Buhi ba ang mga Patay? Ang Ginaingon sa Diyos

ANG usa ka gamayng ayroplano milupad gikan sa usa ka siyudad sa Habagatang Aprika paingon sa usa ka lungsod nga mga 250 ka milya (400 km) ang kalayo. Sakay niadto ang abyador ug ang bata niyang anak babaye, nga nag-edad ug 12. Sa naningkamot sila sa paglandig nga emerhensiya, nahulog ang ayroplano, nga namatay silang duha.

“Si Jehova nga Diyos lamang ang nasayod sa akong kasakit ug kapildihan, ingon man sa kalisod nga akong giantos,” nahinumdom si Betty, ang asawa ug inahan. Sa unsang paagi siya nakaagwanta? “Makanunayon ug walay hunong ang akong pag-ampo alang sa kaisog ug kalig-on aron ako makaantos aron ako makatabang sa uban nga makaantos usab.” Si Betty nakabaton usab ug dakong paglipay gikan sa ginaingon sa Diyos mahitungod sa kahimtang sa mga patay ug sa paglaom sa pagkabanhaw.

Unsay ginaingon sa Diyos mahitungod sa mga patay? Ang Bibliya nagatubag: “Ang mga patay wala mahibalo sa bisan unsa.” (Ecclesiastes 9:5, The Jerusalem Bible) Busa ang mga patay walay panimuot. Kana ingon ka yano. Nan nganong ang kadaghanang tawo nagtuo sa kaatbang? Kay sila nalimbongan sa dako kaayo ug karaang tibuok-yutang kabakakan!

Usa ka Tibuok-Yutang Panglimbong

Ang tanan nagsugod sa unang bakak nga sukad gipahayag. Ang makasaysayanhong talaan sa basahong Genesis sa Bibliya nagahatag sa mga detalye. Kini nagaingon: “Mahitungod sa kahoy sa kahibalo sa maayo ug daotan dili ka mokaon gikan niana, kay sa adlaw nga ikaw mokaon gikan niana ikaw mamatay gayod.” (Genesis 2:17) Si Jehova nga Diyos mao ang nakigsulti sa unang tawo, si Adan. Karon, itandi kini sa Genesis 3:1-4, diin si Satanas, nga nakigsulti pinaagi sa bitin, naghaylo kang Eva sa pagsupil sa Diyos, nga miingon: “Dili ka mamatay.” Busa gisupak ni Satanas ang gisulti sa Diyos. Sa ingon iyang gisulti ang unang bakak, nga nahimong “ang amahan sa bakak.”​—Juan 8:44; Pinadayag 12:9.

Apan si Adan ug si Eva namatay, ug mao usab ang dimaihap nga minilyong uban. Sa unsang paagi miikyas niana si Satanas? Pinaagi sa pagtanom sa ulahi sa ideya nga, bisan mamatay ang lawas, may butang magpadayong buhi. Ingong sangpotanan kini nahimong doktrina sa karaang mga relihiyon ug nahitagik ngadto sa Gregong pilosopiya. Busa, ang pagtuo sa pagkadili-mamatay o imortalidad sa kalag halos tibuok kalibotan. Ug alang sa daghan, nga nagtuo nga ang ilang namatayng mga minahal buhi sa laing dapit kini tingali makalipay hunahunaon. Bisan pa niana, ang hinungdanong pangutana mao: Matuod ba kini?

Dili ba Mamatay ang Imong Kalag?

Ang pulong “pagkadili-mamatay” o imortalidad makita katulo sa Bibliya, nga kanang tanan makita diha sa Kristohanong Gregong Kasulatan. Ang pagsusi sa pagkagamit niini mopatin-aw sa usa ka butang: Ang tawo dili kinaiyanhong dili mamatay.

Tagda, pananglitan, ang mga pulong ni apostol Pablo sa 1 Timoteo 6:15, 16 diin siya nagabatbat nga si Jesu-Kristo mao “ang Hari niadtong nagamando ingong mga hari ug Ginoo niadtong nagamando ingong mga ginoo, ang bugtong usa nga dili mamatay.” Busa sa unsang paagi si Jesus lahi sa tanang ubang “mga hari” ug “mga ginoo”? Siya dili mamatay, sila mamatay.

Matuod, ang pagkadili-mamatay gisaad niadtong mga sumusunod ni Kristo nga gitawag aron maghari uban niya sa mga langit. (1 Pedro 1:3, 4) Busa, sa 1 Corinto 15:53, 54, atong mabasa: “Kini nga himalatyon kinahanglang magsul-ob sa pagkadili-mamatay. Apan sa dihang . . . kini nga himalatyon magasul-ob sa pagkadili-mamatay, nan ang panultihon mahitabo nga nahisulat: ‘Ang kamatayon gilamoy sa walay kataposan.’” Apan matikding ang pagkadili-mamatay “ginasul-ob.” Kini usa ka ganti alang sa matinumanon, pinili nga mga Kristohanon. Kini dili butang nga gipanunod sa tanang tawo.

