Kon Unsaon Paghimong Mapuslanon ang Imong Pagbasag Bibliya

“BULAHAN ang kabus sa espiritu.” Mao kini ang pangbukas nga pulong sa iladong Wali sa Bukid ni Jesus, sumala sa kadaghanang Ingles-ug-pinulogang mga Bibliya. (Mateo 5:3, Revised Standard Version, Protestante ug Katolikong edisyon) Nakasabot ka ba kon unsay gipasabot ni Jesus sa “kabus sa espiritu”? Ang nawad-an bag kadasig ang iyang gipunting? O ang mahinay bag salabotan ang iyang gipasabot? Walay kalagmitan nga ang ulahi, apan importante nga masayod.

Ang mga Saksi ni Jehova, nga giila bisan sa ilang mga kritiko nga mga hawod nga mga estudyante sa Bibliya, nakakaplag nga ang New World Translation of the Holy Sciptures sa pagkatagsaon nakaabot sa kinahanglanon sa pagkatin-aw ug sa pagkatukma. Kini naghubad sa teksto sa Wali sa Bukid: “Malipayon kadtong mahunahunaon sa ilang espirituwal nga panginahanglan.”

Ang pipila ka mga komentarista sa Bibliya miadmiter nga mao kanay kahulogan sa “kabus sa espiritu.” Nan, nganong daghang bag-ong bersiyon, sama sa Catholic Jerusalem Bible ug New International Version, nagpadayon sa paggamit sa ekspresyong “kabus sa espiritu”?

Kining maong pananglitan nagpakita nga aron mahimong mapuslanon ang pagbasa sa Bibliya, hinungdanon gayod nga magpili ug hubad nga matinumanon, matin-aw, ug masabtan.

Tukmang Kaisipan

Ang mabungahong pagbasa sa Bibliya nagkinahanglan usab ug tukmang kaisipan sa magbabasa. Maayo kaayong pagkapamulong niining mao gihapong Wali sa Bukid ang kaisipan nga angay natong huptan, nga mao: “Malipayon kadtong mahunahunaon sa ilang espirituwal nga panginahanglan.” Kulang bag tinuod espirituwal nga kahulogan ang imong kinabuhi? Nasayod ka ba sa kamatuoran nga kinahanglan imong pakan-on ang imong hunahuna ug kasingkasing sa espirituwal nga pagkaon? Ang Bibliya makatabang kanimo sa pagtagana nianang maong panginahanglan.

Apan, dili ka makakitag pagkaon alang sa imong hunahuna ug kasingkasing diha sa Bibliya kon imong basahon kini sama sa imong pagbasa sa ubang mga basahon. Kinahanglang imong dawaton kini, “dili ingong pulong sa tawo, kondili, ingon nga mao gayod sa pagkatinuod, ang pulong sa Diyos.” (1 Tesalonica 2:13) Ang imong pagabasahon, dili tawhanong pilosopiya o kasaysayan sa nasod, kondili mga hunahuna sa Diyos ug kasaysayan sa iyang pag-atiman sa iyang mga alagad sa yuta. Naundan usab kini ug katingalahang mga tagna, ang uban niini nangatuman na, ug ang uban pagatumanon pa atubangan sa atong mga mata o hapit nang mahitabo alang sa labing ikaayo sa katawhan.

Sanglit Pulong sa Diyos ang Bibliya, aron mabasa kini nga mapuslanon kinahanglang mangayo ang tawo sa Iyang tabang. Busa, ang pag-ampo sa Diyos, maoy angayng buhaton sa dili pa magbasa sa Bibliya. Sa simpleng mga pulong, nga gikan sa imong kasingkasing, hangyoa siya sa pagtabang kanimo aron imong masabtan ang imong ginabasa ug kon unsaon sa pagpadapat niini sa imong kinabuhi. Usahay kulang kita sa katakos sa paggamit sa kahibalo nga atong nabatonan, diin kining katakosa mao ang kaalam. Ang Bibliya nagtambag: “Kon aduna man kaninyoy nakulangan ug kaalam, papadayona siya sa pagpangayo sa Diyos, tungod kay magahatag siya sa madagayaon gayod ug sa walay pagpamoyboy; ug kini igahatag kaniya. Hinoon kinahanglang magpadayon siya sa pagpangayo uban sa pagtuo, sa walay pagduhaduha.”—Santiago 1:5, 6.

