Mga Linaing Hitabo sa Bibliya Salmo 1 hangtod sa 41

Ang Salmista Nag-awit sa Pagdayeg Kang Jehova

“Mga pagdayeg.” Mao kini ang kahulogan sa Hebreohanong ngalan sa basahong Salmo, ug pagkatukma niini! Ang tibuok libro, sa tinuod, maoy usa ka hataas nga pagsinggit sa pagdayeg kang Jehova nga Diyos. Gilatid sa Salmo ang mga hiyas ug gamhanong buhat ni Jehova. Nasudlan sila sa mga tagna ug nag-asoy usab kanato bahin sa mga pagbati sa dinasig nga mga magsusulat samtang ilang giantos ang paglutos, pagbudhi, pagkaluya sa buut, ug gani sa daotang konsensiya. Daghang Kristohanon nga nag-antos sa samang mga pagsulay nalig-on sa mga pulong sa Salmo.

Ang basahon sa Salmo gibahin sa lima ka grupo. Dinhi atong hisgotan ang una niini, ang Salmo 1 hangtod sa 41.

Pagpasakop sa mga Katuyoan ni Jehova

Palihog basaha ang Salmo 1 hangtod sa 14: Kining grupoha sa salmo nagpailaila sa pila ka pangunang mga tema sa basahon sa Salmo: ang pagkabililhon sa Kasugoan, sa mga tagna bahin sa umaabot nga Mesiyanikong Hari, ug sa mga pag-ampog panabang atubangan sa grabeng mga pag-ipit. Dugang pa, atong mahibaloan nga, bisan pa sa lumalabayng paglambo sa daotan, ang matarong mao ang panalanginan.

◆ 2:1—Unsang “walay kapuslanang butang” ang padayong “gipangyamyam” sa kanasoran?

Ang kanasoran padayong “nagpangyamyam” (o, “nagpalandong sa”) katunyahan sa ilang kaugalingong awtoridad, imbes sa pagdawat sa Usa nga Dinihogan ni Jehova. Kining mga pulonga naaplikar sa unang siglo K.P., sa nagsabot ang Romano ug Hudiyohanong mga awtoridad sa pagpatay sa dinihogang Hari ni Jehova, si Jesu-Kristo. (Buhat 4:26-28) Apan, ang dakong katumanan nahitabo sukad sa 1914, dihang ang tanang kanasoran misalikway sa naentronong Hari sa Diyos ug misulay sa pagpasiugda sa ilang kaugalingong pagmando.

◆ 2:12—Nganong may sugo, “Humalok kamo sa anak”?

Sa mga adlaw sa Bibliya, ang paghalok maoy ekspresyon sa paghigalaay ug gigamit sa pagdawat sa mga dinapit diha sa balay sa pagkamaabiabihon. Niining bersikuloha, gisugo ni Jehova ang kanasoran sa paghalok, o sa pagdawat, sa iyang Anak ingong iyang dinihogang Hari.​—Salmo 2:2, 6-8.

◆ 9:12—Nganong “nagapangita si Jehova sa pag-ula sa dugo”?

Sama sa huwes nga naglingkod sa hukmanan, gipangita ni Jehova ang mga sad-an tungod sa pag-ula sa dugo sa iyang walay sala nga katawhan. (Genesis 9:5, 6; Lucas 11:49, 50) Siya nagasilot usab sa mga sad-an. Apan pinili ang iyang mga silot. Ang salmistang si David nagpasalig kanato: “Siya wala malimot sa pagtuaw sa mga sinakit.”​—Itandi sa 2 Pedro 2:9.

◆ 11:3—Unsang “mga patukoranan” ang pagagun-obon?

Ang mga patukoranan mao ang hustisya, balaod, ug mando​—diin dinhi nasandig ang mga patukoranan sa katilingban. Kon mapukan ang kalinaw sa katilingban, nga mawala na ang hustisya, unsay himoon sa tawong mahadlokon sa Diyos? Sumalig kang Jehova. Siya anaa sa iyang langitnong trono, nga makakita sa tanang nagakahitabo, ug siya dili gayod mopakyas kanato.