Dugang pa, ang Bibliya wala mag-ingong ang tawo duna o gihatagag usa ka kalag. Hinunoa, kini nagaingon: “Ug si Jehova nga Diyos nag-umol sa tawo gikan sa abog sa yuta ug gihuypan ang iyang mga ilong sa gininhawa sa kinabuhi, ug ang tawo nahimong usa ka buhing kalag.” (Genesis 2:7; itandi ang 1 Corinto 15:45.) Ang pagkaingon lahi sa pagbaton sa usa ka butang. Walay molalis sa kamatuorang ang pagkairo lahi sa pagbaton ug iro! Sa susamang paagi, ang pagkakalag dili sama sa pagbaton sa usa ka kalag.

Tin-aw gikan sa daghang pagtumong sa Bibliya nga mamatay ang kalag nga dili tanang tawo magadawat sa hinatag nga pagkadili-mamatay. Pananglitan: “Ang kalag nga makasala​—kini mismo mamatay.” (Ezekiel 18:4, 20) “Sa pagkamatuod, ang kalag nga dili magpatalinghog sa maong Manalagna pagalaglagon sa hingpit gikan sa taliwala sa katawhan.”​—Buhat 3:23.

Sanglit kita wala makabatog dili-mamatay nga mga kalag, unsay mahitabo inigkamatay nato? Kita “mangatulog,” tungod kay tungod sa halad-lukat ni Kristo adunay paglaom sa pagkabanhaw. (1 Corinto 15:22) Sa namatay si Lasaro si Jesus miingon: “Ako moadto didto sa pagpukaw kaniya gikan sa pagkatulog.” Dayon siya mipatin-aw: “Si Lasaro namatay.” (Juan 11:11-14) Si Pablo naghisgot usab mahitungod niadtong “nangatulog sa kamatayon.” (1 Tesalonica 4:13, 14; 1 Corinto 15:20) Nan, kon ang mga namatay nangatulog . . .

May Pagpukaw Ba?

Palandonga kining katingalahang talan-awon: Ang usa ka panon nagtigom atubangan sa usa ka langob sa Betania nga haduol sa Jerusalem. Si Jesus didto uban ni Maria ug Marta, mga igsoong babaye ni Lasaro nga bag-o pang namatay ug kansang lawas nahimutang sa langob nga gisirhan sa usa ka bato. “Iligid ang bato,” misugo si Jesus. Si Marta mitutol: “Ginoo, sa pagkakaron siya baho na gayod, kay upat na ka adlaw.” Apan tapos sa kadiyut nga pag-ampo si Jesus mipatugbaw: “Lasaro, gumula ka!” Ug ang tawong si Lasaro migula! (Juan 11:38-44) Makahanduraw ka ba sa katingala ug kalipay sa panon​—ilabina ni Maria ug Marta?

Kon si Lasaro buhi pa niadtong upat ka adlaw, dili ba iya unta kadtong ibutyag sa tanan? Apan walay talaan nga siya mihisgot sa bisan unsang kasinatiang iyang nabatonan samtang patay, ug dugang nagapamatuod niana, ang Bibliya nagaingon, “Ang mga patay walay nahibaloan.”​—Ecclesiastes 9:5, JB.

Ang kaso ni Lasaro dili linain. Sa usa ka dapit gitawag Nain, nahinagbo ni Jesus ang panon aron ilubong ang usa ka batan-ong lalaki. Si Jesus miingon: “Undo, ako magaingon kanimo, Bangon!” Ug unsay nahitabo? “Ang patay nga batan-on milingkod ug misugod sa pagsulti.” (Lucas 7:11-17) Apan, dinhi na usab, ang batan-ong lalaki may gisulti ba mahitungod sa usa ka dapit nga adtoan sa mga tawo inigkamatay? Wala, kay lagmit nga siya yanong patay.

Si Jesus, Pablo, Pedro, Elias, ug Eliseo ngatanan mihimog mga milagro sa pagbanhaw sa mga tawong patay. Walay mausa niadtong si kinsa mga patay sa nangagi ang may gisulti mahitungod sa laing kinabuhi

Kining kahibulongang mga milagro nagataganag pasiuna sa bugtong paagi nga mabuhi pag-usab ang kinabag-an sa mga patay​—pinaagi sa pagkabanhaw balik sa kinabuhi sa yuta ilalom sa Gingharian sa Diyos. Matud ni Jesus: “Ayaw kamo kahibulong niini, tungod kay ang takna nagasingabot nga ang tanang atua sa handumanang mga lubnganan makadungog sa [akong] tingog ug manggula.” (Juan 5:28, 29) Kana labing makalipay unyang kasinatian niadtong makapribilehiyo sa pagpuyo ilalom sa pagmando sa Gingharian ni Kristo sulod sa usa ka libo ka tuig, nga karon haduol na kaayo. (Pinadayag 20:4, 6) Ang paglaom sa pagkabanhaw sa kaugalingon nagapamatuod nga ang mga patay dili mahimong buhi. Kon pagabanhawon ang katawhan, nan sila kinahanglan unang walay kinabuhi.