Pagbasa Uban sa Pagtuo

Tingali moingon ka: ‘Unsaon nako sa pag-ampo ug sa pagbasa uban sa pagtuo kon kulang ako sa pagtuo?’ Buweno, kon ang imong tuyo sa pagbasa sa Bibliya maoy sa ‘paghunahuna sa imong espirituwal nga panginahanglan,’ molambo ang imong pagtuo sa makabaton kag kahibalo bahin kang Jehova nga Diyos ug sa iyang katingalahang mga katuyoan nga nasentro diha kang Kristo. Dili pakasaypon ang tinuod nga pagtuo uban sa binuta nga pagkamatuotuohon. Gibatbat sa Bibliya ang pagtuo ingong “tino nga mga butang nga atong ginapaabot, ang tin-aw nga kapahayagan sa pagkaanaa sa mga butang nga dili makita.”—Hebreohanon 11:1.

Ang tinuod nga pagtuo nagkinahanglan ug pangunang pundasyon sa kahibalo, ug kining kahibaloa makapahimo sa mga butang nga gisaad sa Diyos nga tinuod sama nga nakita sila. Busa, ang pagtuo maoy usa ka butang nga mabatonan. Kini mosunod sa pagbasa ug sa pagpamati sa mga butang mahitungod sa Diyos ug sa iyang katingalahang mga katuyoan sa katawhan. Sumala sa pagkapahayag ni apostol Pablo niana, “Ang pagtuo magasunod sa butang nga madungog. Ug ang butang nga madungog magasunod pinaagi sa pagwali mahitungod kang Kristo.”—Roma 10:7.a

Samtang molambo ang imong pagtuo, ang imong pagbasa sa Bibliya mahimong mas mapuslanon. Ngano? Tungod kay “ang mga butang nga [imong] ginapaabot” mahimong mas “tino” pa. Mahimong ikailustrar kini sa bag-ong panaghigala nga mougmad diha kanimo ug sa laing tawo. Sa molabay ang panahon ug sa mas masuod pa nimo kining tawhana, ang imong pagsalig kaniya modako. Sa kataposan, human makaagig daghang mga situwasyon diin miunong gayod kanimo ang imong higala, mabug-os ang imong pagsalig kaniya. Kon mosulat siya kanimo, mahibalo ka kon unsay iyang ipasabot. Bisag dili pa kaayo tin-aw ang pulong, sinati ka kaayo kaniya nga gumikan niana dili ka malisdan sa pagsabot sa diwa. Imong gibasa ang sulat nianang higalaa sa masaligong paagi, dili uban sa pagduhaduha.

Maingon man, sa mas sinati ka sa Bibliya ug sa Awtor niini, si Jehova nga Diyos, mas mosalig ka sa Diyos ug sa iyang Pulong. Bisan pa nga daw malisod masabtan ang ubang mga hitabo sa kasaysayan sa Bibliya dili gihapon matarog kanang pagsaliga. Pananglitan, bisan pa kon ang hinungdan sa mapintas nga lihok sa Diyos batok sa pipila ka tawo o nasod dili matin-aw, makasalig ka nga kadto kinahanglanon. Kaamgid lang kini sa imong pag-ingon bahin sa usa ka kasaligang higala: ‘Aw, kon nakahimo siya niadto, seguradong aduna gayod siyay maayong katarongan.’

Sa pagkamatuod, mapalig-on ang imong pagtuo sa Diyos kon makakita kag katarongan kon nganong milihok siya nianang paagiha o kon nganong daw dugay pa siyang molihok batok sa daotan. Apan tingali nagkinahanglan kag tabang. Moagak kana kanato sa laing hinungdanong bahin sa mapuslanong pagbasa sa Bibliya.

Ang Panginahanglag Tabang

Usa ka ekselenteng butang ang pagbasa sa enterong Bibliya. Sa gikusgon sa usa ka kapitulo sa usa ka adlaw, magkinahanglan kag tulo ka tuig hangtod nga matapos nimo pagbasa ang Hebreohanon ug Gregong Kasulatan. Kon mobasa kag tulo o upat ka kapitulo sa usa ka adlaw, magkinahanglan kag mga usa ka tuig. Apan, aron masabtan ang kinatibuk-ang ideya sa unod sa Bibliya, maayong mosugod ka sa pagbasa sa Salmo ug Proverbio. Dayon balik sa Genesis, Exodo, ug Unang Samuel sa dili pa mopadayon ngadto sa Kristohanong panahon, sa Mateo, Buhat, ug sa pipila ka sulat nga gisulat ngadto sa unang mga Kristohanon, sama sa Filipos, Santiago, ug Una ug Ikaduhang Pedro.

