“Among Gipabilhan ang mga Tigulang!”
“DILI ba dunay kaalam sa mga tigulang ug pagsabot sa kataas sa mga adlaw?” nangutana si Job. (Job 12:12) Si Solomon susamang mipahayag: “Ang pagkaubanon maoy purongpurong sa katahom kon kini hikaplagan sa dalan sa pagkamatarong.” (Proverbio 16:31) Kining mga pulonga gipamulong sa panahong ang mga tigulang gitamod ug gitahod. Ug subsob ginapakita sa Bibliya sa unsang paagi ang mga batan-on niadtong mga adlawa nakabatog kaayohan sa pagpakig-uban sa mga tigulang.
Si Ruth, pananglitan, nakahigayon sa daghang katuigan sa pagpaniid ug pagpalandong sa panig-ingnang gihatag sa iyang ugangang-babaye, si Noemi. Ang maong panag-uban dayag misangpot sa pagkabaton ni Ruth ug tinguha sa pag-alagad kang Jehova. Busa sa gihatagag higayon sa pagbulag kang Noemi ug pag-uli sa iyang yuta nga may mga magsisimbag diyosdiyos, si Ruth maunongong miingon: “Kon diin ka moadto ako moadto, ug kon diin ka mopalabay sa kagabhion didto ako mopalabay sa kagabhion. Ang imong katawhan mahimong akong katawhan, ug ang imong Diyos akong Diyos.” (Ruth 1:16, 17) Oo, ingong sangpotanan sa iyang pagpakighigala kang Noemi, si Ruth nahimong “labing maayong babaye.”—Ruth 3:11.
Si Timoteo maoy lain pa nga nakabatog kaayohan sa pagpakig-uban sa usa ka tigulang. Migugol siyag daghang katuigan nga miuban sa panaw ni apostol Pablo. Ug bisan sila nagkabulag tungod sa pagkabilanggo, nadawat ni Timoteo ang mga sulat gikan kang Pablo nga maoy pagdasig “sa pag-ukay sama sa kalayo sa gasa sa Diyos” nga diha kang Timoteo. (2 Timoteo 1:6-8) Bug-os ang pagkakat-on ni Timoteo gikan kang Pablo nga sa misulat sa mga taga-Filipos, gisaysay ni Pablo nga siya ‘walay lain nga may kinaiya nga sama sa iyaha [Timoteo] nga tinuod magaatiman sa mga butang maylabot kanila.’—Filipos 2:20.
Karong mga adlawa, hinuon, ang pagtahod sa mga tigulang halos nawala na diha sa pila ka nasod. Apan, kini ba ang kahimtang taliwala sa mga Kristohanon? Dili gayod. Ang matuod nga mga Kristohanon karong adlawa nagapabili gihapon nga ang mga tigulang daghag ikahatag tungod sa ilang pagtuo, debosyon ug kasinatian sa kinabuhi. Pananglitan, usa ka igsoong babaye misulat: “Dihang bation kong mabug-atan niining sistemaha, ako molantaw sa mga tigulang sulod sa kongregasyon, nga mokuhag kalig-on gikan sa ilang pagkalig-on.” Usa ka batan-ong igsoong lalaki, 34 anyos, susamang mipahayag mahitungod sa matinumanong mga tigulang: “Sila nagtabang kanako sa tanang bahin sa kinabuhi. Pananglitan, kinahanglang ako mahibalo sa unsang paagi mahuptan ang katimbang. Aw, giingnan ako sa usa ka 72-anyos igsoong lalaki, ‘Paneguroa ang pagbuhat sa mga butang buot ni Jehova nga unahon nimo pagbuhat. Kini kanunay nga pakigbisog. Apan moabot ang katimbang kon unahon nimo ang pagpangita sa Gingharian.’”
Sa laing hitabo, usa ka igsoong 87 anyos nasakit nga grabe. Ang usa ka ansiano, uban sa dili-aktibong igsoon, miduaw kaniya. Ang dili-aktibong igsoon, nga naghilak, miingon, “Ikaw maayo kaayong higala. Mingawon gayod ako kanimo.” Niana mitubag ang tigulang: “Mingawon usab ako kanimo.” Ang dili-aktibong igsoong lalaki, nga naghilak gihapon, miingon, “Magkita kita sa Bag-ong Kahikayan—kon kana moabot.” Bisan pag luya, ang atong tigulang nga igsoong lalaki mibakod, ug siya mitubag nga lig-on: “Kana moabot gayod.” Bisag ang dili-aktibong igsoon wala makatubag sa maong pagdasig, ang pagtuo sa tigulang lalaki nakatandog sa kasingkasing sa ansiano nga nakapaniid niini. “Ang iyang pagtuo nakatabang ug dako kanako,” siya nahinumdom.
Ang tigulang nga mga igsoong lalaki ug babaye kadaghanan nagakuha gikan sa ilang kasinatian sa Kristohanong pagkinabuhi ug nagahatag sa maayo ug praktikal nga tambag. “Kuhaa ang inyong mga bata ug kugosa sila,” mitambag ang usa ka tigulang, “kay sila sa dili madugay magulang na. Unaha sila pag-atiman. Sila maoy inyong bililhong mga tinun-an.” “Dihang ang mga kapit-osan niining sistemaha moabot kaninyo o dihang si Satanas magasulay kaninyo,” misugyot ang laing igsoon, “ayaw gayod buhii ang kamatuoran. Ipadayon ang pagtuman niana, kay kana mosangpot sa kalipay alang kanimo.” Ang usa ka tigulang magtiayon nga nagaalagad nga matinumanon sa usa ka bahin sa New Zealand sulod sa mga 43 ka tuig naghatag niining praktikal nga tambag: “Kon makaarang ka, mas maayo ang pagpuyo sa usa ka dapit, inay kay magbalhinbalhin. Ang kamatuoran dunay dakong epekto diha sa komunidad, ug kini mopahinabo nga ikaw magkinabuhing uyon niana, sa ingon maghimo kanimong mas lig-on.”
Tinuod, daghan sa atong tigulang nga mga igsoong lalaki ug mga babaye dili na makahimo sa balay-balay nga buluhaton sama sa mahimo sa mga batan-on. Ang pipila dili na makabangon. Ang uban nagaantos sa masakit nga mga balatian. Matud sa usa ka tigulang igsoong babaye, “Walay bale kanako nga ako matigulang. Ang moduyog sa pagkatigulang ang dili ko gusto.” Bisan pa niana siya nagapasundayag gihapon ug Kristohanong kadasig!
Ikaw ba nakig-ilaila sa inyong tigulang nga mga igsoong lalaki ug babaye? Nagatinguha ka ba sa pagsundog sa mga hiyas nga ilang ginapadayag, mga hiyas nga nalunsay sama sa bulawan sa paglabay sa panahon ug tungod sa kasinatian? Tino, ang atong tigulang igsoong lalaki ug babaye maoy bililhong kahinguhaan kon mogahin kitag panahon sa pagpaniid ug pagpakigsulti kanila. Matud sa usa ka batan-ong Kristohanon: “Alang kanako ang matinumanong mga tigulang maoy mga panig-ingnan sa pagkakomitido sa kamatuoran, sa tinuod nga gugma, sa buhi nga pagtuo, kahangawa, ug kadasig sa pag-alagad sa Diyos. Alang kanako ang ilang katahom nahisama sa kakahoyang bug-os namulak, ug sila nahisamag mainit nga kalayo sa matugnaw nga gabii.” Sa pagkamatuod, kita may hinungdan sa pagpabili sa atong mga tigulang!