Ang Pila Tingali Mangutana . . .

Unsa ang ikasulti sa mga pangangkon sa mga espiritista ug uban nga sila nakadawat ug mga mensahe gikan sa mga patay? Dili ba kini magapamatuod nga buhi ang mga patay? Dili. Si Satanas abtik kaayo, nga kinalabwang limbongan nga kadaghanan “magatakoban nga manulonda sa kahayag.” (2 Corinto 11:14, The New English Bible) Siya ug ang iyang mga demonyo makahimo, ug subsob nagahimo sa pagtakoban nga mga espiritu sa mga tawong namatay! Busa, ang kasugoan ni Jehova ngadto sa Israel tin-awng nag-ingon: “Si bisan kinsang magakonsulta sa usa ka espiritista . . . o si bisan kinsa nga mangutana mahitungod sa mga patay . . . maoy butang dulumtanan kang Jehova.” (Deuteronomio 18:10-12) Si Jehova nagaingon usab nga kadtong nagabuhat sa espiritismo “dili magapanunod sa gingharian sa Diyos” apan pagalaglagon.​—Galacia 5:19-21; Pinadayag 21:8.a

Unsay ikasulti niadtong nagaangkong may hapit-mamatay nga mga kasinatian? Dili ba kana magpamatuod nga ang espiritu o kalag mogawas sa lawas inigkamatay? Si George Gallup, Jr., tigsurbi sa opinyon sa publiko sa U.S. miimbestigar niining ulohana ug mipatik sa mga resulta diha sa Adventures in Immortality. Ang mga doktor ug mga siyentipiko nga giinterbiyo maduhaduhaon bahin sa pagkakatuohan sa hapit-mamatay nga mga saysay. Matud sa usa ka biophysicist sa Maryland: “Kini sila mao ang mga kasinatian sa usa ka hunahunang anaa sa dili-normal nga kahimtang . . . Ang utok maoy komplikado kaayong organo ug kini makahimog daghang panglanlis dihang imong dagmalan kini​—tan-awa ang mga kasinatian sa mga drogang mohatag ug mga handurawan.” Usa ka sikyatrista sa Ohio: “Kining mga tahoa maoy mga handurawan o mga katingad-anan sa panghanduraw.” Usa ka siyentipiko sa Michigan: “Kini sila maoy mga handurawan nga gipahinabo sa lisod nga kaagi.”

Si Gallup nakahinapos nga ang hapit-mamatay nga mga kasaysayan “dili gayod maisip nga pamatuod sa pagkadili-mamatay o sa laing kinabuhi.” Siya midugang: “Sila mahimong dramatikanhong mga talan-awon sa kahiladman nga ipasundayag sa bug-os diha sa mga hunahuna niadtong nagaagig lawasnong mga kalisod.” Siya misugyot usab nga ang pila ka relihiyosong maalam magpatin-aw nga ang maong mga kasinatian maoy “bahin sa paagi sa demonyo sa paglansis sa mga tawo.” (Italiko amoa.) Ang gisulti ni Jehova nga Diyos dugay na kanhi matuod gihapon: “Ang mga patay walay nahibaloan.” ​—Ecclesiastes 9:5, JB.

Unsay Angay Nimong Buhaton?

Magbantay sa mga ideya o mga pagtulon-ang gipasukad sa unang bakak ni Satanas​—“ikaw dili gayod mamatay.” (Genesis 3:1-5) Tuohi ang ginatudlo sa Pulong sa Diyos, nga dihang mamatay ang tawo “ang iyang mga hunahuna mahanaw.” (Salmo 146:4) Tuohi, usab, nga ang nangatulog nga mga patay mobangon panahon sa mahimayaong pagmando sa Gingharian sa Diyos, nga maoy ginaampo sa daghan, nga “aduna unyay pagkabahnaw sa mga matarong ug sa mga dili-matarong.”​—Buhat 24:15; Mateo 6:9, 10.

Ang masakitong babaye nga gihisgotan sa among unang artikulo nalipay sa gisultihan siya sa ginaingon sa Diyos mahitungod sa mga patay ug sa malimbongong demonyong mga espiritu. Iyang gilaglag ang iyang mga anting-anting ug ubang butang sa espiritismo ug sa pila ka adlaw maayo na siyag gibati. Karon siya nagatabang sa uban sa pagbulag sa pagsimba sa demonyo.

Ang balong babaye nga nawad-an sa iyang mga minahal sa nahulog nga ayroplano nalipay niini nga hunahuna: Sanglit ang mga patay walay nahibaloan, ang panahon, alang kanila, wala na. Busa gikan sa ilang panghunahuna sila momata sa sunod nga gutlo sa yutan-ong paraiso ilalom sa Gingharian sa Diyos! Siya nagakalipay sa pagtabang sa uban nga mahibalong sa duol na “pagapahiran ni Jehova ang mga luha gikan sa tanang nawong.” (Isaias 25:8) Siya nagalantaw sa adlaw dihang, pinaagi sa pagkabanhaw, ang iyang mga minahal nga namatay mangabuhi.

[Mga footnote]