Paglakaw nga May Pagsalig sa Pagpangulo ni Jehova
“Magmalig-on kamo ug magmakusganon. Ayaw kamo kahadlok ni malisang sa ilang atubangan, tungod kay si Jehova nga imong Diyos mao ang nagamartsa uban kanimo. Dili ka niya pasagdan ni sa bug-os pagabiyaan.”—DEUTERONOMIO 31:6.
1. Sa unsang paagi si Jehova nagpamatuod nga walay-kasama nga pangulo sa mga Israelinhon?
SI JEHOVA nagpamatuod nga usa ka walay-sama nga pangulo sa gipagula niya ang mga Israelinhon gikan sa kaulipnan sa Ehipto. Dili lamang iyang gigiyahan sila latas sa kamingawan kondili gitagan-an usab niya silag pagkaon ug ilimnon ug gihatagan sila sa walay-sayop nga instruksiyon. Mao nga ang mga Levihanon sa adlaw ni Nehemias nakaingon: “Ikaw, bisan ikaw [Jehova nga Diyos], sa imong dakong kaluoy wala mobiya kanila sa kamingawan. Ang haligi nga panganod wala mobulag sa ibabaw nila sa adlaw sa pagtultol kanila sa dalan, ni ang haligi nga kalayo sa pagkagabii sa pagbanwag kanila sa dalan nga ilang pagaagian. Ug imong gihatag kanila ang imong maayong espiritu aron sila mahimong maalamon, ug wala nimo itungina ang imong manna gikan sa ilang baba, ug imong gihatagan silag tubig alang sa ilang kauhaw. Ug sulod sa kap-atan ka tuig imong gitagan-an silag pagkaon sa kamingawan. Walay nakulang kanila. Ang ilang mga biste wala mangadaan, ug ang ilang mga tiil wala manghubag.”—Nehemias 9:19-21.
2. Nganong si Moises nakaawhag sa mga Israelinhon nga “magmalig-on ug magmakusganon”?
2 Pinaagi sa disiplinang gipadapat uban ang inamahang kalulot, gitudloan sa Balaang Magtutudlo ang mga Israelinhon kon unsay kahulogan nga mahimong makataronganon ug matarong. Ang tanang iyang gibuhat maoy sa ilang labing dakong kaayohan. Bisan pag sila nagbagulbol ug nanukol, siya hataas ug pailob ug wala mobiya kanila. Ilabina sa dihang giatubang nila ang daghan kaayong kaaway nga gihatag ni Jehova ang ebidensiya sa mahanasong pagpangulo ug gipahinabo ang mga kadaotan ibabaw sa mga manunulong. Gisulti ni Moises ang kamatuoran sa gidasig niya ang mga Israelinhon pinaagi niining mga pulonga: “Magmalig-on kamo ug magmakusganon. Ayaw kamo kahadlok o kalisang sa ilang atubangan, tungod kay si Jehova nga imong Diyos mao ang nagamartsa uban kanimo. Dili ka niya pasagdan ni sa bug-os pagabiyaan.” (Deuteronomio 31:1, 6) Ang Diyos “magamartsa” uban kanila kon sila magbatog pagtuo. Pagkadakong panukmod nga kita molakaw nga may pagsalig sa pagpangulo ni Jehova!
Mga Pasidaan Gikan sa Nangagi
3. Wala madugay tapos mahigawas sa kaulipnan sa Ehipto, giunsa pagpakita sa katawhan sa Israel ang pagkadili-mapasalamaton ug kakulang sa pagsalig kang Jehova?