Samtang buhaton nimo kini, imong maamgohan nga aron makakuhag praktikal ug espirituwal nga kaayohan sa Bibliya, maayong susihon kon unsay gipamulong niini bahin sa gihatag nga ulohan. Ang mga teksto may kalabotan sa usa ka ulohan tingali halayo kaayo. Hayan bation nimo ang panginahanglag mga giya sa pagtuon sa Bibliya nga makatabang kanimo sa pagkakat-on kon unsay gipamulong sa Kasulatan, topiko por topiko. Dugang pa, sanglit wala mahan-ay ang mga basahon sa Bibliya sa istriktong kronolohikal nga paagi, kining maong mga giya makatabang kanimo sa pagsabot sa yugto sa panahon. Ang geograpikal ug ang historikal nga impormasyon sa palibot makatabang ug dako sa pagsabot sa Kasulatan.

Asa man makita kining tabang sa pagtuon sa Bibliya? Karong mga katuigan ang mga Katolikong mga magsusulat nakapatik ug daghang mga libro nga gipakaingong gidesinyo sa pagtabang sa mga Katoliko sa ilang pagbasa sa Bibliya. Apan kining mga magsusulat mismo naglibog. Kon buot gayod nga motabang kining maong mga magsusulat sa mga Katoliko sa pagsabot sa Bibliya, madiskobrehan sa ulahi nga daghang doktrina sa Katoliko dili makita diha niini. Sa laing bahin, kon ipakamatarong sa mga magsusulat ang doktrina sa Katoliko, ilang gipaluya ang pagsalig sa magbabasa sa Bibliya tungod kay ilang gipakaubos ang Kasulatan batok sa tradisyon sa iglesya.—Itandi sa Marcos 7:13.

Dugang ug dugang sinserong mga Katoliko nanagdawat sa tabang sa mga Saksi ni Jehova. Diha sa kadaghanang kayutaan, libolibong Katoliko naningkamot sa pagbasa sa Bibliya uban sa pagsabot apan nakadawat ug diyutay o walay tabang gikan sa ilang lokal nga pari. Kaamgid sila sa Etiopianhong opisyal nga nagbasa sa basahon ni Isaias. Sa nangutana si Filipe nga magwawali kon nakasabot ba gayod siya sa iyang gibasa, ang Etiopianhon mapainubsanong mitubag: “Unsaon ko man pagkasabot, gawas kon adunay magatudlo kanako?” (Buhat 8:31, RS, edisyong Katoliko) Gitabangan siya ni Felipe, ug wala magdugay kining sinserong tawo nahimong bawtismadong Kristohanon. Maingon man, sa mamalaybalay sila makahibalag ang mga Saksi ni Jehova ug mga Katoliko, ug kon moingon sila nga aduna silay Bibliya sa ilang balay, mangutana ang mga Saksi kon gusto ba silag tabang sa paghimo sa ilang pagbasa sa Bibliya nga mapuslanon.

Ang Pagbasa nga Mopabunga

Diha sa ilang edukasyonal nga buluhaton, nagkalainlaing matang sa mga giya sa pagtuon sa Bibliya ang gamiton sa mga Saksi ni Jehova, sama sa Ang Akong Basahon sa mga Estorya sa Bibliya (116 ka asoy sa Bibliya nga gihatag sa simpleng pinulongan ug sa kronolohikal nga pagkahan-ay), Tinuod ba nga Pulong sa Diyos ang Bibliya? (alang sa siyentipikanhon ug historikal nga ebidensiya sa pagkatinuod sa Bibliya), “All Scripture Is Inspired of God and Beneficial” (usa ka libro por libro nga sumariya sa unod sa Bibliya, nga adunay geograpiko ug historikal nga palibot nga impormasyon), ug Ikaw Mahimong Mabuhi sa Walay Kataposan sa Paraiso sa Yuta (nga niini gitigom ang 30 ka pangunang mga topiko, lakip sa katingalahang paglaom nga gihikyad sa Pulong sa Diyos atubangan sa sinserong mga magbabasa sa Bibliya karon).

Kining mga giya sa pagtuon sa Bibliya, lakip sa personal nga tabang nga malipayong itanyag kanimo sa mga Saksi ni Jehova nga walay bayad, makahimo sa imong pagtuon sa Bibliya nga makawiwili ug mapuslanon. Imong makita ang giya sa adlaw-adlaw nga pagkinabuhi ug ang katingalahang paglaom sa kinabuhi sa gisaad nga Bag-ong Kahikayan sa Diyos, diin, sa kataposan, ang kabubut-on sa Diyos “mamatuman, dinhi sa yuta ug maingon man sa langit.”—Mateo 6:10, JB.

[Mga footnote]

[Hulagway sa panid 7]

Nakaamgo ang Etiopianhon kon unsay gikinahanglan aron masabtan ang Bibliya