Mga Pangutana Gikan sa mga Magbabasa
◼ Aduna bay mga butang nga kinahanglang atong likayang isulti kon mag-ampo kang Jehova?
Oo, aduna. Kinahanglang atong likayan ang pagsulti sa mga butang diha sa atong mga pag-ampo nga sobra ra kaayo ka pamilyar nga pamation ug magsugyot sa uban (sa publikong mga pag-ampo) nga dili kita matinahuron. Ang mga ekspresyon sama sa “Maayong hapon, Jehova” ug “Ipadangat ang among gugma kang Jesus” dili angay, ni ang kataw-anang mga komento o mga tiaw sa atong mga pag-ampo. Ngano?
Una, kon gamiton kining mga ekspresyona sa publikong pag-ampo, kini makakurat o makapandol sa mga mamiminaw. (Roma 14:21) Adunay mas lalom nga kataronganon kon nganong likayan ang mga ekspresyon nga sama niini, bisan sa atong pribadong mga pag-ampo. Kining mga ekspresyona maoy atong gamiton sa pagpakig-estorya sa atong isigkaingon. Kon gamiton diha sa pag-ampo, magpakita kinig kakulang sa pagsimba ug pagtahod, ug naghatag kinig impresyon nga ang usa nga nag-ampo nakalimot sa iyang pagkawalay bili kon itandi kang Jehova.—Genesis 18:27; itandi sa Lucas 18:9-14.
Tinuod nga gidasig ang mga Kristohanon sa pag-ugmad ug suod nga relasyon kang Jehova. Atong gimahal siya ug siya ang atong langitnong Amahan. (Mateo 6:9; 22:33) Sa pagkatinuod, ang ubang mga tawo mahimong matawag nga iyang mga higala. (Santiago 2:23) Dugang pa, gidapit kita sa pagpakigsulti kang Jehova uban sa kagawasan sa pagsulti ug sa pagpahayag sa atong kinailadmang mga hunahuna ug sa atong personal nga mga suliran ngadto kaniya.—Salmo 55:1, 2; Filipos 4:6; Hebreohanon 4:16; 1 Juan 3:21, 22.
Bisan pa, gipangayo ni Jehova ang tukmang tinamdan niadtong moduol kaniya. Siya miingon: “Niining tawhana, motan-aw ako, bisan pa sa usa nga kabus ug mahinulsolong espiritu ug nga nagapangurog sa akong pulong.” (Isaias 62:2) Gikinahanglan usab ang matinuorong kasingkasing. “Bumalik kamo kanako uban sa inyong bug-os nga kasingkasing,” miingon si Jehova ngadto sa iyang katawhan. (Joel 2:12, 13) Atubangan kaniya kita walay ikapasigarbo, walay katarongan sa pagpaabot, walay katungod sa paghangyo.
Naghatag ang Bibliya niining dugang tambag niadtong moampo kang Jehova: “Pasagdi nga mahadlok kaniya ang mga tawo. Wala siyay pagtagad sa tawong magpakamaalamon sa iyang kasingkasing.” “Iyang ihatag ang tinguha niadtong mga may kahadlok kaniya, ug patalinghogan niya ang ilang pagpangayog panabang, ug iyang luwason sila.” (Job 37:24; Salmo 145:19; tan-awa usab ang Salmo 39:5, 12.) Busa, samtang andam si Jehova sa pagpamati sa atong mga pag-ampo, ang paagi sa atong pagsangpit kaniya kinahanglang magpakita sa atong kaugalingong pagkawalay bili, maingon man usab sa atong dakong pagtahod kaniya. Ang ubang mga paagi magpakitag pagkamapangahason, dili mapaubsanon, o walay kaugdang.
Usahay mogamit ang mga bata sa ilang mga pag-ampo ug pamilyar kaayong mga pulong nga makatawa gani ang ilang mga ginikanan. Kining mga ekspresyona maoy madanihong mga pasundayag sa pagkainosente sa bata ug nagpakita kon unsa ka tinuod si Jehova alang kanila. Apan, ang mga hamtong, tungod sa ilang dakong kasayoran kon unsay nalangkit, kinahanglang maglikay sa pagtiaw. Kinahanglang sangpiton nila si Jehova sa kinasingkasing, masimbahon, mapaubsanon, uban sa kahalangdon ug kaugdang.—1 Corinto 13:11.