3 Apan, ang mga kasinatian sa mga Israelinhon nagatagana sa mga pasidaan alang kanato. Bisan pag sila napagawas sa pagkaulipon sa Ehipto sa hamubo pang panahon, balikbalik silang nakasala batok sa ilang dili-makitang Pangulo. Sa didto si Moises sa Bukid sa Sinai nga nagdawat sa Kasugoan, ilang gipadayag ang pagkadili-mapasalamaton sa tanang gibuhat sa Diyos alang kanila. Ilang nahaylo si Aaron sa paggamag usa ka bulawang baka ug gisimba kana diha sa gitawag ni Aaron nga “piyesta ni Jehova.” (Exodo 32:1-6) Napulo sa 12 ka espiya nga gisugo sa pagsusi sa Canaan nagpamatuod nga walay pagtuo, kay si Josue lamang ug si Caleb ang miawhag sa katawhan sa pagsulod sa yuta ug pagpukan niana. Apan ang Israel wala molihok uban ang pagtuo sa Diyos, si kinsa sa ingon mihukom nga ang tanang lalaki “gikan sa kawhaan ka tuig sa panuigon pataas,” walay labot sa tribo ni Levi ug sa iya sa matinumanong Caleb ug Josue, mangamatay sulod sa 40 ka tuig sa kamingawan. (Numeros 13:1–14:38; Deuteronomio 1:19-40) Sa pagkamatuod, kining tanan angay magpasidaan kanato batok sa susamang pagkadili-mapasalamaton ug kakulang sa pagsalig sa pagpangulo ni Jehova!
4. Sa unsang paagi gipakamatarong sa kasaysayan sa Israel ang katalagman nga nahitabo sa Juda, Jerusalem, ug sa templo sa 607 W.K.P.?
4 Bisan pag ang mga Israelinhon naglaaglaag sa kamingawan sa 40 ka tuig, wala sila biyai ni Jehova. Siya mipadayon sa pagbugno sa ilang mga gubat. Sa pagkamatay ni Moises ug Josue, gibangon sa Diyos ang mga maghuhukom sa pagluwas sa iyang katawhan gikan sa malupigong mga kaaway. Apan niadtong panahona ang katawhan sa Israel nagbuhat kon unsay matarong sa ilang kaugalingong mga mata, ug misugod sa pagdagsang ang malapasong kabangisan, imoralidad, ug pagsimbag diyosdiyos. (Maghuhukom 17:6–19:30) Sa kaulahian, sa dihang buot nila ang usa ka tawhanong hari aron mahisama sa kanasoran sa palibot, gihatag ni Jehova ang ilang gipangayo apan gipasidan-an sila sa mga sangpotanan. (1 Samuel 8:10-18) Bisan pa niana, bisan ang pagkahari sa banay ni David wala makatagbaw sa katawhan, ug ang napulo ka tribo mirebelde sa mga adlaw ni Rehoboam. (1 Hari 11:26–12:19) Sa dugang ug dugang, ang ideya mismo nga ang Diyos maoy nangulo kanila inanay nahanaw sa mga hunahuna sa kadaghanan. Ang pagkalaglag sa Jerusalem ug sa templo ingon man ang pagkapukan sa gingharian sa Juda diha sa mga kamot sa mga taga-Babilonya sa 607 W.K.P. maoy angay kaayong mga paghukom diha sa katawhang napakyas sa paglakaw nga may pagsalig sa pagpangulo ni Jehova. Dako gayod nga pasidaan alang kanato!
Ang Pagpangulo ni Jehova sa Usa ka Bag-ong Nasod
5. Unsay gitagana ni Jehova diha sa pagkatawo ni Jesus, ug unsay pagabuhaton ni Jesus?
5 Sama sa mga Israelinhon sa kakaraanan, ang mga alagad ni Jehova sa kaulahian milatas sa mabalhinong mga kahimtang, apan sa walay-pakyas iyang gitultolan sila. Sa nagpabawtismo sa tubig si Jesus sa Nazareth sa 29 K.P., gitagana sa Diyos ang usa ka Manalagna ug Pangulo nga labaw kay kang Moises. Ingong Mesiyas, siya ang manguna sa pagpagawas sa katawhan gikan niining daotang kalibotang nahiluna sa gahom ni Satanas. (Mateo 3:13-17; Daniel 9:25; Deuteronomio 18:18, 19; Buhat 3:19-23; 1 Juan 5:19) Apan unsang katawhan? Aw, kadtong mga Hudiyo ug uban pa nga magtuo sa Mesiyas nga gitagana sa dakong langitnong Pangulo, si Jehova nga Diyos!
6. (a) Nganong ang mga sumusunod ni Jesus nakasangyaw ug nakaatiman sa nagtubong organisasyon? (b) Nganong sa kaulahian mipatim-aw nga napalong ang kahayag sa kamatuoran sa Bibliya?
