-usab sa patukoranan.” (Hebreohanon 5:14; 6:1) Kadtong bata sa espirituwal kanunay nagkinahanglan sa pagpasalig nga ang butang ilang gidawat nga kamatuoran mao gayoy kamatuoran, ug ang butang gitudlo kanila nga pagabuhaton mao gayod ang angay pagabuhaton. Ilang gikinahanglan ang tabang bisan sa labing paninugdang mga butang. Kay kon dili sila daling malibog, mahiubos ug hiapsan sa mga pagduhaduha nga makadaot sa ilang pagtuo.
9. Nganong atong pagadawaton ang hagit sa Kristohanong pagkahamtong?
9 Nakamatikod ka ba nga ang mga bata kanunay maikag sa pagbuhat sa ilang makita nga ginabuhat sa mga hamtong? Hinuon, alang kanila kini dula lamang. Sa walay duhaduha, maoy bahin sa kalingawan nga sila makabuhat sa butang buot nilang buhaton nga walay pagdawat sa responsibilidad nga duyog niana. Kon buot sabton, kana mao ang kinabuhi sa usa ka bata. (Tan-awa ang Mateo 11:16, 17.) Apan duyog sa pagtubo ug kaugmaran anaa ang katungdanan ug responsibilidad. Kini usa ka hagit nga kinahanglang tabangan ang bata sa pagdawat. Kon unsa ka maayo ang iyang pagsanong niana magatino, sa dakong bahin, sa iyang kalamposan o kapakyasan sa kinabuhi sa kaulahian. Sa espirituwal nga paagi, labi pang hinungdanon nga ang matag usa kanato ugdang magapalandong sa hagit sa Kristohanong pagkahamtong. Andam ka ba, nga ikag pa, sa pagdawat sa responsibilidad nga duyog sa pagkahimong bug-os dako na, hamtong, espirituwal nga tawo? O ikaw ba yanong nagapaanod-anod, nga ang uban ang imong gipapas-an sa responsabilidad alang kanimo?—Galacia 6:4, 5.
Kristohanong Pagkahamtong—Unsa ba Kini?
10. Nganong giawhag ni Pablo ang Hebreohanong mga Kristohanon nga “magpadayon sa pagkahamtong”?
10 Sa giawhag ni apostol Pablo ang mga Kristohanon nga “magpadayon sa pagkahamtong,” unsay diha sa iyang hunahuna? (Hebreohanon 6:1) Ang konteksto nagapakita nga sa sinugdan may daghang ikasulti ngadto sa Hebreohanong mga Kristohanon mahitungod sa “hataas nga saserdote sumala sa laray ni Melkisedek,” si Jesu-Kristo. Apan iyang gibati nga sila dili pa andam alang niana kay ang diha sa iyang hunahuna “lisod man nga ipatin-aw.” (Hebreohanon 5:10, 11) Hinunoa, iyang gipahinumdoman sila: “Nagakinahanglan pa diay kamog gatas, dili sa pagkaon nga magahi. Kay ang matag usa nga nagainom pa ug gatas dili pa sinati sa pulong sa pagkamatarong, kay siya bata pa. Apan ang magahing pagkaon maoy alang sa mga hamtong, alang kanila si kinsa pinaagi sa paggamit nabansay sa pag-ila sa matarong ug sa daotan.”—Hebreohanon 5:12-14; itandi ang Judas 3.
11. Unsay kahulogan sa pagkahamtong?
11 Nan, nagkahulogan ba kini nga ang pagkahamtong mao lamay pagbatog kahibalo sa halalom nga mga butang sa Bibliya? Bisan tuod ang Kristohanong pagkahamtong nagaapil sa kahibalo ug pagsabot sa Bibliya, adunay labaw pa niana. Ang pagsabot sa mga pulong gigamit ni apostol Pablo motabang kanato sa pagsabot nga mas tin-aw sa butang. Ang Gregong pulong nga gihubad “pagkahamtong” maoy te·leioʹtes, ug ang adhetibong “hamtong” gihubad gikan sa teʹlei·os. Kining mga pulonga may kalangkitan sa teʹlos, nga nagkahulogan “kataposan.” Ang Expository Dictionary of New Testament Words ni W. E. Vine, sa ingon nagasaysay nga ang pagkahamtong (teʹlei·os) “nagkahulogan nga nakaabot na sa kataposan (teʹlos), natapos, nabug-os, hingpit.” Sa ingon, ang usa ka hamtong nga Kristohanon maoy usa nga nakakab-ot sa usa ka tinong kataposan, o tumong. Unsa ba ang maong tumong?
