Pagpalambo sa Pinakamaayong Panaghigala sa Tibuok Uniberso
“Apan ikaw, O Israel, akong alagad, ikaw, O Jacob, nga akong gipili, ang kaliwat ni Abraham nga akong higala.”—ISAIAS 41:8.
1. Nganong ang tinuod nga panaghigalaay dili gayod mapakyas?
PAGKABILILHON sa usa ka tinuod nga higala! Apan unsay basehanan sa pagbaton ug tinuod nga higala? Unsa ang gamot sa usa ka malungtarong panaghigala? Usa kini ka kinaiya nga dili gayod mapakyas, busa ang tinuod nga higala dili gayod mapakyas. Unsa man kini? Buweno, usa kini ka hiyas nga gikutlo ni apostol Pablo sa pag-ingon, “Ang gugma dili gayod mapakyas”!—1 Corinto 13:8.
2. Unsa ang espesyal nga kahulogan sa berbo nga gikuhaan sa Gregong pulong alang sa “higala”?
2 Diha sa Hebreohanong Kasulatan, ang nombreng gihubad “gugma” gikuha sa berbo nga nagkahulogang “sa paghigugma.” (Deuteronomio 6:4, 5; itandi sa Mateo 22:37.) Ug diha sa Greek Septuagint Version, ang berbo nga gihubad “kinahanglang imong higugmaon” nagagikan sa teksto sa Hebreo nga a·ga·panʹ. Apan, nianang karaang bersiyon ug diha sa Kristohanon Gregong Kasulatan ang nombreng gihubad nga “higala” wala ibase nianang maong berbo kondili sa Gregong nombreng phiʹlos, nga gikan sa berbo nga nagkahulogang “sa pagmahal sa.” Busa, sumala sa orihinal nga Grego, ang mahigugmaong pagmahal ipakita diha sa usa ka higala o taliwala sa mga higala. Bisan sa pinulongang Iningles ang pulong “friend” (higala) gikuha gikan sa Anglo-Saxon nga berbo nga nagkahulogang “sa paghigugma.”
3. Kon itandi sa gugma sa Diyos alang sa kalibotan sa katawhan, unsang matang sa gugma nabugkos ang mga disipulo ni Jesus kaniya?
3 Busa ang Gregong berbo nga gikan niini gikuha ang pulong “higala” nagpahayag ug emosyon nga mas mainit ug mas suod kay sa gugma nga gipahayag sa berbong a·ga·panʹ, nga makita sa Gregong teksto sa Juan 3:16, nga niini gikutlo si Jesus nga nag-ingon: “Gihigugma gayod sa Diyos ang kalibotan nga tungod niana gihatag niya ang iyang bugtong Anak, aron ang tanan nga motuo kaniya dili malaglag kondili may kinabuhing dayon.” Busa ang gugma (Grego, a·gaʹpe) ni Jehova nga Diyos sangkad kaayo sa paglangkit sa tibuok kalibotan sa katawhan bisan pa sa pagkamakasasala sa tawhanong rasa. Apan gisugo sa bugtong Anak sa Diyos ang iyang 11 ka matinumanong mga apostoles nga sila nabugkos kaniya sa mas mainit, mas suod nga matang sa gugma.
Usa Ka Bililhong Matang sa Panaghigala
4. Pinaagi sa pagbuhat ug unsa nga ang mga disipulo ni Jesus padayon nga mahimong iyang “mga higala,” ug unsang panagkasuod nga sila ginadawat?
4 Gisultihan ni Jesus kadtong mga apostoles nga mahimo silang iyang “mga higala” kon sila magpadayon sa pagbuhat sa mga butang nga iyang gisugo kanila nga buhaton. Nagpakita nga naglakip kini sa bulahang pagkasuod tungod sa pagsaligay sa usag usa, siya miingon: “Dili ko na kamo nganlan nga mga ulipon, kay ang ulipon dili masayod sa ginabuhat sa iyang agalon. Apan ginganlan ko kamo nga mga higala, kay ang tanan nga nadungog ko gikan sa akong Amahan kini gipahibalo ko man kaninyo.” (Juan 15:14, 15) Sa pagsulti niana, gigamit ni Jesus ang terminong phiʹlos sa matag usa sa mga apostoles.
