Unsa Gayod ang Bililhon?
“Ang kadaghanan kanila adunay walay kapuslanang kinabuhi, dili makahawid ug trabaho, walay malungtarong mga relasyon ug naglatagaw nga walay tumong sa usa ka dapit ngadto sa lain diha sa nahilain nga orbito—ug walay bisan usa ang nagtagad. Ang katarongan: Adunahan kaayo sila.”—The New York Times, Mayo 15, 1984.
IKAW nasayod nga kinahanglan ang salapi aron makapalit ug pagkaon, sapot, puloy-anan, transportasyon, gastos sa tambal, ug ubang mga kinahanglanon sa kinabuhi. Sa pagkatinuod, tingali ikaw nasayod nga sa modernong katilingban malisod ang pagkinabuhi kon walay kuwarta, kay, ang Bibliya, nag-ingon, “ang salapi magatubag sa tanang mga butang.”—Ecclesiastes 10:19.
Apan, ang artikulo sa pamantalaan nga gikutlo sa ibabaw naghisgot sa emosyonal nga mga problema sa adunahan. Sa matin-aw, adunay kapeligrohan sa pagsentro sa imong kinabuhi sa pagtigom ug salapi ug mga kabtangan. Apan, gihimo kana sa kadaghanang mga tawo. Usahay, ang hakog nga tingusbawan makamatay. Magpakadungog kitag mga tawo nga hilabihang makakayod sa ilang panuigong 30 ug 40 nga nangamatay sa atake sa kasingkasing. Ang uban gipameligro ang ilang panglawas, ang ilang kinabuhi pa gani, aron lamang makab-ot ang ilang mga tingusbawan may labot sa salapi. Dili kinahanglang relihiyoso kaayo kita sa pag-uyon nga mas maayo pa unta kon ilang sundon ang mga pulong ni Jesu-Kristo: “Kay unsa may kapuslanan alang sa usa ka tawo kon maangkon niya ang tibuok kalibotan apan pagapildihan sa iyang kalag? o unsay may ikahatag sa tawo nga arang ikabawi niya sa iyang kalag?”—Mateo 16:26.
Unsa ang Tinuod Bililhon?
Nasayod ka seguro nga walay kataposan ang mga butang nga tingali matintal kita sa pagpangagpas. Ang video tape recorder, kaugalingong balay, mahalong mga kasangkapan sa dula—diha sa pipila ka yuta kining mga butanga ang ginapangagpas. Sa ubang dapit ang tumong mas limitadog bili. Ang usa ka batan-ong babaye namampam aron lamang makakuwarta aron may ikapalit ug maanindot nga mga besti.
Samtang nasayod kita nga adunay mga kapeligrohang nalangkit sa pagbaton ug lunlong materyalistikong pagpalakaw sa kinabuhi, sa unsang paagi atong mapanalipdan ang atong kaugalingon? Talikdan ba nato ang katilingban, ug mag-inusara o mag-ermitanyo sama sa gihimo sa uban? Lain pa, sa magpalandong kon unsa ang tinuod nga bililhon, angay nga mangutana kita, Unsay makahatag kanakog tinuod nga kalipay ug katagbawan sa ulahi?
Ingong tabang, atong tagdon ang pananglitan sa usa ka tawo kinsa sa dugayng kasiglohan tinahod ug gidayeg ingong sulondan. Usa siya ka rabbi nga manlalaban ug membro sa unang siglong Hudiyohanong sekta nga nailhang “mga mahigugmaon sa salapi.” (Lucas 16:14) Ang iyang ngalan mao si Pablo, ug edukado siya ug may katakos aron makatigom ug bahandi ug makabaton ug taas nga kahimtang diha sa komunidad.
Apan, tungod sa makalilisang nga kasinatian, iyang naamgohan nga adunay usa ka lahing butang nga tinuod bililhon sa kinabuhi. Kon ikaw karon adunay samang hunahuna o wala, maayong imong palandongon ang nahukom ni Pablo.
