Makadawat Ka ba sa Disiplina?
‘KARONG adlawa ang mga ginikanan nagabunal lamang sa tam tam (bombo sa sayaw), dili sa ilang mga anak.’ Kining komentoha nadunggan gikan sa mga baba sa pila ka estudyanteng babaye sa usa ka kolehiyo sa Aprika. Unsay ilang gipasabot? Nga kinaraan na ang pagdisiplina. Dili buot sa mga ginikanan nga ipadapat kana, ug ang mga anak malipayong dili makadawat niana.
Maalamon ba kining mga tinamdana? Sumala sa diksiyonaryo, ang disiplina sa panguna maoy “pagbansay nga magatul-id, magaumol, o magahingpit sa mga katakos sa panghunahuna o sa moral nga kinaiya.” May si bisan kinsa bang molampos kon wala kanang matanga sa disiplina? Nganong kadtong Aprikanhong mga estudyanteng babaye—ug ang ilang mga ginikanan—nagahunahunang sila mahimong molampos?
Sa pagkamatuod, ang negatibong tinamdan bahin sa disiplina dili iya ra sa Aprikanhong mga estudyante babaye ug sa ilang mga ginikanan. Mopatim-awng ang kinabag-ang katawhan karong adlawa nagaisip sa bisan unsang tambag o disiplina ingong dili-angayang pagpanghilabot sa ilang kagawasan, pagpukgo sa ilang mga katungod. Apan, ang ingong tinamdan dili lamang iya sa ika-20ng siglo. Kaliboan nga katuigang miagi, ang Diyos mismo miingong “ang kiling sa kasingkasing sa tawo maoy daotan sukad sa iyang pagkabata.” (Genesis 8:21) Sa pagpunting sa daotang sangpotanan sa kaliboan nga katuigan sa maong daotang kiling, si apostol Pablo misulat: “Ang mga tawo mahimong mahigugmaon sa ilang kaugalingon, mga mahigugmaon sa salapi, tigpagawal, hambogiro, mga tampalasan, masukihon sa mga ginikanan, dili mapasalamaton, dili maunongon, walay gugma nga kinaiya, dili ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, maluibon, gahig-ulo, tigpaburot.” (2 Timoteo 3:2-4) Dili katingad-ang ang disiplina dili popular!
Daotan ba Gayod ang Disiplina?
Gikinahanglan ba gayod sa Kristohanon ang disiplina? Aw, si Jesus miingong ang dalan ngadto sa kinabuhi “masigpit.” (Mateo 7:13, 14) Sayon kang mahigawas niana. Busa dili ba maalamon ang pagdawat sa disiplina, sa pagbansay, sumala sa pagtawag niana sa diksiyonaryo? Tagda ang kahimtang sa usa ka biyahedor nga wala tuyoang nahisalaag sa iyang dalan ug mosangko sa duol sa kuyawng dapit. Kon may estrangherong motanyag sa pagpakita kaniya kon unsaon niya pagbalik sa iyang dalan, unsay iyang sanong? Masuk-anon ba niyang dumilian ang tabang, nga mopugos nga siya may katungod sa pag-adto kon diin niya gustong moadto? Iya bang akusahon ang mahigalaong estranghero sa pagpanghilabot sa iyang mga katungod? Dili. Siya magmapasalamaton sa tabang nga itanyag.
Busa ang maalamong Kristohanon mapasalamaton kon itanyag ang tabang sa paagi sa malulutong disiplina. Ang mga pulong sa propeta matuod bisan kon unsay atong edad o kasinatian sa kinabuhi: “Nahibalo ako, Oh Jehova, nga wala diha sa yutan-ong tawo ang iyang dalan. Dili iya sa tawo nga nagalakaw ang pagtultol sa iyang lakang.” (Jeremias 10:23) Busa, kitang tanan nagakinahanglan sa disiplina.
Ilang Gisalikway ang Disiplina
Ang usang misalikway sa disiplina mao si Cain, nga nasina sa iyang igsoong si Abel. Sa pagkakitang si Cain misugod sa pagkahisalaag gikan sa hustong dalan, si Jehova mismo mitambag kaniya, nga nangutana: “Nganong nanginit ka sa kasuko ug nganong nadaot ang imong panagway? Kon moliso ka sa pagbuhat ug maayo, dili ba aduna unyay pagmaya? Apan kon dili ka moliso sa pagbuhat ug maayo, ang sala nagahupo sa ganghaan, ug kanimo kini nagapangandoy; ug ikaw, sa imong bahin, makabuot ba niana?” (Genesis 4:6, 7) Apan si Cain wala mamati. Iyang gipatay ang iyang igsoong si Abel ug sa ingon ang pagbuno gipailaila sa kasaysayan sa tawo.—Genesis 4:8-16.