Pagtulon-an Alang Kanato: Ang Salmo 4:5 nagdasig sa mga mahadlokon sa Diyos sa “pagtanyag ug mga halad sa pagkamatarong.” Sa mga adlaw ni David, ang mga Israelitas gisugo sa pagtanyag ug mga halad sa halaran ni Jehova. Apan kinahanglang may matarong usab sila nga mga motibo ug tinuod nga mahinulsolon. (Isaias 1:11-17) Kon ang mga Kristohanon motanyag sa ilang espirituwal nga mga halad, sila, usab, kinahanglang may matarong nga mga motibo ug nagakinabuhi sa hataas nga mga sukdanan ni Jehova.​—Hebreohanon 13:4, 5, 15, 16; 1 Pedro 2:1, 5.

Ang Dili Ikatanding nga Diyos

Basaha ang Salmo 15 hangtod sa 24. Kining grupoha sa salmo nasudlan sa daghang mga ekspresyon sa pagdayeg kang Jehova. Siya mao ang Tigpanalipod sa iyang katawhan (18), Maglalalang ug Maghahatag-balaod (19), Manluluwas (20), Tigpanalipod sa iyang piniling Hari (21), ug ang Dakong Magbalantay (23), ug ang Mahimayaong Hari (24).

◆ 16:10—Kinsa ang “usa nga maunongon” nga gihisgotan dinhi?

Gipadapat sa ubang mga eskolar sa Bibliya kining bersikuloha ngadto sa mga matinumanon sa kinatibuk-an, nga nagkutlo ingong pagpalig-on sa kamatuoran nga diha sa pila ka Hebreohanong mga manuskrito ang pulong alang sa “usa nga maunongon” anaa sa plural o dinaghan nga porma. Apan sa gikutlo kining bersikuloha sa Kristohanon Gregong Kasulatan, ang pulong anaa sa singular nga porma, nga nagpakita nga usa lamang ang “usa nga maunongon.” Kinsa siya? Sa unang kaso, tingali si David mismo. Apan sa matagnaon, sila si Pedro ug Pablo nagpadapat ning bersikuloha kang Jesus.​—Buhat 2:25-32; 13:35-37.

◆ 21:3—Unsa kanang “purongpurong nga lunsay nga bulawan”?

Tingali literal kini nga purongpurong o korona, sama sa usa nga gitangtang gikan sa diyosdiyos nga si Malcam. (Itandi sa 2 Samuel 12:29, 30.) O tingali mahulagwayon ang purongpurong, usa ka simbolo sa kamatuoran nga si David nakahatag dugang dayandayan sa iyang mahimayaong pagkahari. Apan, sa matagnaon, kining salmoha nagpunting sa paagi sa paghatag ni Jehova sa purongpurong sa pagkahari ni Jesus sa 1914. Ang “purongpurong nga lunsay nga bulawan” nagpunting sa kamatuoran nga ang iyang pagmando maoy sa labing hataas nga matang.

◆ 22:1—Gibiyaan ba sa Diyos si David?

Wala, apan sa nailalom sa grabeng pag-ipit si David sa iyang mga kaaway, daw nakitang ingon niini. Apan, ang tawhanong reaksiyon ni David sa iyang grabeng kalisod wala magpakita sa kakulang sa pagtuo, sanglit mipadayon siya sa masaligong pag-ampo ug kaluwasan. (Mga bersikulo 16-19) Makaikag, mikutlo si Jesus gikan ning salmoha sa hapit nang mamatay diha sa kahoy sa pagsakit. Pinaagi sa pagpangutanag “ngano?” gipahayag ni Jesus ang hingaping pag-ipit nga iyang giagoman, samtang sa samang panahon nagpahibalo sa iyang pagkawalay sala batok sa bakak nga mga sumbong nga mitultol sa pagpatay kaniya.

