“Higugmaa ang Imong Silingan”—Unsa ang Labing Praktikal nga Paagi?

KON imong makita ang imong isigkatawo nga anaa sa dakong kawalad-on, unsay imong bation? Pananglitan, tungod sa hulagway sa gigutom nga mga bata buot nimong buhaton ang unsa? ‘Ako maluoy,’ ikaw moingon, ‘ug buot kong motabang.’ Ang dagko kaayong mga kantidad sa matag tuig nga giamot ngadto sa mga organisasyon sa buhat-sa-kaluoy ug sa mga ahensiya sa hinabang nagapailang dayag kana ang gibati sa daghan tawo.

Ang pagbuhat nianang maayong mga buhat alang sa kaayohan sa mga tawong naa sa kawalad-on maoy dalayegon, ilabina tungod sa instruksiyon ni Jesus sa paghigugma sa atong silingan sama sa atong kaugalingon. (Mateo 19:19) Gituohan sa daghang sinserong tawo nga ang labing praktikal nga paagi sa pagpakita sa ilang gugma sa silingan maoy pinaagi sa pagtukod ug pagsuportar sa mga ospital ug mga eskuylahan, pinaagi sa pag-amot ngadto sa angayang mga kawsa ug pinaagi sa pag-apil sa nagkalainlaing matang sa social work o mga panghinabang. ‘Kini ang kahulogan sa Kristiyanidad,’ sila tingali moingon, nga tingali modugang, kon makigsulti sa mga Saksi ni Jehova, ‘tinong labi pang praktikal kay sa paggugol sa imong panahon ug kusog sa pagwali sa balay-balay mahitungod sa relihiyon sama sa inyong ginabuhat.’

Apan tinuod ba? Sa unsang paagi kita makahigugma gayod sa atong silingan sa labing praktikal nga paagi ug sa iyang kinadak-ang malungtarong kaayohan?

Unsay Mahimo sa Imong Salapi?

Ang umaabot nga mga tigdonar sa angayang mga kawsa, may katarongang mangutana: ‘Pila ba gayod sa akong amot ang direktang makahatag kaayohan sa mga tawong gilaraw nga tabangan niana?’ Ang usa ka 1978 nga imbestigasyon sa 15 ka pangunang mga organisasyon sa buhat-sa-kaluoy sa Republika Pederal sa Alemanya, pananglitan, nagpadayag nga niadtong panahona ang mga gastos administratibo ug sa pag-apod-apod mihurot ug mga 42 porsiento sa katibuk-ang kita sa mga organisasyon.

Dihang gisusi sa opisyales sa telebisyon ang tinigom sa bangko sa unom ka “gisagop nga bata” sa Bolivia, ilang nadiskobrehang 6 ngadto 15 porsiento lamang sa katibuk-ang kantidad sa mga amot nga gihatag sa ilang “nagsagop nga mga ginikanan” sa Republika Pederal sa Alemanya ang nakredito ngadto sa mga deposito sa bangko sa mga bata. Ang usa ka tigpamaba sa organisasyon milimod sa mga kiha sa panikas, hinunoa, nga mipatin-awng ang umaabot nga mga tigdonar gisultihang klaro nga makuha sa mga bata ang mga un-tersiya lamang sa mga amot sa ilang “mga ginikanan.” Ang nahibilin, tapos sa pag-atiman sa gastos administratibo, gitahong gigamit alang sa edukasyonal ug medikal nga mga katuyoan.

Hinuon, ang mga pananglitan sa mga hinabang nga gigamit nga sayop dili kay wala mahibaloi. Kini matuod sa mga lakang sa panghinabang maylabot sa mga gutom dili pa dugay sa Aprika. Sa Etiopia, ang politikanhong mga suliran nagpugong sa kadaghanan sa pagkaon nga makaabot niadtong nagkinahanglan, ug sa pila ka hitabo ang mga donasyong pagkaon gikatahong gibaligya​—ug gibaligya sa mahal pang mga prisyo—​inay iapod-apod nga walay bayad.

Ang basahon ni Carl Bakal nga Charity U.S.A. nagpasidaan: “Dihang hamili ang kawsa, dili gayod lalison kon sa unsang paagi ang salapi gamiton. Dili ko gustong mohunong ang mga tawo sa paghatag. Akong gihunahuna lamang nga angay tubagon ang mga pangutana kay sila naghatag nga walay kasayoran.” Dayag, ang paghatag nga walay kasayoran dili maalamon ug dili maisip nga praktikal.

