Unsang Kareraha ang Imong Pilion?
USA ba ikaw ka batan-on ug nagtungha? Kon mao, tinugahan ka sa mga katakos nga dala sa pagkabatan-on—maayong panglawas ug kahimsog ug kabaskog. Ang imong kinabuhi sangkad sa imong atubangan sama sa wala pa matadlasing dalan. Sa unsang paagi imong gamiton kining kinabuhia sa mga katuigan sa unahan?
Samtang magpalandong ka sa imong umaabot, sa walay duhaduha may mga pangutanang motungha sa imong hunahuna. Mopadayon ba ako sa pagtungha sa unibersidad ug mangagpas ug mga kurso sama sa doktor, abogado, o siyentista? Ang damgo ba sa pagkab-ot ug pinansiyal nga kalamposan ug pagkainila madanihon kanako? Mahimo ba akong bantogan sa ngalan sa arte pinaagi sa pagkahimong artista o pagdibuho? O, ingong usa ka batan-ong debotado kang Jehova nga Diyos, pilion ba nako ang bug-os panahong ministeryo ingong tibuok kinabuhing karera, busa ‘nahinumdom sa akong Maglalalang sa mga adlaw sa akong pagkabatan-on’?—Ecclesiastes 12:1.
Ang mga artikulo sa mantalaan ug sa magasin kasagarang maghulagway sa kinabuhi sa iladong mga tawo nga makawiwili ug mabulokon, apan unsay imong nasayran bahin sa kinabuhi sa usa ka bug-os panahong ministro? Makalaay o makapuol ba kini? O tinuod ba kining makaikag ug makawiwili? Ang pagtagad sa pila ka tinuod nga kinabuhing mga eksperyensiya niadtong dugay na kaayo sa bug-os panahong ministeryo makatabang kanimo sa paghimog desisyon.
Kon Nganong Mipili Sila sa Bug-os Panahong Ministeryo
Samtang gisangka pa ang gubat sa Vietnam, si Harry nagtungha sa University of Hawaii, nga nagtuon aron mahimong magtutudlo sa history. Siya nagtuon usab sa Bibliya uban sa mga Saksi ni Jehova. Sama sa kadaghanan sa iyang kaubanan sa klase, nalangkit siya sa popular niadto nga pag-alsa sa mga estudyante, misugod sa pagsulay sa mga droga, ug nakakita nga ang LSD makawiwili. Sa usa ka buntag sa iyang pagmata sa iyang apartment iyang nakita nga nagpasad nga mga buak nga botelya sa ilimnon, mga upos sa sigarilyo, ug ang mga lalaki ug mga babaye nagkatag diha sa salog. Wala kaayoy mahinumdoman si Harry sa panaglalis uban sa polis bahin sa mando sa pagrekisa ug sa mga hulga sa tag-iya sa balay sa pagpapahawa kaniya. Niining gutloa nga mihimo siyag pagpili kon mohunong ba sa pagtuon sa Bibliya o sa paghinlo sa iyang kinabuhi. Sa maalamon, iyang gipili ang ulahi.
Samtang miuswag si Harry sa kahibalo sa Bibliya, ang tumong sa pagpangagpas ug edukasyon sa unibersidad ug karera sa pagtudlo dili na madanihon kaniya. Miundang siya sa kolehiyo, ug nakakitag partaym nga trabaho, gibawtismohan, ug sa ulahi nahimong kuwalipikado sa pagkapayoner—usa ka bug-os panahong magmamantala. Busa gisugdan ni Harry ang bag-ong karera, usa nga puno sa hagit ug maayo, makaikag nga mga eksperyensiya.
Taliwala sa mga espesyal payoner, giasayn si Harry ug ang iyang asawa ingong mga misyonero sa matahom “batoong mga isla” sa Belau sa Kasadpang Pasipiko, diin didto nag-alagad gihapon sila. Unsa ang kinabuhing misyonero niining mga islaha?
Pagsangyaw Pinaagig Sakayan
Ang kadaghanan sa pagsangyaw sa mga isla sa Micronesia ginahimo pinaagi sa sakayan ug sa pagbaktas. Si Harry ug ang iyang asawa, si Rene, nakahinumdom sa ilang unang higayon sa pagsangyaw pinaagig sakayan sa halayong isla. “Miestar kami sa balay nga nahimutang sa halayo naglikolikong suba nga nagtadlas sa kabakhawan ug sa siot nga lasang nga nakahimo silang lunhawng landong sa ibabaw sa among mga ulo,” siya nanumdom. “Gikan sa among gipuy-an, mibiyahe kami diha sa suba, nagpanghapit sa pagsangyaw sa mga tawo nga nagpuyo sa mga daplin sa suba. Sa usa ka gabii, sa wala pa mingitngit, namauli kami gikan sa pag-alagad sa kanataran ug misakay sa sakayan paingon sa among balay alang sa kagabhion. Sa kalit lamang misinggit si Rene. Igo lang akong nakalingi sa pagkakitag nagtimpasaw sa tubig ug sa taas kaayong ikog nga midailos sa tubig. Buaya kadto sa parat nga tubig—ang labing dakong espisye sa kalibotan. Sa mapasalamaton, miabot kami sa balay nga luwas ug walay kadaot. Bisag panahon na sa pagkaligo sa suba, human nga nakakita niadtong higanteng buaya, among nahunahunaan nga mas luwas ang paghigot ug pisi sa balde ug magtimbag tubig nga ikaligo diha sa among sakayan.”