Pagtulon-an Alang Kanato: Si apostol Pablo mikutlo sa Salmo 22:22 ug gipadapat kini sa paagi sa pagpanguna ni Jesus sa iyang dinihogang mga igsoon sa pagpaila sa ngalan ni Jehova. (Hebreohanon 2:11, 12) Ang Salmo 22:27 nagpunting sa panahon sa dinha nga ang “tanang kabanayan sa mga nasod” moduyog sa katawhan ni Jehova sa pagdayeg kaniya. Karon, usa ka dako, internasyonal nga panon nagasimba sa Diyos uban sa mga igsoon ni Jesus. (Pinadayag 7:9) Kinahanglan magpabilin kita niining balaang pagkaorganisar nga kahikayan.

Ang Dakong Gahom ni Jehova

Basaha ang Salmo 25 hangtod sa 34. Diha sa Salmo 25 ug 26, mipahayag si David sa iyang tinguha sa paglakaw diha sa iyang integridad. Didto gisundan kini ug mga ekspresyon sa maisogong pagsalig diha kang Jehova ug, diha sa Salmo 33, matahom kaayo ang pagkabatbat sa gahom ni Jehova.

◆ 28:8—Kinsa ang “usa nga dinihogan” ni Jehova?

Dinhi ning bersikuloha ang “usa nga dinihogan” mao ang piniling katawhan ni Jehova, sumala sa makita sa kaamgid nga pulong “si Jehova mao ang kalig-on sa iyang katawhan.” Kining mga pulonga may matagnaong kahulogan sama nianang sa Habakkuk 3:13. Sila nagpunting sa pagluwas ni Jehova sa iyang dinihogang nanghibilin sa gubat sa Armageddon.

◆ 29:5, 6—Sa unsang paagi ang tingog ni Jehova nakasip-ak sa mga sidro?

Ning salmoha ang gahom ni Jehova tin-awng gilarawan pinaagi sa pagpaamgid sa iyang tingog sa paglipak. Ang lipak nagapanaw gikan sa Lebanon sa amihanan ngadto sa habagatang mga dapit sa disyerto, nga nakapukawng kahadlok sa miagi kini. (Bersikulo 9b) Ang mga hangin niini nakauyog sa mga sidro sa Lebano, nga “nakapalukso kanila sama sa baka,” ug ang mga kilat niini nakatumba sa mga kahoy, ‘nakasip-ak kanila.’ Maingon man, ang mga hangin sa lipak ‘nakalubag sa kamingawan’ (Bersikulo 8), nakakutaw sa mga balas sa disyerto nga daw sila nalubag sa kasakit.

◆ 33:6—Unsa ‘ang espiritu sa baba ni Jehova’?

Ang espiritu, o gininhawa, dinhi nagkahulogan sa balaang espiritu ni Jehova, kun aktibong gahom. Samtang dungang mogula ang atong mga pulong ug gininhawa gikan sa atong mga baba, sa ingon ang pulong ni Jehova, kun sugo, giduyogan sa iyang gininhawa, kun espiritu. Gigamit sa Diyos ang iyang balaang espiritu sa gilalang ang adlaw, bulan, ug mga bitoon, nga mao, ang tanang malarawanong panon sa materyal nga kalangitan.​—Itandi sa Genesis 1:1, 2.

Pagtulon-an Alang Kanato: Diha sa Salmo 26:5, si David miingon nga iyang gidumtan ang kongregasyon sa mga mamumuhat ug daotan. Ang mga Saksi ni Jehova karon sa ingon naglikay sa pakig-uban sa mga mamumuhat ug daotan. (1 Corinto 15:33) Sama nga nagpakita si David ug dakong kaikag sa balay ni Jehova, kining tinuod nga mga Kristohanon malipay sa pakig-uban sa usag usa sa organisasyon ni Jehova.​—Salmo 26:6-8; 122:1.

“Bulahan si Jehova”

Basaha ang Salmo 35 hangtod sa 41. Tagsaon ning grupoha mao ang Salmo 36, nga nagpaila kang Jehova nga mao ang Tuboran sa kinabuhi, ug ang Salmo 37, nagpasalig kanato sa modangat nga mga ganti sa ulahi sa mga maaghop. Ilabinang tagsaon usab, mao ang Salmo 40, nga nasudlan sa matagnaong mga ekspresyon bahin kang Jesu-Kristo.