6 Gitudloan ni Jesus ang iyang mga sumusunod sa kahibulongang kamatuoran sa Diyos ug gihatagan sila sa gikinahanglang instruksiyon alang sa ministeryo. (Lucas 10:1-16) Busa sa natapos ni Kristo ang iyang ministeryo ug gipresentar ang iyang kaugalingon ingong usa ka halad alang sa makasasalang katawhan, gibilin niya ang mga sumusunod nga nabansay sa pagpadayon sa buluhatong pagsangyaw ug pagdumala sa mga kahikayan sa nagakadakong organisasyon niadtong nagtuo kaniya. Panahon sa mga apostoles, may mabangisong paglutos. Apan ang kamot ni Jehova nag-uban sa iyang katawhan, ug ang ilang mga kalisdanan gitimbangan sa kahibulongang mga pag-uswag sa gidaghanon sa mga magtutuo. (Buhat 5:41, 42; 8:4-8; 11:19-21) Sa pagkamatay sa mga apostol ni Jesus ug sa ilang mga kaubang-magbubuhat, ang nag-angkong mga sumusunod ni Kristo nailalom sa pagmando sa mapintason ug hambogirong mga klerigo ug mga hari. (Buhat 20:28-30) Sanglit ang maong kahimtang nagpadayon sulod sa mga 15 ka siglo, mipatim-aw nga napalong ang kahayag sa kamatuoran sa Bibliya.
7. Kanus-a ug giunsa pagpatuman na usab ni Jehova ang iyang pagpangulo, ug unsay iyang gibutyag ngadto sa iyang modernong-adlaw nga mga alagad?
7 Apan, unya sama sa ‘usa ka tingog nga mipatugbaw sa kamingawan,’ miabot ang pahibalo: ‘Ang Gingharian haduol na!’ (Itandi ang Isaias 40:3-5; Lucas 3:3-6; Mateo 10:7.) Sa hinapos nga bahin sa ika-19ng siglo, gipatuman na usab ni Jehova ang iyang pagpangulo ug gisugdan ang pagtawag sa iyang tiunay nga mga magsisimba gikan niining daotang kalibotan ug sa Babilonyanhong relihiyosong mga sistema niini. (Pinadayag 18:1-5) Pinaagi sa iyang sinulat nga Pulong ug sa balaang espiritu, gipadayag sa Diyos ngadto sa iyang modernong-adlaw nga mga alagad nga ang tuig 1914 nagtimaan sa pagkatapos sa wala-mabaldang pagmando sa Hentil nga kanasoran ug usab ang langitnong pagkaentrono sa hinimayang Jesu-Kristo, ang gipili sa Diyos nga Hari ibabaw sa tanang katawhan.—Lucas 21:24; tan-awa ang 1975 Yearbook of Jehovah’s Witnesses, mga panid 34-37.
8 Busa, ang usa ka bag-ong nasod nga nagsakop sa nahibilin sa espirituhanong Israel naorganisar, nga dugang nalamdagan sa mga katuyoan sa Diyos ug bug-os nabansay alang sa ministeryo. Sa kaulahian, kining dinihogang mga sumusunod ni Kristo giduyogan sa kapid-ang magtutuo nga may yutan-ong mga paglaom. Karon, sa tingob, kining tanang saksi ni Jehova malipayong nagamantala sa iyang ngalan ug Gingharian ngadto sa kinatumyan sa yuta. (Isaias 66:7, 8; Galacia 6:16; Pinadayag 7:4, 9, 10) Sa organisadong kalihokan sa mga Saksi, ang pagpangulo ni Jehova ug sa iyang harianong Anak dayag kaayo, ilabina sa sanong sa minilyong matinud-anog-kasingkasing nga katawhan nga nahimong hugot nga mga tigpaluyo sa pagmando sa Gingharian. Bahin ka ba niining malipayong panon nga nagalakaw nga may pagsalig sa pagpangulo ni Jehova?—Miqueas 4:1, 2, 5.
9. Unsang tibuok-kalibotang asosasyon ang naglungtad, ug uban ang unsang tinamdan bahin sa pagpangulo sa Diyos ug sa teokratikanhong pagmando?