Iyang natino nga ang pangunang butang nga bililhon sa kinabuhi mao ang inuyonang baroganan uban sa Diyos ingong disipulo ni Jesus. Bililhon kaayo kini nga tungod niana si Pablo, ingong apostol ni Jesus, nakaantos sa mga kalisdanan ug mga paglutos. Sama siya sa una pang inilang tawo, si Moises, kinsa “nagpabili sa pasipala ni Kristo ingon nga labi pa ka dakong bahandi kay sa mga bahandi sa Ehipto.”—Hebreohanon 11:26; 2 Corinto 11:23-27.
Maayong imong mahibaloan usab nga wala gayod magbasol si Pablo nga nawala ang iyang pagkainila diha sa Hudiyohanong katilingban tungod sa pagkahimong Kristohanong apostol. Tapos natagamtam hapit 25 ka tuig ingong debotadong Kristohanon, siya misulat: “Bisan unsang kadaogan nga akong naangkon kaniadto, kini ako nang giisip nga kapildihan tungod kang Kristo. Gani, tungod niana, ang tanan akong giisip usab nga kapildihan tungod sa labawng kabililhon sa pagkaila kang Kristo Jesus nga akong Ginoo. Tungod kaniya napildihan ako sa tanang butang ug kini sila giisip ko ingong mga biya, aron maako si Kristo ug makaplagang nahiusa uban kaniya.” (Filipos 3:7-9) Dawaton nimo nga kombinsido si Pablo nga nakabaton siya ug usa ka butang nga tinuod bililhon.
Ang pagpili ni Pablo wala magpasabot nga wala siyay materyal nga mga butang. Handurawa, pananglitan, ang iyang mga pulong: “Sa bisan unsa ug sa tanang mga kahimtang nakat-onan ko ang sekreto kon unsaon sa pagkabusog ug sa pagkagutom, ako makamaong magkinabuhi sa kadagaya ug sa kawalad-on.”—Filipos 4:12.
Bisan unsa pay imong kahimtang diha sa Kristiyanidad, malagmit imong makita ang maayong gidangatan ni Pablo. Ang iyang pagpili kon unsa ang bililhon nakahatag kaniyag katagbawan nga wala mabatoni sa labing datong mga lalaki ug mga babaye sa kalibotan. Si Jean Paul Getty, ang milyonaryong asietehan, miadmiter: “Walay kalabotan ang salapi sa kalipay. Kaguol pa tingali.”
Apan, tingali moingon ang tawo nga usa siya ka Kristohanon apan dili gihapon mahibalo sa pag-ila kon unsa ang labing bililhon. Tinuod kana sa unang siglo, kay si Pablo miingon ngadto sa usa ka kauban: “Kay ako gibiyaan ni Demas tungod kay iyang gihigugma ang presenteng sistema sa mga butang.” (2 Timoteo 4:10) Sa panahon nga makatabang unta siya sa nabilanggong apostol, mitalikod si Demas, gipalabi ang gitanyag kaniya sa presenteng sistema.
Nagpunting sa dakong kapeligrohan nga mahatag sa materyalistikong panglantaw diha sa usa ka Kristohanon, si Pablo miingon: “Kadtong maikagon gayod nga mahimong dato mangahulog ngadto sa pagsulay ug ngadto sa bitik ug ngadto sa daghang binuang ug sa makadaot nga mga pangibog, nga magaunlod sa mga tawo ngadto sa kamatayon ug pagkalaglag. Kay ang paghigugma sa salapi mao ang gamot sa tanang pagkadaotan, ug tungod sa pagkab-ot ning maong gugma adunay pipila nga . . . gipalagbaslagbasan ang ilang kaugalingon sa daghang mga kasakitan.”—1 Timoteo 6:9, 10.
Nan, maayong mangutana ka, Unsay bahin sa salapi o mga kabtangan diha sa akong kinabuhi? Atong susihon ug dugang pa kining butanga aron makita kon sa unsang paagi imong mabatonan ang tinuod bililhong butang.