5. Gipasukad sa unsa ang panaghigala nga gipunting sa Proverbio 18:24, ug unsa ka lig-on kanang relasyona?
5 Sumala sa Proverbio 18:24, ang dinasig nga tawong maalamon miingon: “Adunay matang sa mga higala nga nagtinguha sa pagbungkag sa usag usa, apan adunay matang sa higala nga mounong labaw pa kay sa igsoon.” Kining matanga sa panaghigala wala ipasukad sa unodnong mga relasyon; kini gipasukad sa pagpabili sa tinuod nga bili sa usa nga gipakighigala. Oo, ang mga paryente sa unod mobulag sa usag usa tungod sa nagkalainlaing mahakugong mga rason, apan ang malig-ong higala dili gayod matarog ug magpabilin sa iyang pagkahigala bisan pa sa masulayon o malisod nga mga kahimtang, o sa nagatugkad sa kasingkasing nga mga sirkumstansiyang motungha.
6. Kang kinsang malig-ong panaghigalaay nga kita gipahinumdoman, ug sa unsang paagi gibalosan ni David sa ulahi kanang panaghigalaay?
6 Dinhi atong mahinumdoman si Jonathan, ang anak sa sinalikwayng Haring Saul, ug si David, nga maoy gipili ni Jehova nga Diyos ug gidihogan aron mahimong hari sa Israel. Nagpadayon ang ilang panaghigala hangtod nga namatay si Jonathan diha sa panggubatan. Sa pagkadungog sa makasubong balita, nagminatay si David nga natala sa 2 Samuel 1:17-27. Nagpakita kon unsa ka suod ang iyang relasyon kang Jonathan, si David miingon: “Ako nasubo alang kanimo, igsoon ko nga Jonathan, nakapahimuot gayod ikaw kanako. Ang gugma mo kanako katingalahan nga labaw pa sa gugma sa mga babaye.” Ang panaghigala nga sama niana dili hikalimtan o molabay nga dili mabaslan. Kini maoy hinungdan sa pagpakita ni Haring David ug kaluoy kang Mephibosheth, ang nahibiling anak ni Jonathan.—2 Samuel 9:1-10.
7. (a) Namatay ba ang panaghigalaay nga sama nianang kang David ug Jonathan, ilabina sa panahon niining “konklusyon sa sistema sa mga butang”? (b) Unsang kapahayagan sa pagkasuod nga ginadawat nianang panaghigalaa ang usa ka tawo, sumala sa gipahayag ni Jesus ngadto sa iyang matinumanong mga apostoles?
7 Kanang bililhong matang sa panaghigala wala mapanas sa nawong sa yuta. Karon, niining “konklusyon sa sistema sa mga butang” sa dinha ‘ang gugma sa daghan mobugnaw,’ ang kainit nianang mahigugmaong panaghigala mabati pag-ayo taliwala sa dedikado, bawtismadong mga saksi ni Jehova nga Diyos kinsa naghatag sa tibuok kalibotang pagwali nga gitagna ni Jesus. (Mateo 24:3-14) May tendensiya ang mga higala sa pagdayganay sa mga butang sa usag usa tungod kay may pagsalig sa usag usa. Hinumdomi nga samtang nakigsulti sa halawom nga kagabhion uban sa 11 ka apostoles nga miunong kaniya, si Jesus miingon: “Ginganlan ko kamong mga higala, kay ang tanan nga nadungog ko gikan sa akong Amahan kini gipahibalo ko man kaninyo.” (Juan 15:14, 15) Oo, ang espirituwal nga mga butang sa Pulong sa Diyos nga hapit nang matuman o ipadapat ipahibalo una ngadto sa tinuod nga inanak-sa-espiritu nga “mga higala” sa Agalon, si Jesu-Kristo. Dayon kining “mga higalaa” makapribilehiyo ug may kaakohan sa pagpadayag niining tinagong mga butang niadtong nagtinguha sa pagsulod sa mahigalaong relasyon uban kang Jehova nga Diyos, nga kaniya nagatubod ang tinagong mga butang.
