‘Wala pa Ako Sukad Makabasag Sama Niini’
ANG libro Life—How Did It Get Here? By Evolution or by Creation? nakatabag daghan sa pagsabot nga mas tin-aw pa kon sa unsang paagi mitungha dinhi sa yuta ang kinabuhi ug asa kini nagapadulong. Ang usa ka tawo misulat: “Ako 78 anyos na ug tigbasa sukad sa dos anyos pa ako. Apan wala pa ako sukad makabasag sama sa Life—How Did It Get Here? Tinuod gayod nga tagsaon kini. Ang impormasyon nga nasudlan niini makakutaw sa hunahuna.”
Gikan sa New Zealand may misulat nga ang libro “tingali mao ang usa sa labing bililhong basahon sa kasaysayan sa modernong pagpatik.” Lain pa, sa Italya, mipahayag: “Ang libro superyor gayod! Gibasa ko kini nga walay hunong ug wala batiag kakapoy, nga angay sa usa ka tagsaong mga libro.”
Usa ka negosyante sa Inglaterra mikuhag 25 ka kopya alang sa iyang kauban sa negosyo. Dali nga nahurot ang iyang mga kopya ug mikuhag 25 pa. Ug ang magtutudlo sa relihiyon sa Tinipong Bansa mipidido ug dugang 24 ka kopya aron magamit sa iyang mga klase.
“Sibo sa Siyensiya”
Usa ka estudyante sa Canada miingon: “Gitawag ko kining akong tun-anang libro sa siyensiya, ug sa tinuoray makaingon ako kaninyo nga mas daghang sibo sa siyensiya ang akong nakat-onan gikan ning libroha kay sa bug-os kong natun-an sa tunghaan.”
Mahitungod niini, ang usa ka tawo misulat: “Dihang nagpalista ako sa programa sa pagkuha ug titulo sa unibersidad, mibayad akog ginatos ka dolyar sa nagkalainlaing mga kurso nga makita sa impormasyon sa librong Life—How Did It Get Here? By Evolution or by Creation? Kining mga kursoha maoy sa matematika, biolohiya, genetiko, inorganiko ug organikong kemistriya, ug antropolohiya. Akong naamgohan karon nga makadaginot unta ako ug dakong kuwarta pinaagi sa pagpalit sa inyong libro sa kantidad nga ₱35. Sa samang higayon, inyong nalain ang ‘lugas gikan sa tahop.’”
Ang usa ka instruktor sa pisiyolohiya sa kolehiyo mipahayag sa iyang apresasyon sa pag-ingon: “Mao gayod kining matanga sa reperensiyang materyal nga akong gipangandoyng mabatonan. Ang tanang pagpanukiduki nga gipangandoy kong may panahon ako o gusto kong buhaton nahimo alang kanako!” Sa susama, laing tawo misulat: “Tinuod nga giapresyar ko ang tanang detalyadong pagdukiduki nga nahimo ning libroha. Seguro, mikabat ug mga bulan sa pagbug-os sa pagpanukiduki alang sa kada topiko!”
Nagapalig-on sa Apresasyon sa Maglalalang
Dihang misulat ang tawo sa pagpahayag sa iyang “dakong pagdayeg” sa libro, siya midugang: “Ang libro dili lamang makakombinsi kondili makapadasig usab!” Ug mao kana ang katuyoan niini—sa pagdasig sa pagsalig sa mahigugmaong Maglalalang nga may katingalahang katuyoan sa katawhan.
Busa, ang usa ka tawong may pamilya misulat nga kini “makapalambo sa atong apresasyon sa atong katingalahang Amahan ug nagpatin-aw, nga wala pa mahimo sukad sa hinimog tawong publikasyon, sa kinaadman sa atong Tigdesinyo.” Sa susama, usa ka babaye miingon nga sa tanang libro nga iyang nabasa, “kining libroha ang nakahimog dako sa akong pakighigala kang Jehova. Unsa ka katingalahan nga Diyos!” Ug ang usa ka babaye sa Canada misulat: “Dili nako mahatagan ug katarongan ang gibati ko. Kini mao ang labing duol sa pagsabot sa dakong gugma ni Jehova. Ang mga bahin sa sulod nako nakapahilak kanako sa pagtan-aw sa gahom ning libroha.”
Alang sa sinserong mga tawo nga may pagduhaduha bahin sa paglungtad sa Maglalalang, maayong pagkapadayag sa mosunod nga sulat ang epekto sa libro: “Salamat kaninyo! Sa daghang katuigan nalisdan ako sa pagtuo sa Maglalalang tungod kay nagtuo ako sa ebolusyon. Apan mipalit ako sa inyong libro Life—How Did It Get Here? By Evolution or by Creation? Mibati ako nga sama sa tawong buta nga gihatagan ug kahayag sa unang higayon. Nangita akong lig-ong basehanan, ug lig-ong pangatarongan, sa pagpatin-aw sa sinugdan sa kinabuhi sa yuta ug sa kataposan nakakaplag niini diha sa inyong libro. Nakahatag kini kanako sa tanang mga tubag nga gipangita ko ning nanging katuigan. Dako kaayo ang akong pasalamat kaninyo! Ipadayon ang maayong buhat!”
Kining libroha sa tinuod, nakitang usa ka pagdasig sa kadaghanan. Sa walay duhaduha magpadayon kini sa pag-agak pa sa uban ngadto sa Maglalalang, si Jehova nga Diyos, aron sila makapahimulos karon ug sa walay kataposan diha sa iyang bag-ong sistema sa mga butang dinhi sa yuta.—2 Pedro 3:13.