Sanglit daghang balangay ug mga balay dili man maabot pinaagig sakyanan o sakayan, daghang oras nga magbaktas ang mga misyonero sa paglakaw sa matahom gilinyahan ug lubing mga dalan sa lasang aron maabot ang mahigalon, timawang mga tawo. Si Harry miingon: “Makahibalag kami kanunay ug mapamationg mga tawo sa kamatuoran. Maabiabihon kining nahilain nga mga tawo. Mangatkat silag lubi ug mangitag butong, tibhangan ang tumoy niini sa sundang, ug tanyagan kag mainom diha mismo sa butong. Pagkamakapapresko kaayo niadto, lamian, ug sustansiyado.”
Sa unsang paagi gigantihan ang mga paningkamot sa mga misyonero sa pagsangyaw sa Belau? Sila karon aduna nay kongregasyon sa 42 ka tinuod nga mga Kristohanon. Sa aberids, 10 ang misulod sa bug-os panahong ministeryo sa matag bulan sa miaging tuig, ug 193 ang mitambong sa Memoryal sa kamatayon ni Kristo sa 1985.
Tapos sa 17 ka tuig sa bug-os panahong pag-alagad, unsay pagbati ni Harry karon bahin sa iyang desisyon sa paggamit sa iyang bug-os kinabuhi sa pag-alagad kang Jehova? “Kon wala pa nako makaplagi ang kamatuoran sa Diyos sa miaging 17 ka tuig, mausik unta ang akong panahon ug kinabuhi sa kalibotanong mga pangagpas,” matud pa niya. “Wala unta nako makaplagi ang kalinaw sa hunahuna ug ang kasegurohan nga akong nakaplagan sa katuigan ingong payoner ug misyonero, sa pagkahimong ulitawo sa taas nga katuigan ug sa ulahi uban kang Rene nga nakabahin kanako sa miaging walo ka tuig sa misyonero nga pag-alagad.”
Nagarekomendar sa Bug-os Panahong Pag-alagad
Nagtungha si Milton sa hayskol sa Hawaii. Gidasig siya sa uban sa pagpadayon sa masaarong karera nga may pinansiyal nga kasegurohan, apan ang panig-ingnan sa iyang igsoong babaye ug duha ka magulang nga lalaki nga anaa sa bug-os panahong payoner nga pag-alagad, nakapadasig kaniya sa pagpalandong usab sa pagsulod sa bug-os panahong ministeryo. Dugang pa, siya nakadungog ug pakigpulong bahin sa mga panalangin sa bug-os panahong pag-alagad ug kon sa unsang paagi si Jehova motagana sa atong materyal nga mga panginahanglan kon kita mosalig kaniya ug unahon siya sa atong mga kinabuhi. Si Milton miasoy: “Kini maoy nakapukaw kanako sa pagpili sa bug-os panahong ministeryo ingong akong karera sa kinabuhi. Busa, sa wala pa makatapos sa hayskol, gibawtismohan ug misulod ako sa bug-os panahong pag-alagad.”
Sa misugod sa Milton sa pagpayoner, walay napulo ka payoner diha sa kongregasyon. Unsay iyang gihimo bahin niana? “Akong gidapit ang batan-ong mga igsoong lalaki sa pag-uban kanako sa pag-alagad sa kanataran,” miingon siya. “Ingong resulta, daghan kanila sa ulahi miduyog kanako sa bug-os panahong pag-alagad.”
“Ang akong bayaw maoy usa ka ansiano ug payoner,” mipadayon sa Milton. “Usa ra kami ka kongregasyon ug nagtinabangay sa pagdasig sa uban sa pagpayoner. Nadesisyonan nga ako ang modasig sa mga tin-edyer, ug siya ang modasig sa mga ginang sa panimalay. Sa milabay ang pila ka bulan, dihay 25 ka bug-os panahong mga ministro sa kongregasyon. Sa miduaw ang magtatan-aw sa sirkito, iyang gidapit ang napulo kanila sa pag-aplay sa pagkahimong espesyal payoner ug sa pagbalhin sa duol nga mga kongregasyon. Dayon among gihisgotan ang tumong sa pagtabang sa napulo pa sa pagsulod sa payoner nga pag-alagad aron mapulihan kadtong gipadala. Sa pagkasunod nga duaw sa magtatan-aw sa sirkito, 15 ang misulod sa bug-os panahong pag-alagad. Kami karon adunay 30 ka payoner. Sa makausa pa gihangyo sa magtatan-aw sa sirkito ang napulo kanila sa pagbalhin sa laing mga kongregasyon. Ug misugod na usab kami sa pagdasig sa uban aron adunay ikapuli. Sa wala pa miduaw ang magtatan-aw sa sirkito, 20 pa ang mipalista sa payoner nga pag-alagad!”