8. Kinsay gihatagan ni Jehova ug panagkasuod uban kaniya, ug sa unsang paagi gipunting ni Jesus ang pakigtugon nga nalangkit niini nga pagkasuod?
8 Mao kana ang paagi sa pagsugod ni Jehova sa pagpasulod sa iyang inanak-sa-espiritu nga mga magsisimba ngadto sa iyang bag-ong pakigtugon pinaagi sa Tigpataliwala, si Jesu-Kristo. Sa gisugdan ang Panihapon sa Ginoo, si Jesus miingon: “Kining maong kopa nagkahulogan sa bag-ong pakigtugon pinaagi sa akong dugo, nga igabubo alang kaninyo.” (Lucas 22:20) Kaharmoniya kini sa Salmo 25:14, nga nag-ingon: “Ang pakigsuod kang Jehova iya niadtong mahadlokon kaniya, ug kanila igapadayag niya ang iyang tugon.” Pagkatagsaong kahibalo ang gipadayag ngadto niadtong nakadangat sa mahigalaong relasyon kang Jehova nga Diyos ug sa iyang Tigpataliwala, si Jesu-Kristo!
Sila nga Gipakighigala ni Jehova
9. Usa ba ka pagpangahas alang kanato ang paghunahuna nga magpakighigala si Jehova sa mga tawo lamang, ug unsang mga teksto sa Bibliya ang atong mahatag sa pagpamatuod sa atong tubag?
9 Oh, tinuod bang mahimo natong personal nga Higala ang Labing Hataas ug Labing Makagagahom nga Diyos? Tinuod bang magpakaubos siya sa iyang kaugalingon sa ingon nga sukod aron mahimong atong Higala? Dili pagpangahas ang paghunahuna niini. Diha sa sulat nga gisulat ngadto sa espirituwal nga mga Israelitas sa wala pa malaglag ang Jerusalem sa 70 K.P., si Santiago misulat: “Natuman ang kasulatan nga nagaingon: ‘Si Abraham mituo kang Jehova, ug kini giisip kaniya nga maoy pagkamatarong,’ ug siya ginganlan nga ‘higala ni Jehova.’” (Santiago 1:1; 2:23; Genesis 15:6; Galacia 6:16) Diha sa usa ka “teksto” sa Hebreohanon diin didto mikutlo si Santiago atong mabasa kining pangaliyopo ni Haring Jehosaphat ngadto sa Diyos sa nameligro ang kalig-on sa Jerusalem sa dakong pagsulong: “Wala ba nimo, Oh Diyos namo, papahawaa ang mga pomuluyo niining yutaa gikan sa atubangan sa imong katawhan nga Israel ug ihatag kini sa binhi ni Abraham nga imong kasandurot [“imong higala,” King James Version], sa walay kataposan?” (2 Cronicas 20:7) Dinhi atong makita nga ang gamot nga pulong nga gihubad “higala” (KJ) nagkahulogang “usa ka kasandurot.” Sa walay duhaduha, si Abraham kasandurot ni Jehova, ang Diyos nga nagpagawas kaniya gikan sa Ur sa yuta sa mga Caldeanhon ug gidala siya sa Yutang Saad. Ingong kasandurot, si Abraham mao ang tawo nga higalaon ni Jehova, o mapasulod sa Iyang panaghigala.