Pagsunod sa Panig-ingnang Gihatag ni Jesus

Siyempre, kining mga kamatuorana makapasuko apan kana ba magpakamatarong sa dili pagpasuportar sa maong angayang mga kawsa? Kon buot sabton, dili ba giayo ni Jesus ang masakiton ug milagrosong gipakaon ang gigutom, nga niana naghatag ug sumbanan alang sa mga Kristohanon karong adlawa?

Matuod nga giabot si Jesus ug kaluoy dihang iyang nakita ang mga tawong nagkinahanglan. Walo ka teksto sa Bibliya nagahisgot niini. Ang duha nagatumong sa panginahanglan sa mga tawo sa pagkaon (Mateo 15:32; Marcos 8:2), ang tulo sa ilang panginahanglan sa lawasnong pagkaayo (Mateo 14:14; 20:34; Marcos 1:41), ug ang usa ngadto sa ilang panginahanglan sa paglipay sa pagkamatay sa mga minahal. (Lucas 7:13) Apan ang laing duha ka teksto nagatumong sa labi pang dakong panginahanglan. Ang Mateo 9:36 nagaingon: “Sa pagkakita sa mga panon siya giabot ug kaluoy kanila, tungod kay sila gipanitan ug nahitibulaag samag mga karnerong walay magbalantay.” Ug ang Marcos 6:34 nagataho: “Iyang nakita ang usa ka dakong panon, apan siya giabot ug kaluoy kanila, tungod kay sila nahisamag mga karnerong walay magbalantay. Ug siya misugod sa pagtudlo kanilag daghang butang.”

Ngani, bisan pag ang kaluoy sa katawhan maoy midasig kang Jesus sa pag-atiman kanila sa lawasnong paagi, ang iyang pangunang interes maoy sa pagtanyag kanila sa espirituwal nga tabang nga wala ikahatag sa ilang relihiyosong mga pangulo. (Tan-awa ang Mateo, kapitulo 23.) Si Jesus mao ang “maayong magbalantay,” usang andam motugyan sa “iyang kalag alang sa mga karnero.” (Juan 10:11) Tungod kay iyang gipakalabaw sa iyang kinabuhi ang maong buluhaton sa pagsangyaw​—dili ang social work o pagtukod ug mga ospital o pagdumalag mga ahensiya sa hinabang—​siya nakaingon sa ulahi kang Pilato: “Alang niini ako natawo, ug alang niini ako mianhi sa kalibotan, aron ako magapamatuod sa kamatuoran.”​—Juan 18:37.

Bisan tuod gihatag ni Jesus sa iyang mga apostol ang katakos sa paghimog milagrosong maayong mga buhat sa pagpang-ayo, kana wala niya hisgoti sa pagluwat sa iyang pangataposang mga instruksiyon ngadto kanila una mokayab sa langit. Hinunoa, siya nagsugo: “Busa panlakaw kamo ug himoang mga tinun-an ang mga tawo sa tanang nasod, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang akong gisugo kaninyo.” Nan, dayag ang labi pang hinungdanong buluhaton mao ang “paghimog mga tinun-an . . . nga magabawtismo kanila . . . nga magatudlo kanila.”​—Mateo 28:19, 20.

Kon Nganong ang Pagsangyaw Praktikal Kaayo

Ang pagsangyaw praktikal tungod kay kini nagatabang sa mga tawo sa pagpadapat sa mga prinsipyo sa Bibliya. Kini sa baylo motabang kanila sa paglikay sa mga sulirang makadala kanila ngadto sa panginahanglan. Ang pagpadapat sa mga prinsipyo sa Bibliya maylabot sa buluhaton ug sa atong tinamdan bahin sa materyal nga mga butang, pananglitan, makatabang sa pagpugong sa kakabos. (Proverbio 10:4; Efeso 4:28; 1 Timoteo 6:6-8) O ang pagsunod sa tambag sa Bibliya mahitungod sa paggamit sa mga droga ug pagbantay sa moral nga sukdanan niini makapauswag sa atong panglawas ug makapasalig sa labi pang malipayong panimalaynong kinabuhi.

Tagda ang pananglitan sa usa ka 35-anyos nga taga-Yugoslavia, nga nagpuyo sa Republika Pederal sa Alemanya, nga miangkon: “Sa edad 18 o 19 ako alkoholiko na. Sa edad 20 ako nag-inom na sa usa ka litrong schnapps ug labing menos usa ka kahong serbesa [20 botelya] sa usa ka adlaw. Katulo ako naospital kay gihimo ang paningkamot sa pagtambal kanako aron mahunong ang bisyo, apan ang mga doktor wala makatabang. Bisan tuod ang akong kinitaan maoy DM1,300 sa usa ka bulan, ako halos walay madala niana sa balay alang sa akong pamilya.” Ang butang gisulti kaniya sa mga Saksi ni Jehova panahon sa ilang pagsangyaw nakapaugmad diha kaniya sa tinguhang makabatog mas maayong relasyon uban sa iyang Maglalalang. “Pinaagi sa pag-ampo,” siya mipadayon, “Akong nakab-ot ang wala makab-ot sa mga doktor.” Kita makahanduraw sa positibong epekto niana diha sa iyang pamilyahanong kinabuhi.