Sa mga adlaw ni Samuel, ang mga anak lalaki ni Eli wala usab modawat sa disiplina. Ang ilang amahan mao ang hataas nga saserdote sa sangtuwaryo ni Jehova, apan gigamit sa iyang mga anak ang ilang katungdanan aron mangawat gikan sa mga halad ug hayloon ang mga babaye sa pagbuhat sa imoralidad uban kanila. Gikasab-an sila sa ilang amahan—nga hinay lamang—apan sila wala mamati. Ang resulta? Ang pagsalikway nila sa disiplina misangko nga sila nangamatay sa panggubatan, ug ang kakugang sa balita nakapatay kang Eli mismo.—1 Samuel 2:12-17, 22-25; 3:11-18; 4:1-4, 10-18.
Ang Pipila Namati
Hinuon, ang uban nagdawat sa disiplina. Si David, usa ka hari ug usa ka tawo sa panggubatan, nakahimog makalilisang sala sa dihang iyang gipapatay si Uria, ang lalaki kansang asawa gipanapwan ni David. Apan gidawat ni David ang pagbadlong nga gipadala sa Diyos pinaagi sa propetang si Nathan, ug sa ingon si Jehova wala bug-os magsalikway kaniya. (2 Samuel 12:1-14) Oo, ang disiplina makatabang kanato nga maulian bisan gikan sa seryoso kaayong mga sala.
Si Job gitambagan sa batan-ong lalaki si Eliu ug masuk-anon untang makasalikway sa tambag. Bisan tuod grabe ang giantos ni Job sa mga kamot ni Satanas, midumili siya sa “pagtunglo sa Diyos ug mamatay.” Tungod kay may ingong rekord, mahimong iyang sabtong walay katarongang mamati siya sa tambag sa maong batan-on. Apan, si Job namati gayod ug iyang nasayran nga, bisan pa sa iyang pagkamatarong, gikinahanglang usbon niya ang iyang tinamdan. Dayon nakapribilehiyo siya sa pagdawat ug tambag gikan kang Jehova mismo ug sa kataposan siya gigantihan sa daghang panalangin. (Job 2:9, 10; 32:6: 42:12-16) Busa, ang disiplina makatabang bisan niadtong may talagsaong mga rekord sa pagkamainantoson ug pagkamatinumanon.
Gidawat usab ni apostol Pedro ang disiplina. Hinumdomi, si Pedro usa ka apostol ni Jesu-Kristo, usa ka saksi sa transpigurasyon ni Jesus, ug ang usa nga gisaligan ni Kristo sa “mga yawi sa gingharian.” (Mateo 16:18, 19) Bisan pa niana, sa usa ka higayon si apostol Pablo, nga usa ka bulobag-o pang sumusunod ni Jesus, dayag nagdisiplina kang Pedro tungod sa iyang panggawi sa kongregasyon sa Antioquia. Lagmit gidawat ni Pedro ang disiplina, kay sa kaulahian siya naghisgot bahin sa “atong minahal nga igsoong Pablo.” (2 Pedro 3:15; Galacia 2:11-14) Busa, ang Kristohanong daghan usab ug mga pribilehiyo makadahom usab sa pagdawat sa disiplina.
Modernong mga Kristohanon ug ang Disiplina
Diha sa kongregasyon, kita dili angay matingala nga makadawat ug tambag gikan sa hamtong nga tawo. Apan ang mga tawong gitugyanan sa linain sa responsabilidad sa pagbantay sa atong intereses mao ang tinudlong mga ansiano. Kining espirituwal nga mga magbalantay mao ang ginatumong sa ginaingon sa Bibliya: “Angay inyong mailhan sa tino ang panagway sa inyong panon. Ibutang ang inyong kasingkasing nganha sa inyong mga panon.”—Proverbio 27:23.