10. Diha sa Isaias 41:8, kinsay namulong alang sa iyang kaugalingon bahin sa panaghigala, ug pinasukad sa unsang tinamdan kang Jehova nga gihatagan ug espesyal nga pagtagad si Abraham sa Diyos?
10 Apan, diha sa Isaias 41:8 namulong si Jehova sa iyang kaugalingon ug miingon niining makapadasig nga mga pulong sa mga kaliwat ni Abraham ingong nasod: “Apan ikaw, O Israel, akong alagad, ikaw, O Jacob, nga akong gipili, ang kaliwat ni Abraham nga akong higala.” Gihimaya sa Labing Hataas nga Diyos kining panaghigalaa kang Abraham pinaagi sa pagtawag kaniya nga masilakong kagikan ni Jesu-Kristo, ang Manluluwas sa tanang katawhan, lakip kang Abraham mismo. Kining kaliwat ni Abraham labaw pa kay sa higala ni Jehova nga Diyos, kay siya mao ang pinalanggang Anak sa Diyos.—Juan 3:16.
11 Sumala sa gipadayag na, unsay atong mahukom? Nga posible alang sa tawhanong mga linalang dinhi sa “tumbanan” ni Jehova nga mahimong iyang mga higala. (Isaias 66:1) Siempre, masulayan ang atong bililhong pagpakighigala kaniya niining daang kalibotan, kay si Satanas nga Yawa, “ang Diyos niining sistema sa mga butang,” maningkamot sa pagbungkag niini.—2 Corinto 4:4.
12. Sama kang Job sa yuta sa Uz, unsang butang ang kinahanglan natong buhaton sa atong pagpakighigala sa Labing Hataas?
12 Tagda ang nahitabo nianang tagsaong tawo sa karaang panahon nga ginganlag Job, diin bahin kaniya miingon ang Kristohanong tinun-ang si Santiago: “Tan-awa! Gitawag namong malipayon kadtong nanagpakaantos. Nakadungog kamo mahitungod sa pagkamainantuson ni Job ug nakakita sa balos nga gihatag ni Jehova, kay si Jehova mapuanguron ug maluloy-on kaayo.” (Santiago 5:11) Dili usa ka tawo sa sugilanon si Job apan tinuod gayod nga nabuhi sa yuta sa Uz. Giduhaduhaan sa Yawa ang mainantusong hiyas sa pagpakighigalaay ni Job kang Jehova nga Diyos, ug gitugotan ni Jehova si Satanas sa pagbutang sa mapait nga pagsulay si Job. Pinaagi sa masakit kaayong mga katalagman nga iyang gihatag kang Job, naningkamot si Satanas aron isalikway niya si Jehova. Apan wala mopaluyo si Job sa Yawa pinaagi sa pagsalikway sa Diyos, nga moresulta unta sa kamatayon ni Job sa kiliran ni Satanas sa isyu sa pagmando sa uniberso. Sa kasukwahi, gipamatud-an ni Job nga bakakon si Satanas nga Yawa. Sa yuta, gipamatud-an usab ni Jesus ang samang butang. Apan komusta kita karon? Kadtong nagmahal sa panaghigalaay kang Jehova nga Diyos determinado sa pagdapig sa iyang kiliran niining gumonhap nga gikaikagan sa tibuok nga uniberso. Ug magpadayon sila sa pagbuhat niini hangtod nga si Satanas ug ang iyang mga demonyo sa kataposan itambog sa bung-aw ug pahilomon sa dili pa ang Milenyal nga Pagmando ni Jesu-Kristo.—Pinadayag 20:1-4.
13. Unsa ang pagpakighigala kang Jehova nga Diyos kon itandi sa pagpakighigala sa iyang bugtong Anak, ug unsang dalan ang kinahanglan natong subayon aron dili mahulagwayong maklasipikar nga “mga mananapaw”?