Ang mananakod nga espiritu sa pagpayoner nakatakod sa mga batan-on. Sa panahon nga miabot sila sa hayskol, halos silang tanan nakaplano sa bug-os panahong pag-alagad nga maoy ilang tumong. Sa 13 anyos pa, ang usa ka igsoong babaye nakadesisyon sa pagpayoner. Siya miingon: “Daw normal nga butang kini nga buhaton.” Siya ug ang ubang mga batan-on sa kongregasyon wala na maghunahuna ug uban pang butang. Ang grupo sa pagsangyaw gihikay tapos sa eskuyla, ug sa ulahi 60 ka estudyante gikan niining tulo ka nagkalainlaing mga tunghaan misuportar niining nga kalihokan uban sa mga payoner. Sa mga bulan sa ting-init, makadasig kaayong tan-awon nga ingon ka daghana sa 130 ang magkatigom alang sa grupong pagsangyaw!
Mitultol ang Pagpayoner sa Mas Dagkong mga Pribilehiyo
“Sa 1974,” nanumdom si Milton, “gidapit ako sa pagdawat sa misyonero nga buluhaton diha sa usa ka asaynment nga 4,000 ka milya [6,400 km] gikan sa balay—ang mga isla sa Belau sa Micronesia.” Ang usa ka hagit nga kinahanglan anaron nimo mao ang pagbaktas sa lagyo kaayong tropikal nga kasulopan ug sa pagbiyahe pinaaig sakayan.
Sa usa ka mainit, alingiig nga adlaw human sa taas nga oras nga paglakaw sa abugong dalandalan, si Milton nanumdom, “gikapoy kaayo kami sa dihang miabot kami sa balay sa interesadong pamilya. Gisugo sa inahan ang iyang anak ngadto sa suba. Siya miabot nga nagdalag dako, napabugnaw sa suba nga watermelon alang kanamo. Nakaon namo ang kapin sa katunga niadto, ug unsa ka makapapresko niadto!”
Human sa usa ka tuig sa iyang misyonerong asaynment, tinguha ni Milton nga makita ang tulo ka tumong nga makab-ot sa Belau, nga mao, ang lokal nga mga igsoon sa ulahi maoy mopuli sa kongregasyonal nga mga responsabilidad, ang mga batan-on mosulod sa bug-os panahong pag-alagad, ug ang kongregasyon makatukod ug kaugalingong Kingdom Hall. Si Milton karon mikomento: “Tapos sa napulo ka tuig dinhi, ang akong mga pag-ampo nga makab-ot kining tulo ka tumong gitubag.”
Gibati ba ni Milton nga nakahimo siyag tukmang pagpili sa 14 ka tuig kanhi sa misulod siya sa bug-os panahong pag-alagad ingong iyang karera sa kinabuhi? “Usa ka butang nga akong nakat-onan gikan sa tibuok nakong kinabuhi sa bug-os panahong pag-alagad mao kini: Kon kita andam, gamiton kita ni Jehova sa tukmang panahon,” siya mitubag. “Kinahanglang dili gayod kita mohunong apan magpadayon sa pagtanyag sa atong kaugalingon sa mainandamon sa iyang pag-alagad. Dili gayod ka magbasol sa pagpadayon ug karera sa pag-alagad kang Jehova ingong bug-os panahong ministro.”
Sa Unsang Paagi Imong Gamiton ang Imong Kinabuhi?
Mga batan-on, sa unsang paagi imong gamiton ang imong umaabot? Alang ba sa imong kaugalingon o bug-os alang kang Jehova? (Roma 14:8) Sa mainampoon palandonga ang tumong sa bug-os panahong pag-alagad karon diha sa imong pagkabatan-on. Sundoga si Jesus pinaagi sa pagkinabuhi sa nahibilin nimong kinabuhi “sa pagtuman sa kabubut-on sa Diyos.” (1 Pedro 4:2) Makita kining usa ka panalipod gikan sa makadaot nga mga tingusbawang kalibotanon, mga karera, ug mga pag-ubanay. Timbangtimbanga ang imong mga kahimtang ug pagtakda ug espesipikong petsa ingong imong tumong sa pagsulod sa bug-os panahong pag-alagad. Pagkugi alang niana. Pag-ampo sa tabang ni Jehova aron makab-ot kana.—Efeso 6:18.
Ang pagpili sa pagpayoner ingong karera moagak kanimo sa daghang maayong mga pribilehiyo sa pag-alagad sobra pa sa imong mga kalaoman. Ang imong kinabuhi matugob sa kalipay, kasegurohan, ug gugma. Mahimong makawiwili kini, makaikag, ug matagbawon. Labaw sa tanan, usa kini ka kinabuhi nga kahimut-an ni Jehova.—Proverbio 27:11.