12. Sumala sa Efeso 4:11-13, unsay nalangkit sa pagkahamtong?
12 Si apostol Pablo, sa Efeso 4:11-13, misaysay nga si Kristo Jesus, ingong ulo sa Kristohanong kongregasyon mihatag sa daghang tagana sa pagtabang sa “mga balaan” sa pagkab-ot sa maong tumong, nga mao, aron “kitang tanan makakab-ot sa pagkausa sa pagtuo ug sa tukmang kahibalo sa Anak sa Diyos, ngadto sa bug-os nakatubo nga tawo, sa sukdanan sa tinuboan nga iya sa kabug-osan ni Kristo.” Dinhi, ang pagkahamtong, o bug-os nakatubo (Grego, teʹlei·os), nalangkit dili lamang ngadto sa pagbatog “tukmang kahibalo” kondili ngadto usab sa “pagkausa sa pagtuo” ug pagtandi sa atong kaugalingon sumala sa tinuboang nakab-ot ni Kristo.
13. Nganong walay Kristohanong pagkahamtong kon wala ang “pagkausa sa pagtuo”?
13 Ang “pagkausa sa pagtuo” nagkahulogan sa panaghiusa. Una makakat-on ang usa ka tawo sa “usa ka pagtuo,” tingali siya may kaugalingong mga ideya ug mga opinyon kon unsaon pagbuhat ang mga butang, kon unsa ang matarong ug kon unsa ang daotan ug uban pa. (Efeso 4:4, 5) Kon tugotan niyang magpadayon ang maong mga ideya, siya malisdan kaayo sa pagtubo sa espirituwal. Si Pablo nagtawag sa mga Kristohanon sa karaang kongregasyon sa Corinto nga “mga bata diha kang Kristo” ug “unodnon” tungod kay sila nabahinbahin sa “pangabubho ug panag-away,” nga ang pipila nag-angkong nagsunod kang Pablo, ang uban kang Apolos. (1 Corinto 3:1-4) Busa, daling hisabtan nga ang panaghiusa o “pagkausa sa pagtuo,” nagaduyog sa Kristohanong pagkahamtong. Wala ang usa kon wala ang lain. Busa, kinahanglang suknaon nato ang atong kaugalingon: Gibiyaan na ba nato ang kanhing kalibotanong panghunahuna? Nasabtan ba nato ang kahinungdanon sa panaghiusa sa hunahuna ug buhat uban sa katawhan ni Jehova? Ang “pagkausa sa pagtuo” kinahanglanon kaayong sangkap sa Kristohanong pagkahamtong.—Efeso 4:2, 3.
14. Sa unsa pa nalangkit ang pagkahamtong?
14 Ang Kristohanong pagkahamtong nalangkit usab sa pagbaton sa “sukdanan sa tinuboan nga iya sa kabug-osan ni Kristo.” Unsay kahulogan niini? Si Pablo nagpadayon sa pag-ingon nga kadtong nakakab-ot sa maong tinuboan dili na mga bata, “nga gituyatuya sa mga balod ug gianod-anod dinhi ug didto sa tanang hangin sa pagtulon-an pinaagi sa panglimbong sa mga tawo” nga malalangong nagamugnag kasaypanan. Hinunoa, ilang nabatonan ang tukmang kahibalo sa kamatuoran. Sila nakatubo sa gugma ni Kristo, ug sila nagapadayag sa ubang diyosnong mga hiyas, sama sa kaalam, pagkamatarong, ug gahom. (Efeso 4:13, 14; Juan 15:12, 13; 1 Corinto 1:24, 30; 2:7, 8; Proverbio 8:1, 22-31) Bisan tuod kita, ingong dili-hingpit nga mga tawo, tingali dili makakab-ot sa bug-os sa ‘tinuboan ni Kristo,’ kita tinong makahimo kaniyang atong Sulundan, nga magabutang alang sa atong kaugalingon sa kataposan, o tumong, nga mao ang pag-ugmad sa samang matang sa diyosnong pagkatawo. (Colosas 3:9) Sa gidak-ong kita nagatinguha sa maong tumong kita mahamtong.