13 Walay pagpakighigala nga naglungtad nga molabaw pa nianang sa Labing Hataas nga Diyos, si Jehova. Ang pagpakighigala uban sa bugtong Anak sa Diyos ang ikaduha. Ang ingon nianang mabinationg relasyon uban kanila magkahulogang kinabuhing walay kataposan diha sa walay kinutobang kalipay alang kanato. Busa tukma silang makapangayo sa atong ekslusibong pagkamaunongon. Dili kita mahimong makigsandurot uban niining hinukman daang kalibotan ug sa samang panahon palamboon ang ilang pagpakighigala. Sa espirituwal nga pagkasulti, dili kita buot nga maklasipar nga mga mananapaw, sumala sa Santiago 4:4, nga prangkang misulti bahin niini ug miingon: “Mga mananapaw, wala ba kamo masayod nga ang pakighigala sa kalibotan maoy pakig-away batok sa Diyos? Busa, bisan kinsa nga buot makighigala sa kalibotan magahimo sa iyang kaugalingon nga kaaway sa Diyos.” Gipunting kadtong mga pulonga sa espirituwal nga mga Israelitas sa unang siglo K.P., apan aplikado usab kini sa mga Saksi ni Jehova nga nagkinabuhi ning ika-20ng siglong kalibotan, o sistema sa mga butang.
Likayi ang Panaghigala nga Mapakyas
14. Mahitungod sa panaghigala, sa unsang paagi makalikay ang mga Saksi sa pag-eksperyensiya nianang gitagna sa Zacarias 13:4-6?
14 Sanglit wala maghimo sa ilang kaugalingon nga mga higala niining daotan, mapintas daang kalibotan, ang mga Saksi ni Jehova gihatagag sayop nga pagsabot, ginadagmalan, ug ginalutos. Maingon man sa labing dakong saksi ni Jehova dinhi sa yuta, si Jesu-Kristo, ug sila sama ra usab kaniya. (Pinadayag 1:5; 3:14) Sanglit padayon sila sa matinuoron sa pagpahiangay sa ilang kaisipan sumala sa Pulong sa ilang pinakamaayong Higala, si Jehova nga Diyos, dili nila maeksperyensiyahan kanang matagnaong gibatbat diha sa Zacarias 13:4-6, diin kini ang nahisulat: “Ug mahitabo niadtong adlawa nga ang mga manalagna mangaulaw, ang tagsatagsa maulaw tungod sa iyang panan-awon sa diha nga magapanagna siya; ug sila dili magsul-ob ug opisyal nga besting balhiboon aron sa paglimbong. Ug siya moingon hinoon, ‘Dili ako manalagna. Ako usa ka mag-uuma lamang, kay ang yuta mao ang akong napanunod sukad pa sa akong pagkabata.’ Ug adunay moingon kaniya, ‘Unsa kining mga samad sa taliwala sa imong mga kamot?’ Unya motubag siya, ‘Kana mao ang gisamad kanako didto sa balay sa akong mga mainitong mga kasandurot [“mga higala,” KJ].’”
15. Nganong ang klerigo sa Kakristiyanohan nanagsul-ob ug espesyal nga mga besti sa publiko, ug kinsay iyang gipakighigala?
15 Sa dugay nang kasiglohan, ang klerigo sa Kakristiyanohan nagsul-ob ug ‘opisyal nga mga besti’ sa katuyoan sa pagkuha sa pagtagad sa ilang relihiyosong propesyon ug sa katuyoan sa pagbayaw sa kaugalingon sa pagpaila kanila gikan sa mga sakop sa ilang mga kongregasyon nga ilang gitawag nga “ang layko.” Mao kini ang gihimo sa mga klero, bisag walay gamayng ebidensiya sa pagpamatuod nga si Jesu-Kristo ug ang iyang mga apostoles ug mga ebanghelisador nga iyang gipadala nagsul-ob ug opisyal nga relihiyosong mga besti sa pagkuhag pagtagad sa ilang pagkabutang ug sa pagpadako niana. Karon ania na kita sa kinailadman sa “konklusyon sa sistema sa mga butang” nga nagsugod sa kataposan sa “tinudlong panahon sa kanasoran,” o “sa panahon sa mga Hentil,” sa tuig 1914. (Mateo 24:3; Lucas 21:24; KJ) Dugay nang naningkamot ang mga klero sa pakigsuod sa pakighigala sa komersiyal, militar, ug sa politikal nga mga elemento ning kalibotana. Kini ilang gihimo alang sa ilang kaugalingong hakog nga kaayohan ug walay pagtulisok sa ilang konsensiya. Apan ang ingon niining matang sa ilang mahakugong pagpakighigala dili molungtad ug dugay!