9 Sa kataposan, ang mga sumusunod ni Jesus mahimong iyang mga saksi “ngadto sa kinalay-ang bahin sa yuta.” (Buhat 1:6-8; Marcos 13:10) Uyon niana, ang mga Saksi ni Jehova karon nagamantala sa maayong balita sa Gingharian sa tibuok yuta, ug kadtong “tukmang nahan-ay alang sa kinabuhing walay kataposan” nagdawat sa kamatuoran uban ang malipayong mga kasingkasing. Sila nangahimong bahin sa tibuok-kalibotang asosasyon sa espirituwal nga mga igsoong lalaki ug babaye nga malipayong nagdawat sa pagpangulo sa Diyos ug nagpailalom sa teokratikanhong pagmando. (Buhat 13:48; 1 Pedro 2:17) Sama kanila, ikaw ba may kompletong pagsalig nga si Jehova nga Diyos ug ang iyang Hari-Anak, si Jesu-Kristo, nagadumala niining organisasyon sa mga magmamantala sa Gingharian?
Pagbantay Batok sa Pagkawala sa Pagsalig
10. Unsang pasidaan ang magadasig sa matag Kristohanon sa pagsusi nga mainampingon kaayo sa iyang kaugalingon?
10 Ang mga nagadawat sa tanang panalangin nga gikan sa pagpangulo ni Jehova mahimo bang mahulog sa lit-ag sa pagkawalay pagtuo ug pagsalig kaniya? Oo, kay kita gipasidan-an: “Magmatngon kamo, mga igsoon, kay basi maugmad diha ni bisan kinsa kaninyo ang daotang kasingkasing nga walay pagtuo pinaagi sa pagpahilayo sa Diyos nga buhi; apan magpadayon kamo sa pagtinambagay ang usag usa sa matag adlaw, samtang matawag kini nga ‘Karong adlawa,’ kay basi si bisan kinsa kaninyo magmagahi tungod sa malimbongong gahom sa sala.” (Hebreohanon 3:12, 13) Busa, ang matag Kristohanon angay magsusi nga mainampingon gayod sa iyang kaugalingon.
11. (a) Sa unsang mga paagi nga ang konsensiya sa usa ka tawo mahimong gahi? (b) Unsay nahitabo sa pipila sa unang siglo K.P.?
11 Ang konsensiya sa usa ka tawo mahimong gahi kaayo nga dili niya sabtong daotan ang usa ka buhat nga dili uyon sa espiritu sa Kristiyanidad ug nagapadayag sa kakulang sa pagtuo ug pagsalig kang Jehova. Pananglitan, ang pipila mahimong mahulog sa lit-ag sa pagbutang sa materyalistikanhong mga pangagpas ug unodnong mga kalingawan sa samang dapit o una pa kay sa ilang pag-alagad sa Diyos. Ang uban tingali mahimong imoral o mosulting mapasipalahon sa mga lalaking may katungdanan sa kongregasyon. Sa unang siglo K.P., ang “mga tawong dili diyosnon” nga nakayuhot sa kongregasyon “naghugaw sa unod ug wala magtahod sa pagkaginoo ug nagsulting mapasipalahon sa mga mahimayaon” nga nag-abaga sa kongregasyonal nga kaakohan. (Judas 4-8, 16) Kadtong bakak nga mga Kristohanon nawad-an sa matuod nga pagtuo kang Jehova ug sa iyang pagpangulo. Hinaot nga dili gayod kana mahitabo kanato!
12. (a) Ang independente ug rebelyosong espiritu dili manumbaling sa unsa? (b) Unsa ang kalainan ni Core ug ni David?
12 Kasagarang magaduyog sa ‘pagkawalay-pagtahod sa pagkaginoo’ mao ang independente ug rebelyosong espiritu nga dili manumbaling sa kamatuorang si Jehova nagadumala sa iyang organisasyon. Kadtong espirituha may daotang mga sangpotanan alang kang Core ug sa uban nga mihagit sa hinatag-Diyos nga pagbulot-an ni Moises ug ni Aaron. (Numeros 16:1-35) Pagkalahi kanila si David! Kay kontento nga magpaabot sa Diyos sa pagtul-id sa mga kadaotan, wala patya ni David ang iyang daotang kaaway si Haring Saul kay siya mao “ang dinihogan ni Jehova.” (1 Samuel 24:2-7) Oo, gitudlo ni Jehova si Moises, Aaron, Saul, David, Jesu-Kristo ug uban pa. Sa susama, sa organisasyon sa Diyos karong adlawa ang mga katungdanan sa pag-alagad gitudlo nga nahiuyon sa Kasulatanhong mga kinahanglanon ug ubos sa pagtultol sa balaang espiritu ni Jehova.—1 Timoteo 3:1-13; Tito 1:5-9; Buhat 20:28.