Pagtubo Pinaagi sa Gugma
15. Unsa ang unang tikang sa pagtinguha sa pagkahamtong?
15 Kay nakahisgot na sa kahulogan nga nasulod sa terminong “Kristohanong pagkahamtong,” kinahanglang kita masayod kon unsaon nato pagkab-ot niana. Sumala sa ato nang nakita, ang Hebreohanon 6:1 nagapakita sa pangagpas sa Kristohanong pagkahamtong adunay tinong patukoranan nga ibabaw niana kita magatukod. Dihang mahimo na kini, ang dugang paningkamot ikatumong ngadto sa pagpadayon sa pagkahamtong. Nahauna sa nagkalainlaing mga elemento nga naglangkob sa maong patukoranan mao ang “paghinulsol sa patay nga mga buhat.”
16. Gikan sa unsang “patay nga mga buhat” nga kinahanglang kita maghinulsol?
16 Dayag, ang “patay nga mga buhat” magaapil sa mga buhat sa nahulog nga unod, nga, kon dili pugngan, motultol sa kamatayon. Kita daling makaila sa dihadihang mga paglapas sama sa pakighilawas, kahugawan, malaw-ay nga kagawian, pagsimbag diyosdiyos, ug espiritismo ingong kasal-anan, ug atong gilikayan kana. Apan ang mga buhat sa unod, ang “patay nga mga buhat,” nagaapil usab sa matawag tingali sa pipila nga mga kinaiya sa pagkatawo sama sa mga pagkontrahanay, pag-away, pangabubho, mga kasuko, mga panagbingkil, mga pagbahinbahin, pundokpundok, ug mga kasina. (Galacia 5:19-21) Gawas nga atong hukason ang maong mga kinaiya sa pagkatawo ug pulihan sa “bag-ong pagkatawo nga nalalang sumala sa kabubut-on sa Diyos diha sa matuod nga pagkamatarong ug pagkamaunongon,” dili gayod posible nga ang usa mouswag ngadto sa pagkab-ot sa Kristohanong pagkahamtong.—Efeso 4:22-24.
17. Unsa pa ang maisip nga “patay nga mga buhat”? Ngano?
17 Gawas sa mga buhat sa unod, ang “patay nga mga buhat,” nga kinahanglang atong hukason gikan sa atong kaugalingon nagaapil usab sa mga buhat ug mga pangagpas nga sa espirituwal patay, kawang, ug dili mabungahon. Kana gilangkoban sa mga proyektong panapi nga daling makapadato. Kana mahimong ang ambisyoso mohurot-ug-panahong mga plano alang sa hataas nga edukasyon o mahimong kana kalibotanong mga proyekto alang sa sosyal nga reporma, pakigdait, ug uban pa. Kining tanang butanga tingali mopatim-aw nga may pila ka kaayohan sa kaugalingon, apan kana “patay nga mga buhat” tungod kay kana nagkahulogan sa espirituwal nga kamatayon niadtong malambiggit kanila. Ang tanang interesado sa espirituhanong pagkahamtong kinahanglang ‘maghinulsol’ o mohunong sa pagpangagpas sa maong “patay nga mga buhat” ug mosunod sa tambag ni Jesus nga “Nan, magpadayon sa pagpangita pag-una sa gingharian ug sa pagkamatarong [sa Diyos].”—Mateo 6:33.
18, 19. (a) Sa Efeso 4:15, unsay gipasabot sa “pagsulti sa kamatuoran”? (b) Sa unsang paagi kini nalangkit sa Kristohanong pagkahamtong?
18 Sa diha nga matukoran na ang patukoranan, nan unsa man? Si Pablo nagtambag: “Apan sa pagsulti sa kamatuoran, motubo kitang tanan tungod sa gugma diha sa tanang butang ngadto kaniya nga mao ang ulo, si Kristo Jesus.” (Efeso 4:15) Una sa tanan, atong mamatikdang gihisgotan ni Pablo ang panginahanglan nga “magsulti sa kamatuoran.” Kining mga pulonga dayag naglangkit ug labaw pa sa yanong pagsulti; kini nagkahulogan gayod sa “paghupot sa kamatuoran.” (Kingdom Interlinear) Ang ubang hubad nagahubad niini ingong “pagkinabuhi sa kamatuoran”; “mahigugmaong pagsunod sa kamatuoran sa tanang panahon—pagsulti nga maminatud-on, pakiglabot nga maminatud-on, pagkinabuhing maminatud-on”.—Efeso 4:15, The Jerusalem Bible; The Living Bible.
