Ang Kinabuhi ug Ministeryo ni Jesus

Ang Gisaad nga Bata

IMBES mopauli sa Nazaret, si Jose ug Maria nagpabilin sa Bethlehem. Ug sa walo pa ka adlaw ang edad ni Jesus ilang gipatuli siya, sumala sa Kasugoan sa Diyos kang Moises. Dayag nga kustombre usab sa paghatag sa batang lalaki ug iyang ngalan sa ikawalong adlaw. Busa ilang ginganlan ang ilang anak ug Jesus, sumala sa gisulti sayo pa niana sa manulondang Gabriel.

Kapin sa usa ka bulang milabay, ug si Jesus 40 na ka adlaw ang edad. Asa man siya dalha sa iyang mga ginikanan? Sa templo sa Jerusalem, nga pipila lamang ka milya ang kalay-on sa ilang gipuy-an. Sumala sa Kasugoan sa Diyos kang Moises, human sa 40 ka adlaw gikan sa pagpanganak ug lalaki, gisugo ang inahan sa pagtanyag ug halad sa pagpaputli diha sa templo.

Mao kanay gihimo ni Maria. Apan nagdala siyag duha ka gamayng langgam ingong iyang halad. Nagpaila kini sa pagkabutang ni Jose ug Maria. Ang Kasugoan ni Moises nagsugo nga ang nating karnero, nga mas mahal kay sa duha ka langgam, ang ihalad. Apan kon dili makaabot niini ang inahan, igo na ang duha ka tukmo o salampati.

Diha sa templo gikugos sa usa ka tigulang nga lalaki si Jesus. Ang iyang ngalan mao si Simeon. Gipadayag sa Diyos kaniya nga dili siya mamatay hangtod nga dili niya makita ang gisaad ni Jehova nga Kristo, o Mesiyas. Sa miadto si Simeon sa templo niining adlawa, gitultolan siya pinaagi sa balaang espiritu ngadto sa bata nga gidala ni Jose ug Maria.

Sa gikugos ni Simeon si Jesus iyang gipasalamatan ang Diyos, nga nagaingon: ‘Imong gituman ang imong saad, kay ang akong mga mata nakakita na sa kasangkapan sa kaluwasan nga imong giandam.’ Nahibulong si Jose ug Maria sa pagkadungog niini. Dayon iyang gipanalanginan sila ug miingon kang Maria nga ang iyang anak “gitudlo alang sa kalaglagan ug kaluwasan sa daghan sa Israel” ug ang kaguol, nga sama sa mahait nga espada, molagbas sa iyang kalag.

Dinhi ning okasyona mao ang 84 anyos nga propetang babayeng ginganlag Ana. Sa pagkatinuod, anaa gayod siya kanunay sa templo. Niadtong tungora miduol siya ug mihatag pasalamat sa Diyos ug misulti mahitungod kang Jesus ngadto sa tanang nagapamati.

Pagkadakong kalipay ang gibati ni Jose ug Maria niining mga hitaboa diha sa templo! Siempre, nagpamatuod lamang kini ngadto kanila nga ang bata mao ang Gisaad nga Usa sa Diyos. Lucas 2:21-38; Levitico 12:1-8.

◆ Kanus-a sumala sa kustombre hatagan ug iyang ngalan ang Israelinhong batang lalaki?

◆ Unsay gisugo alang sa Israelinhong inahan kon mag-edad nag 40 ka adlaw ang iyang anak nga lalaki, ug sa unsang paagi napaila ang pagkabutang ni Maria sa pagsunod ning kinahanglanona?

◆ Kinsa ang nakaila sa pagkatawo ni Jesus ning okasyona, ug sa unsang paagi?