Tingali makatabang nga kita makadawat sa disiplina kon amgohon natong kinahanglan ang dakong gugma, ingon man kaisog, aron ang mga ansiano makahatag ug tambag. Ang mga ansiano kadaghanan pagaayran kon mosulay sila sa pagtabang. Pananglitan, usa ka Aprikanong ansiano nakigsulti sa karaan nang Kristohanon, nga nagpasidaan kaniyang siya nagkalangkit sa butang dili Kristohanon. Lisod ang paghatag niadtong tambaga, ug kadto nahimong mas lisod sa dihang siya nasilo. Sa kataposan, wala dawata ang tambag, ug ang gitambagan wala na makiglabot sa ansianong misulay sa pagtabang kaniya. Pagkalabi pang maalamon kon iyang nahinumdoman nga ‘ang mga samad nga gipahamtang sa usa ka mahigugmaong higala maoy matinumanon’!—Proverbio 27:6.
Ang disiplina makatabang kanato sa pagpadapat sa laing proverbio sa Bibliya: “Maalamon ang usa nga nakakita sa katalagman ug motago, apan ang walay kasinatian moagi ug magaantos sa silot.” (Proverbio 22:3) Kanang mga pulonga makatabang unta sa usa ka Kristohanong lalaki sa samang nasod. Nabatasan na niya ang pag-adto sa publikong mga restawran nga dili kauban ang iyang asawa ug anak. Kadto nakadisturbo sa pipila tungod kay sa maong dapit ang mga silbidora sa daghang restawran maoy mga pampam nga mangitag mga parokyano. Busa gisultihan sa lokal nga mga ansiano sa makadaghan ang maong lalaki bahin niadto. Apan wala niya dawata ang tambag, nga kadaghanan masuko pa. Sa kataposan, nahulog siya sa lit-ag sa imoralidad. Pagkalabi pang maayo ang pagpamati sa maayog-tuyo nga tambag!
Kon atong hikalimtan ang atong kaugalingong punto de vista sa makadiyut ug sulayan pagtan-aw ang mga butang sumala sa pagtan-aw ni Jehova niana, mas dali pa kitang makadawat sa disiplina. Tinuod, ang disiplina mahimong dili maayong pahinumdom sa atong kaugalingong mga pagkadili-hingpit. Tingali tungod niana kita maulaw ug diyutay. Apan hunahunaa lamang kon unsa ka dako ang kahimuot ni Jehova dihang ang iyang mga alagad molihok nga maalamon ug molikay nga mahulog sa sala. “Magmaalamon ka, anak ko,” nagaingon ang iyang Pulong, “ug lipaya ang akong kasingkasing, aron ako makatubag kaniya nga nagabiaybiay kanako.” (Proverbio 27:11) Kon matulon nato ang atong garbo ug dawaton ang disiplinang ihatag, kita mahiapil niadtong magahatag kang Jehova ug tubag sa mga hagit ni Satanas.
Ang Disiplina Mohatag ug Maayong mga Bunga
Sumala sa atong nakita, ang disiplina maoy alang kanatong tanan. Gikinahanglan kini sa mga lalaki ug mga babaye, batag tigulang, kadtong dugay na sa kamatuoran ug ang mga bag-ohan. Busa, angay nga atong dahomon ang disiplina, nga pangitaon pa. Tun-i ang Pulong sa Diyos ug matikdi ang ginaingon niini nga nagasilbing tambag alang kanimo. (2 Timoteo 3:16, 17) Tambong sa mga tigom ug pamati pag-ayo aron tan-awon kon unsay mapadapat kanimo. (Hebreohanon 10:24, 25) Kon ihatag ang mahigugmaong Kasulatanhong disiplina sa personal, dawata gayod kana sa espiritu sa paghatag niana. Pahimusli ang matul-irong pagbansay nga nagagikan kang Jehova.
Gisultihan ni Pablo ang mga Hebreohanon: “Matuod, ang disiplina daw dili makalipay sa pagkakaron, apan makasakit hinuon; apan human niana alang niadtong namatuto niana kini mohatag sa madaitong bunga, nga mao, ang pagkamatarong.” (Hebreohanon 12:11) Busa, bisan tuod ang disiplina tingali makasakit usahay, kini may maayong sangpotanan. Ang pagdawat ug disiplina makatabang kanato nga mahiapil niadtong nagapahimuot kang Jehova. Ang disiplina motabang kanato sa ‘paglakaw nga walay ikasaway, pagbuhat sa pagkamatarong, ug pagsulti sa kamatuoran diha sa atong kasingkasing.’ (Salmo 15:1, 2) Busa, hinaot kitang tanan modawat sa disiplina.