13. (a) Nganong kita angay magmapasalamaton sa pagpangulo ni Jehova? (b) Sama ni kinsa nga kita angay magalakaw, ug uban ang unsang tinamdan?
13 Sanglit ‘dili iya sa tawo ang pagtultol sa iyang lakang,’ angay kitang magmapasalamaton sa pagpangulo ni Jehova. (Jeremias 10:23) Si Abraham ug ang iyang debotadong asawa si Sara misugot sa Diyos ug milihok nga may pagtuo. Si Boaz ug si Ruth misunod sa balaang kahikayan. Oo, ug daghan pang matinumanong lalaki ug babaye ang malipayong midawat sa giya ni Jehova. (Hebreohanon 11:4-38; Ruth 3:1–4:17) Sama sa unang mga alagad sa Diyos, nan, angay natong likayan ang independenteng espiritu, malipayong mokooperar sa teokratikanhong organisasyon sa Diyos, ug molakaw nga may bug-os nga pagsalig sa pagpangulo ni Jehova.
Masaligong “Itugyan ang Imong Palas-anon Kang Jehova”
14. Unsay makatabang kanato sa pagbantay batok sa rebelyosong espiritu?
14 Unsay makabulig kanato, ingong maunongong mga saksi ni Jehova, sa pagbantay batok sa rebelyosong espiritu? Aw, nahauna kinahanglan ang pag-ila nga daotan ang mahimong rebelyoso ug mapangahasong dili manumbaling sa pagtultol sa Diyos. (Nehemias 9:16, 28-31; Proverbio 11:2) Kita makaampo ngadto sa atong langitnong Amahan sama kang David, kinsa nangaliyupo: “Gikan sa mapangahasong mga buhat pugngi ang imong alagad; ayaw itugot nga kana mogahom kanako. Sa ingon ako magmabug-oson, ug magapabiling walay sala gikan sa daghang kalapasan.” (Salmo 19:13) Makatabang, usab, ang paghinumdom unsa ka dako ang gugmang gipakita kanato ni Jehova. Kini angay magpauswag sa atong gugma alang kaniya ug angay magdasig kanato sa pagdawat sa iyang pagpangulo sa tanang panahon.—Juan 3:16; Lucas 10:27.
15. Unsang lakang ang gisugyot kon ang usa ka igsoong lalaki nagahunahunang siya wala itudlong ministeryal nga alagad o magtatan-aw tungod kay ang mga ansiano may butang nakontrahan batok kaniya?
15 Dili nato hikalimtan ang kamatuorang si Jehova nagatultol sa iyang organisasyon, bisan tuod ang paglakaw nga may pagsalig sa pagpangulo ni Jehova usahay dili sayon. Sa pag-ilustrar: Pananglitan ang usa ka igsoong lalaki nagahunahuna nga siya wala itudlong ministeryal nga alagad o magtatan-aw kay may butang nakontrahan sa mga ansiano kaniya. Inay mosanong sa paaging makasamok sa kalinaw sa kongregasyon, angay niyang hinumdomang si Jehova ang nagadumala sa teokratikanhong organisasyon. Busa, ang igsoong lalaki tingali mangayog katin-awan sa mapainubsanon, malinawong paagi. (Hebreohanon 12:14) Unya maalamon gayod nga iyang ilhon ang bisan unsang mga kahuyangan nga ipaila kaniya ug mainampoong maningkamot sa pag-uswag! Human niana, ikatugyan niya ang butang ngadto sa mga kamot sa Diyos, nga nahiuyon sa mga pulong: “Itugyan mo ang imong palas-anon kang Jehova mismo.” (Salmo 55:22) Sa nahaigong panahon ug samtang mahimong takos sa espirituhanong paagi, si Jehova tinong mohatag kanatog daghang buluhaton sa iyang pag-alagad.—Itandi ang 1 Corinto 15:58.
16. Bisan pag naagoman nato ang tinuod nga kadaotan sulod sa kongregasyon, unsay dili angay natong buhaton, ug ngano man?
