Ang Yawi sa Matuod nga Relihiyon

NIINING ika-20ng siglo, ginaangkon sa mas daghang tawo nga sila sakop sa Kristohanong relihiyon inay sa ubang relihiyon. Bisan pa niana kining sigloha mao ang labing gubot sa kasaysayan sa tawo. Nganong daw dunay panagsumpaki?

Sa usa ka butang, ang daghan wala mag-isip nga ugdang sa ilang relihiyon. Alang kanila, ang Kristiyanidad mao lamay butang kasagaran, dili usa ka gamhanang impluwensiya diha sa ilang mga kinabuhi. Dugang pa, kadtong tinuod nagaisip nga ugdang sa ilang relihiyon nagtuo sa daghang nagkasumpaking mga tinuohan ug sa nagkalaing mga sukdanan sa moral. Ug sila nabahin sa nasodnon, rasanhon, ug ekonomikanhong mga kalainan. Gawas pa, sila nagabiktima sa usag usa, nga nagalutos pa, nagapakiggubat, ug nagapatay sa usag usa. Busa, ang duha ka kinadagkoang gubat sa kasaysayan gibugno sa panguna sa “Kristohanong” mga nasod.

Unsay atong ikahinapos gikan niini? Nga mahimong ang Kristiyanidad dili mao ang matuod nga relihiyon o dunay dakong kalainan tali sa pag-angkon lamang nga Kristohanon ug ang pagkahimong tinuod nga Kristohanon. Sumala kang Jesu-Kristo, ang magtutukod sa Kristiyanidad, husto ang ikaduhang paghinapos. Sa usa ka higayon, gihisgotan niya ang pipila nga magatawag kaniyang “Ginoo, Ginoo.” Sa laing mga pulong, sila magaangkong Kristohanon, nga magtuo pa nga si Jesus maoy ilang Ginoo. Ug sila mapuliki kaayo sa daw hinungdanong mga buhat sa iyang ngalan. Apan si Jesus magaingon kanila: “Wala ko gayod kamo igkaila! Pahawa kamo, kamong mga mamumuhat ug daotan.”​—Mateo 7:2, 23.

Segurado, walay mausa kanato ang buot mabutang nianang kahimtanga! Busa sa unsang paagi kita makatino kon kita tinuod bang mga Kristohanon o dili? Duna bay yawi sa matuod nga relihiyon?

Ang Yawi

Oo, duna. Hinuon, daghang butang ang nalangkit sa Kristiyanidad. Pananglitan, ang matuod nga Kristohanon kinahanglang may lig-ong pagtuo sa Diyos, tungod kay “kon walay pagtuo dili mahimo ang pagpahimuot nga maayo sa [Diyos].” (Hebreohanon 11:6) Kinahanglan usab nga siya nagabuhat sa matarong nga mga buhat. Ang disipulong si Santiago nagpasidaang “ang pagtuo nga walay mga buhat maoy patay.” (Santiago 2:26) Dugang pa, gipasiugda ni apostol Pablo ang kahinungdanon sa pagbatog “tukmang kahibalo sa kabubut-on [sa Diyos] diha sa tanang kaalam ug espirituhanong pagsabot.” (Colosas 1:9) Apan walay mausa niining mga butanga ang nagahatag sa ilhanan sa Kristiyanidad.

Ang matuod mao, tingali kita dunay dakong kahibalo sa Bibliya ug lig-ong pagtuo ug puliki sa maayong mga buhat, apan bisan pa niana maoy mini lamang nga mga Kristohanon. Sa unsang paagi posible kana? Si apostol Pablo nagpatin-aw: “Kon ako tigpanultig mga dila sa mga tawo ug sa mga manulonda apan walay gugma, ako nahimong usa lamang ka masaba nga agong o piyangpiyang nga nagatagingting. Ug kon ako may gasa sa pagpanagna ug nahibalo sa tanang balaang tinago ug sa tanang kahibalo, ug kon ako nakabaton sa bug-os nga pagtuo nga tungod niana arang ko mabalhin ang mga bukid, apan ako walay gugma, ako walay kapuslanan. Ug kon ipanghatag ko ang tanan kong katigayonan sa pagpakaon sa uban, ug kon itahan ko ang akong lawas, aron ako makapasigarbo, apan ako walay gugma, kini dili magapulos kanako.”​—1 Corinto 13:1-3.

Oo, ang pag-ila sa matuod nga relihiyon mao ang pagsabot nga kini gipasukad sa tinuod nga gugma. Hinungdanon, kinahanglanon ang atong pagtuo, maayong mga buhat, ug tukmang kahibalo. Apan kon dili nato kana buhaton nga may gugma, kon bahin kanato, kana walay kapuslanan. Nganong ingon man? Unsay mohimo sa hiyas sa gugma nga labi pang bililhon?