◆ 35:19​—Nganong ang mga kaaway ni David “nangidhat sa mata”?

Ang Hebreohanong teksto sa literal nagtawag kanilang “akong mga kaaway [sa] kabakakan.” Nga mao, ang ilang pagdumot nagagikan sa dili maayong mga motibo. Walay gihimong daotan si David nga takos sa ilang pagdumot, ug siya miampo nga sila dili magkalipay o pagpadako sa ibabaw nila. (Bersikulo 19a) Dayon, siya nangutana nga ang iyang daotang mga kaaway walay katarongan sa “pagkidhat sa mata,” kay ang literal nga pagkidhat nagpakita nga sila nalipay sa kalamposan sa ilang daotang mga laraw. (Proverbio 10:10; 16:29, 30) Gikutlo ni Jesus kining bersikuloha ug giaplikar kini ngadto sa nagadumot kaniya.​—Juan 15:24, 25.

◆ 36:3—May pagsabot ba kining mga daotan?

Ang pasumbingay mao nga adunay kausaban sa paggawi sa maong tawo ug nga siya dili na mao sumala sa iyang gipangangkon. Tingali kas-a nagpakita siyag kaalam ug nagbuhat sa mga butang nga maayo. Apan iyang gitalikdan kana, nahimong apostata. Si Haring Saul mao ang usa nga mitalikod nianang dalana sa kaalam, nagpakitag padumot kang David. (1 Samuel, kapitulo 18) Ang ubang mga eskolar nagtuo nga gipunting ni David ang Salmo 36 nga si Saul ang anaa sa iyang hunahuna.

◆ 40:6—Unsay kahulogan sa mga pulong, ‘Nabuksan ang akong mga igdulongog’?

Tingali nagkahulogan kini nga gipasibo ni Jehova ang igdulongog ni David sa pagtultol ni Jehova, o nga naglalang si Jehova ug mga igdulongog nga niini makadungog si David sa Iyang mga sugo. Makaikag, diha sa Septuagint kining mga pulonga gihubad: “Giandaman mo ako ug usa ka lawas.” Kon diin kuhaa kining hubara, kini adunay samang ideya diha sa Hebreohanon. Nga mao, kini nagpasiugda sa panginahanglan sa pagsunod. (Itandi sa 1 Samuel 15:22; Oseas 6:6.) Gipadapat ni Pablo kining bersikuloha kang Jesu-Kristo. (Hebreohanon 10:5-10) Sanglit gigamit ni Pablo ang Septuagint nga paghubad, ang pulong “giandaman mo ako ug usa ka lawas” maoy bahin na karon sa “tanang Kasulatan” nga “dinasig sa Diyos.”​—2 Timoteo 3:16.

Pagtulon-an Alang Kanato: Ang Salmo 37 nasudlan ug daghang pagtulon-an alang kanato, sa atong pagkinabuhi taliwala sa daotang kaliwatan. Bisan tuod ug mauswagon ang mga daotan, dili kita masina ug mosulay sa pagsundog kanila. Hinunoa, “magpakahilom kita atubangan kang Jehova,” dili mangitag sayop kondili, sa pagkakalma mosalig kaniya sa paglihok alang kanato sa iyang kaugalingong panahon.​—Salmo 37:5, 7.

Oo, ang Salmo nagtanyag ug daghang dinasig ug makalipayng mga pulong. Kining unang 41 ka salmo sa masubsob nagpakita nga, bisan unsa pa ka lisod sa atong mga kahimtang, dili kita talikdan ni Jehova. Tinuod, tapos sa pagbasa kanila, mapukaw kita sa pagpalanog sa mga pulong nga nagtapos sa Salmo 41: “Bulahan si Jehova ang Diyos sa Israel gikan sa walay kataposan ngadto sa walay kataposan. Amen ug Amen.”