Kinsa ba Gayod ang mga Tig-eskapo?

“PAG-ESKAPO sa kamatuoran.” Kana ang giingon sa usa ka paryente sa mibalhin ang usa ka batan-ong ministro ngadto sa South Pacific aron pagbuhat sa misyonaryong buluhaton. Ug daghan ang mopahayag sa samang pagbati. Pananglitan, ang usa ka komentarista sa radyo sa New Zealand karong bag-o mipasabot nga kon madaot ang ekonomikanhong kahimtang, daghang tawo modangop sa pagtuo sa Diyos ingong usa ka matang sa pag-eskapo o escapism.a

Apan ang mga nagadeboto sa ilang mga kinabuhi sa pagpatunhay sa espirituwal nga intereses mga tig-eskapo ba gayod? Dili sumala kang Jesu-Kristo. Wala niya isipa ang pagtuo sa Diyos ingong usa ka handurawan, imbento, o imahinasyon lamang. Sa Juan 7:28 siya miingon: “Ako wala moanhi sa akong kaugalingong pagbuot, apan ang nagpadala kanako maoy tinuod.”

Apan, sa kahimtang ni Jesus ang epekto diha kaniya sa pagtuo sa Diyos dili ingong pasibo. Siya natandog sa pagpresentar sa iyang kinabuhi ngadto sa Diyos, nga miingon: “Tan-awa, ako mianhi . . . sa pagbuhat sa imong kabubut-on, O Diyos.” (Hebreohanon 10:7) Ang matuod nga mga Kristohanon karon apektadong sama ka mapugsanon. Sa pag-ilustrar, matikdi ang tambag nga gisulat ni Pablo kang Timoteo, usa ka iladong ansiano sa unang-siglong kongregasyon. Nasayod si Pablo nga ang pipila sa kongregasyon nagbatog dakong materyal nga katigayonan. Apan kay ang ilang pagtuo gipasukad man sa kamatuoran, sila natandog sa paggamit sa maong katigayonan. Matud ni Pablo: “Sugoa ang mga dato niining kalibotana karon nga dili magmayubiton sa uban, ug dili ibutang ang kabug-at sa ilang pagsalig sa lumalabay nga gahom sa bahandi kondili sa Diyos nga buhi hinuon, nga madagayaong nagahatag kanato sa tanang butang aron atong pagakalipayan. Sugoa sila sa pagbuhat ug maayo, nga madato sa malulutong mga buhat, nga maandam sa paghatag sa uban ug magmabination niadtong anaa sa kasakitan. Ang ilang kasegurohan angay ibutang sa kinabuhing umaabot, aron sila makatino sa pagbaton ug bahin sa kinabuhi nga tinuod ug malungtaron.”​—1 Timoteo 6:17-19, Phillips.

Busa ang Kristiyanidad dili kay pagkalagiw sa kamatuoran. Naglangkit kini sa maisogong pag-atubang sa responsabilidad. Ang Diyos nga atong ginasimba dili handurawan, siya matuod. Ang atong pagkinabuhi nga may pag-alagad may kahulogan ug katagbawan. Ang atong paglaom sa umaabot nga ganti, inay nga walay-pasikaranang pagtuo, may lig-ong pasikaran nga mao ang mga saad sa usa ka Diyos nga dili mamakak.​—Hebreohanon 6:18.

Apan, komosta kadtong nagasalikway sa panginahanglan sa pag-alagad sa Diyos ug nagatukod sa ilang mga kinabuhi palibot sa materyal nga mga butang o sa mahakogon nga karera? Dili ba kaha nga sila mao ang matuod nga mga tig-eskapo?

Gigamit sa makinaadmanong tawo si Solomon ang mga pamulong sama sa “kakawangan” ug “paggukod sa hangin” sa pagbatbat sa kinabuhi diin ang materyal nga mga butang ug unodnong mga kalingawan may pangunang dapit. Iyang gibatbat ang sangpotanan, nga miingon: “Ug bisan unsa nga gipangayo sa akong mga mata ako wala magdumili niana gikan kanila. Wala nako pugngi ang akong kasingkasing gikan sa bisan unsang matang sa kasadyaan, kay ang akong kasingkasing nagmaya tungod sa tanan kong pagbudlay, ug kini nahimong akong bahin tungod sa tanan kong pagbudlay. Ug ako, bisan ako, mitan-aw sa tanan kong buhat nga gibuhat sa akong mga kamot ug sa pagbudlay nga akong gibudlayan sa pagbuhat, ug, tan-awa! ang tanan kakawangan ug paggukod sa hangin, ug walay butang may kaayohan ilalom sa adlaw.”​—Ecclesiastes 2:10, 11.

Oo, bisan ang materyalistikanhong pagkinabuhi nagpatungha sa usa ka matang sa kalipay. Apan kulang ang tinuod nga katagbawan ug malungtarong kalipay. Ang maong kinabuhi maoy lunlon “kakawangan.” Sa pagkamatuod, ang Hebreohanong pulong alang sa “kakawangan” nagadala sa literal nga kahulogan nga “gininhawa” ug busa nagatumong sa butang nga walay kalig-on ug pagkamalungtaron. Sa ingon ang The New English Bible nagagamit sa pulong “kawalay-sulod.”

Busa, ang tawo nga nagakinabuhi sa matang sa kinabuhi nga ginganlan ni Solomon ug “kakawangan” may katungod ba sa pag-akusar sa usa ka Kristohanon nga siya nagaeskapo ngadto sa kahimtang sa hinanduraw nga katagbawan? Dili. Ngani, dugang ginapakita ni apostol Pablo nga “ang talan-awon niining kalibotana nagabalhin.” (1 Corinto 7:31) Dinhi iyang gipanig-ingon ang dili-diyosnong kalibotan ngadto sa usa ka entablado uban ang kanunay-nagabalhing mga talan-awon. Ang butang nga karong adlawa daw labing matahom, anindot, nga kahibulongan pa, basin wala na ugma. Ang “mga maglilingaw” karong adlawa sa dili madugay pulihan sa uban. Apan bisan pa sa tanan nilang paghago, ang ilang mga kinabuhi wala magpatungha sa bisan unsang butang may malungtarong bili. Sila walay tinuod nga paglaom sa umaabot.

Kini maoy sumala sa tukmang giingon ni Philip Chesterfield, ika-18ng-siglong Ingles nga tig-atender sa harianong korte ug usa ka orador: “Naagian ko na ang tanang binuang nga kalingawan, ug nahimo ko kanang tanan. Napahimuslan ko ang tanang kalingawan sa kalibotan, ug akong timbangon kana sila sa tinuod nilang bili, nga sa pagkamatuod maoy ubos kaayo . . . Kon palandongon ko ang akong nakita, . . . ug ang akong nahimo, dili ako makadani sa akong kaugalingon nga kadtong tanang pagpatuyang ug paglingawlingaw sa kalibotan may kamatuoran.”

Hinunoa, ang mga Kristohanon maoy sama kang Abraham nga “nagpaabot sa siyudad nga may tinuod nga mga patukoranan, nga ang magtutukod ug magbubuhat nianang siyudara mao ang Diyos.” (Hebreohanon 11:10) Tungod kay ang ilang pagtuo tino, sila dili kinahanglang moeskapo kondili ginapuno nila ang ilang kinabuhi sa makapatagbawng kalihokan. Komosta ba ang imong kinabuhi? Kini ba yanong pag-eskapo, o kini lig-ong natukod sa kamatuoran?

[Mga footnote]