16 Bisan pag nakaagom kitag tinuod nga kadaotan sa mga kamot sa usa ka igsoong lalaki o babaye, kana ba mohatag kanatog makataronganong hinungdan sa paghunong sa pagpakig-uban sa kongregasyon? Sa ingon matarong ba nga kita mohunong sa paghatag ug balaang pag-alagad kang Jehova? Dili, kay ang ingong dalan maoy pagkahimong dili matinumanon sa Diyos ug pagkadili-mapasalamaton sa iyang pagpangulo. Kana magpaila usab nga wala nato higugmaa ang atong maunongong isigkamagtutuo sa tibuok yuta. (Mateo 22:36-40; 1 Juan 4:7, 8) Dugang pa, kon atong bungkagon ang atong integridad kang Jehova, kana mohatag kang Satanas ug pasikaranan sa pagtamay sa Diyos—butang nga dili gayod nato gusto!—Proverbio 27:11.
17. (a) Unsay makatabang kanato nga mahuptan padayon ang atong pagsalig sa pagpangulo ni Jehova sa iyang organisasyon? (b) Unsa unya ang masinati niadtong magpadayon sa paglakaw nga may pagsalig sa pagpangulo ni Jehova?
17 Nan, atong ‘dayegon si Jehova ug dili hikalimtan ang tanang buhat sa Usa nga nagapurongpurong sa atong kinabuhi sa mahigugmaong-kalulot ug mga kaluoy.’ (Salmo 103:2-4) Kon hinumdoman nato kanunay ang atong mahigugmaong Diyos ug molihok nga nahiuyon sa iyang Pulong, atong mahuptang padayon ang lig-ong pagsalig sa iyang dili-makawang nga pagpangulo. (Proverbio 22:19) Ang pagbulag kang Jehova ug sa iyang organisasyon, ang pagsalikway sa pagtultol sa “matinumanon ug maalamong ulipon,” ug ang pagsalig lamang sa kinaugalingong pagbasa ug paghubad sa Bibliya mao ang pagkahimong sama sa bugtong kahoy sa usa ka uga nga yuta. Apan sa kaatbang, ang usa ka tawo kansang pagsalig anaa sa atong Dakong Pangulo, si Jehova, “mahisama gayod sa usa ka kahoy nga tinanom sa daplin sa katubigan, nga nagapaabot sa mga gamot niini sa daplin sa agianan sa tubig; ug siya dili makakita sa pag-abot sa kainit, apan ang iyang mga dahon magmalamboon.” Dugang pa, “sa tuig sa hulaw siya dili magmabalak-on, ni mohunong siya sa pagbunga” sa himaya sa Diyos. (Mateo 24:45-47; Jeremias 17:8) Kana mahimong imong bulahang kasinatian kon mopadayon kang hugot sa paglakaw nga may pagsalig sa pagpangulo ni Jehova.
Makatubag Ka Ba?
◻ Sa unsang mga paagi si Jehova nagpamatuod nga usa ka walay-kasama nga pangulo sa mga Israelinhon?
◻ Mahitungod sa pagpangulo sa Diyos, ang karaang Israel nagatagana sa unsang mga pasidaan?
◻ Ibabaw ni kinsa nagapangulo si Jehova karong adlawa?
◻ Unsay makatabang kanato sa pagbantay batok sa pagkawala sa pagsalig sa pagpangulo ni Jehova?
◻ Bisan pag makaagom kitag kadaotan sulod sa kongregasyon, unsang tinamdan ang atong pagabatonan bahin sa pagpangulo ni Jehova?
8. (a) Busa, unsa ang naorganisar? (b) Ang dinihogang mga sumusunod ni Jesus gikuyogan ni kinsa, ug sa unsang paagi ang pagpangulo sa Diyos ug ni Kristo nadayag?
[Hulagway sa panid 17]
Sa 607 W.K.P. ang katalagman nahitabo niadtong wala maglakaw nga may pagsalig sa pagpangulo ni Jehova. Pagkamaalamon ang pagpamati sa pasidaan!
[Hulagway sa panid 19]
Si Abraham, Sara, David, Jesus, ug uban naglakaw nga may pagsalig sa pagpangulo ni Jehova. Nagalakaw ka ba sa maong paagi?