Sa pagkamatuod, ang pagsangyaw dili magsulbad sa tanang suliran. Apan kini praktikal gihapon tungod kay kini nagahatag paglaom. Ilalom sa Gingharian sa Diyos ang tanang suliran masulbad. Si Jesus mohimo unyag mga milagro sa pisikal nga kinaiya alang sa tanang buhi, dili lamang alang sa pipila. Inay mohatag ug temporaryong kahupayan, ang mga kaayohan malungtaron, ngani, sa walay kataposan. (Tan-awa ang Juan 17:3.) Busa ang pagtudlo sa mga tawo sa pagbatog pagtuo sa halad-lukat ni Jesus ug sa mga tagana niana mohatag sa labing dakong kaayohan sa kadugayan.

Daghang relihiyosong organisasyon sa Kakristiyanohan mopunting nga magarbohon sa ilang “maayong mga buhat” sa pag-atiman sa mga masakiton, sa mga kabos, ug mga timawa. Apan labaw ang ilang mahimo sa pagbutang ug labawng pasiugda sa paghatag ug espirituwal nga tabang, sama sa gibuhat ni Jesus. Sama sa relihiyosong mga pangulo sa unang siglo, sila napakyas sa pagtuman sa labi pang hinungdanong sugo. Tingali ilang gibusog ang mga tiyan sa pila ka kabos nga tawo sa literal nga pagkaon, apan ilang gipasagdang ang ilang mga hunahuna ug mga kasingkasing gigutom sa mga pulong sa kamatuoran. (Tan-awa ang Amos 8:11.) Sila tingali naghatag ug kuwarta sa pagtabang sa mga kabos sa kanasoran, apan wala sila magpahayag “ngadto sa kanasoran sa maayong balita mahitungod sa dili-matugkad nga bahandi ni Kristo” o mahitungod sa Ginghariang kagamhanan sa Diyos. (Efeso 3:8) Ang ilang mga misyonaryo tingali nakatabang sa dili-ugmad nga kanasoran nga mahimong labi pang hanas sa paggamit sa daro, apan sila wala makahaylo kanila “sa pagsalsal sa ilang mga espada nga mga punta sa daro ug sa ilang mga bangkaw nga mga galab.”​—Isaias 2:4.

Mahimong Timbang sa Paghigugma sa Imong Silingan

Ang hustong pagbutang sa pangunang pasiugda sa espirituwal nga hinabang, siyempre, dili magpahigawas kanato sa paghatag ug pisikal nga tabang​—ngadto kaha sa mga indibiduwal o mga grupo—​kon kana kinahanglanon ug kon kita makaarang sa pagbuhat niana. Buot natong sundon ang panig-ingnang gihatag sa unang mga Kristohanon. (Tan-awa ang Buhat 11:27-30.) Sa mga panahon sa tinuod nga panginahanglan o katalagman, angay kita madaling mosunod sa tambag ni Pablo sa “pagbuhat kon unsay maayo sa tanan, apan ilabina niadtong kaubanan nato sa pagtuo.” (Galacia 6:10) Sa pagsegurong mahimo ang labing dakong kaayohan, ang mga Saksi ni Jehova sa malangkobon nagabuhat niini sa personal nga paagi. Ug sanglit ang mga Saksi nga nagatabang sa maong mga buhat sa hinabang nagaalagad nga walay bayad, ang administrasyon nga gastos mawagtang.

Apan bisan tuod nagatabang sa uban sa pisikal nga paagi, dili buot hikalimtan sa mga Kristohanon ang ilang pangunang obligasyon, ang pagsangyaw sa maayong balita sa natukod nga Gingharian sa Diyos. Ang maong Gingharian sa dili madugay magwagtang gikan sa kalibotan sa tanang sakit, kakabos, ug panginahanglan. Pagkamakapatagbaw ang pagkaarang sa pagtabang sa mga tawo sa pagbatog kinabuhi sa kalibotan diin ang “kaluoy” dili na kinahanglang gamiton. Posible bang ikaw makahigugma sa imong silingan sa paaging labi pang praktikal kay niana?

“Paghimog mga tinun-an . . . nga magabawtismo kanila . . . nga magatudlo kanila”

Ang paghatag nga walay kasayoran dili maalamon ug dili maisip nga praktikal