19 Busa, ang pagpangagpas sa Kristohanong pagkahamtong nagkinahanglan nga atong huptan, o labanan ang kamatuoran pinaagi sa atong paagi sa pagkinabuhi, pagsulti, paglihok, ug pagpakiglabot sa uban. Kini nagkahulogan sa pagpadapat diha sa atong matag-adlaw nga buluhaton sa kahibalo sa Bibliya nga atong nabatonan ug sa ingon mahiapil “niadtong si kinsa pinaagi sa paggamit nabansay sa ilang mga gahom sa salabotan sa pag-ila sa matarong ug daotan.” (Hebreohanon 5:14) Ginabuhat mo ba kini? Nagapangatarongan ka ba nahiuyon sa mga prinsipyo sa Bibliya inig-atubang nimo sa usa ka desisyon? Nagadawat ka ba sa hagit sa pagkahimong hamtong nga Kristohanon, nga magalaban sa kamatuoran pinaagi sa pulong ug buhat, o nagapalabi ka bang magpabiling bata sa espirituwal, nga nahigawas sa mga responsibilidad ug libre sa pagtinguha sa imong mga pangibog ug kagustohan?
20, 21. (a) Sa unsang paagi ang gugma nalangkit sa pagtubo ngadto sa pagkahamtong? (b) Unsang mga pangutana ang nagapaabot sa dugang paghisgot?
20 Si Pablo nag-ingon: “Motubo kita tungod sa gugma diha sa tanang butang ngadto kaniya nga mao ang ulo, si Kristo.” (Efeso 4:15) Dinhi si Pablo nagpunting sa sentro sa butang—ang motibo o panukmod. Sa 1 Corinto 13:1-3 iyang gipakita nga ang mga buhat nga bililhon unta mahimong bug-os walay kapuslanan kon kana buhaton nga walay tukmang panukmod. Busa kinahanglang susihon nato ang atong panukmod alang sa tanang butang atong ginabuhat. Gihimo ba kana aron tan-awon sa uban, aron magpadayeg kanila aron hunahunaon nilang kita hamtong? O, hinunoa, kana ba gibuhat tungod sa gugma sa Diyos ug gugma sa atong silingan? Kon ang gugma mao ang atong panukmod, kita “motubo sa tanang butang,” nga mahimong timbang, kasaligan, hamtong nga mga Kristohanon, nga bug-os nagaila “kaniya nga mao ang ulo, si Kristo.”
21 Samtang ang pagpaningkamot sa pagkab-ot sa Kristohanong pagkahamtong maoy angayang tumong, kini dili mao ang kataposan. Inigkakab-ot sa usa ka tawo sa maong tumong, may dugang pa bang mabuhat niya? Komosta kadtong diha na sa kamatuoran sa daghang katuigan ug nakakab-ot sa tumong sa Kristohanong pagkahamtong? Kini atong pagahisgotan sa sunod artikulo.
Makasaysay Ka Ba?
◻ Unsa ang pila ka “kinaiya sa usa ka bata,” ug unsay mga kapeligrohan niana?
◻ Sa unsang paagi ang “pagkausa sa pagtuo” ug “kabug-osan ni Kristo” nalangkit sa pagkahamtong?
◻ Sa pagkab-ot sa Kristohanong pagkahamtong, unsang “patay nga mga buhat” ang kinahanglang atong biyaan?
◻ Sa unsang paagi ang usa “motubo tungod sa gugma”?
[Blurb sa panid 9]
SA MILABAY NGA UNOM KA TUIG
—827,144 ka bag-ong Saksi ang nabawtismohan
—Kapin sa 5,000 ka bag-ong kongregasyon naporma
—Niadtong nagapakigbahin karon sa buluhatong pagsangyaw, usa sa matag tulo nabawtismohan niining panahona
[Blurb sa panid 9]
Sa 1984 tuig sa pag-alagad, unom ka nasod nag-aberids ug kapin sa usa ka gatos ka libong magmamantala sa Gingharian
[Hulagway sa panid 11]
Daghan karon nagapalabi sa ministeryo kay sa materyalistikanhong mga pangagpas