16. (a) Sumala sa tagna sa Bibliya, unsay himoon sa dili madugay niining kalibotanong “mga higala” ngadto ning klerong matang? (b) Bisan pa sa bag-ong kahimtang, unsang kataposang hitabo ang dili malikayan sa mga klero?
16 Nahimutang ang mga klero ug mga layko sa moderno kaayong panahon sa siyensiya. Nadaot ang kalibotanong mga relasyon sa bug-os tungod sa kapit-osan karong mga panahona. Ang mga klero, bisan pa sa ilang pangangkon nga nagbarog uban sa Diyos sa langit, wala makabaton sa iyang pag-uyon alang sa komersiyal, militar, ug politikal nga mga kahikayan sa mga butang ug wala maghatag kahumpayan sa nagkagrabeng kahimtang sa kalibotan. Sa dili madugay, ang ilang kalibotanong “mga higala” makaamgo nga walay kapuslanan ang mga klero, oo, palas-anon alang kanila, namakak sa ilang mga panagna sa haruhayng panahon sa materyal nga bulag gikan sa Gingharian ni Jehova pinaagi ni Kristo. Sa pagkatinuod, kadtong kalibotanong “mga higala” sa kataposan mapalihok sa pagpakita sa dakong kasuko sa ilang pagkawalay pagsalig, sa ilang kasilag, oo, sa ilang pagdumot. Sa mapintas ilang laglagon ang klero o huboan sila sa ilang propesyonal opisyal nga besti ug pakaubson sila sa usa ka dili-propesyonal, laykong posisyon, sumala sa gibatbat sa Zacarias 13:4-6. Apan kining kausaban sa kahimtang dili makaluwas kanila sa kalaglagan sa Babilonyang Bantogan, ang kalibotanong imperyo sa bakak nga relihiyon, sumala sa gitagna sa Pinadayag kapitulo 17 ug 18. Ang kalibotanong “mga higala” sa mga klero motalikod kanila sa bug-os.
17. Unsang matang sa panaghigala ang takos nga palamboon, ug hangtod kanus-a?
17 Tungod niini, pagkahinungdanon gayod sa pagpalayo gikan sa sayop mahakugong panaghigala! Apan pagkabililhon alang kanato ang pinakamaayong panaghigala sa tibuok uniberso! Takos nga atong palamboon kini sa walay kataposan.
Unsay Imong Pagsabot?
◻ Pinaagi lamang sa pagbuhat ug unsa nga ang mga disipulo ni Jesus padayong mahimong iyang mga higala?
◻ Sa unsang paagi mahibaloan nato nga matagamtam sa mga tawo ang pagpakighigala kang Jehova, ug kang kinsa siya magpakigsuod?
◻ Nganong masulayan ang pagpakighigala uban sa Diyos?
◻ Mahitungod sa panaghigalaay, sa unsang paagi malikayan sa mga Saksi ni Jehova ang eksperyensiya nga gitagna sa Zacarias 13:4-6?
11. Nganong masulayan ang pagpakighigala kang Jehova?
[Hulagway sa panid 9]
Gitagamtam ni Jonathan ug David ang mabination, bililhong panaghigala. Ikaw sab
[Hulagway sa panid 11]
Si Abraham “higala ni Jehova.” Ikaw ba?